Clik here to view.
តំណាងរាស្ត្រគណបក្សសង្គ្រោះជាតិ លោក ងឹម ញេង ទទូចឲ្យអាជ្ញាធរពាក់ព័ន្ធចាត់វិធានការផ្លូវច្បាប់ជាបន្ទាន់ ទៅលើជនល្មើសដែលលួចបង្ហោះលិខិតក្លែងក្លាយមួយច្បាប់ តាមបណ្ដាញសង្គមហ្វេសប៊ុក (Facebook) ដោយបន្លំថា រូបលោកបានសុំចុះចូលជាមួយគណបក្សប្រជាជនកម្ពុជា។ តំណាងរាស្ត្របក្សប្រឆាំងរូបនេះអះអាងថា ឯកសារដែលក្លែងបន្លំនោះ ពុំមែនជារបស់លោកឡើយ។
តំណាងរាស្ត្រគណបក្សប្រឆាំង លោក ងឹម ញេង បញ្ជាក់ជំហរថា លោកមិនក្បត់ឆន្ទៈម្ចាស់ឆ្នោតជាដាច់ខាត។
លោកក៏បានបង្ហាញការតាំងចិត្តនេះ ដោយសរសេរប្រកាសជាឱឡារិកនៅក្នុងហ្វេសប៊ុក របស់លោក កាលពីយប់ថ្ងៃទី៥ វិច្ឆិកា ក្រោយពីមានអ្នកលួចបង្ហោះលិខិតក្លែងក្លាយមួយច្បាប់ ថាលោកបានសុំចុះចូលជាមួយគណបក្សប្រជាជនកម្ពុជា។
តំណាងរាស្ត្របក្សប្រឆាំងដែលកំពុងស្នាក់នៅក្រៅប្រទេសរូបនេះ ចាត់ទុកលិខិតក្លែងក្លាយ របស់ជនអនាមិកនោះ គឺជាអំពើទុច្ចរិត លាបពណ៌របស់មនុស្សមួយក្រុមដែលល្មោភអំណាច។
លោក ងឹម ញេង ស្នើឲ្យអាជ្ញាធរមានសមត្ថកិច្ចស្រាវជ្រាវ និងចាប់ជនល្មើសមកផ្ដន្ទាទោសតាមផ្លូវច្បាប់ឲ្យខានតែបាន។
អាស៊ីសេរីពុំអាចទាក់ទងអ្នកនាំពាក្យក្រសួងមហាផ្ទៃលោក ខៀវ សុភ័គ ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី៦ វិច្ឆិកា។
ខ្លឹមសារក្នុងលិខិតក្លែងក្លាយនោះសរសេរថា លោក ងឹម ញេង ជាតំណាងរាស្ត្រគណបក្សសង្គ្រោះជាតិ សូមគោរពលោកនាយករដ្ឋមន្ត្រីហ៊ុន សែន ស្នើចូលជាសមាជិកគណបក្សប្រជាជនកម្ពុជា។ ក្នុងលិខិតក្លែងក្លាយដដែលឲ្យដឹងទៀតថា យោងតាមការស្នើនេះ ខ្ញុំបាទសូមជម្រាបលោកនាយករដ្ឋមន្ត្រីថា នៅពេលដែលបានដឹងថា លោក កឹម សុខា ជាជនក្បត់ជាតិ និងមានបញ្ហាផ្ទៃក្នុងបក្សជាច្រើន ទើបខ្ញុំបាទសម្រេចបោះបង់ជីវភាពនយោបាយជាមួយគណបក្សសង្គ្រោះជាតិតទៅទៀតហើយ។ លិខិតរបស់ជនអនាមិកដែលធ្វើនៅរាជធានីភ្នំពេញ ចុះថ្ងៃទី១ វិច្ឆិកានោះ ឲ្យដឹងទៀតថា ខ្ញុំបាទសូមលោកនាយករដ្ឋមន្ត្រី អនុញ្ញាតឲ្យរូបខ្ញុំបាទ ចូលរួមជាមួយគណបក្សប្រជាជនដោយក្ដីអនុគ្រោះ។
មន្ត្រីជាន់ខ្ពស់ផ្នែកច្បាប់នៃអង្គការខុមហ្វ្រែល (Comfrel) លោក យឿង សុធារ៉ា មានប្រសាសន៍ថា ការលួចបង្ហោះលិខិតក្លែងក្លាយ ដើម្បីបង្ខូចឈ្មោះរបស់បុគ្គលដទៃ ក្នុងហ្វេសប៊ុក គឺជាអំពើខុសច្បាប់។ លោកអះអាងទៀតថា បញ្ហានេះអាជ្ញាធរត្រូវតែចាត់វិធានការ ទៅលើការប្រព្រឹត្តិតាមច្បាប់ ព្រោះធ្វើឲ្យខូចកេរ្តិ៍ឈ្មោះរបស់អ្នកដទៃ៖ «ដូចនេះវាប៉ះពាល់ដល់ប្រយោជន៍សាធារណៈ និងប្រយោជន៍បុគ្គល បានជាគេកំណត់វាជាបទល្មើស។ ហើយអាជ្ញាធរត្រូវតែអនុវត្តច្បាប់ដូចការអនុវត្តច្បាប់ទូទៅដែរ ហើយឲ្យស្មើភាពគ្នា ដោយមិនប្រកាន់និន្នាការគណបក្សនយោបាយ ដើម្បីឲ្យការអនុវត្តនោះបានស្មើភាពនៅចំពោះមុខច្បាប់»។
ទោះជាយ៉ាងណាលោក យឿង សុធារ៉ា កត់សំគាល់ទៀតថា ករណីបែបនេះ កន្លងមកកើតមានជាហូរហែ ក៏ប៉ុន្តែការអនុវត្តច្បាប់ របស់អាជ្ញាធរហាក់រើសអើង ទៅលើមន្ត្រីគណបក្សប្រឆាំង ដោយមិនចាត់វិធានការភ្លាមៗ ដូចករណីពលរដ្ឋរិះគន់ទៅលើមន្ត្រីរដ្ឋាភិបាលនោះទេ៖ «អាជ្ញាធរមូលដ្ឋានអាជ្ញាធរមានសមត្ថកិច្ចដែលមានការរើសអើងបែបនេះ វាធ្វើឲ្យទំនាស់សង្គមកាន់តែជ្រាលជ្រៅ និងធ្វើឲ្យការរើសអើងនៅក្នុងសង្គម ហើយប្រជាពលរដ្ឋ និងបាត់បង់ជំនឿលើប្រព័ន្ធយុត្តិធម៌។ប្រព័ន្ធយុត្តិធម៌មិនសំដៅតែទៅលើប្រព័ន្ធតុលាការទេ គឺសំដៅផងដែរទៅលើមន្ត្រី ដែលអនុវត្តច្បាប់ផ្ទាល់ គឺអាជ្ញាធរមានសមត្ថកិច្ច ដែលពួកគាត់ជាសេនាធិការរបស់តុលាការ»។
កាលពីថ្ងៃទី២៧ តុលា កន្លងទៅលោក ងឹម ញេង ត្រូវបានមន្ត្រីប៉ូលិសអន្តោប្រវេសន៍ប្រចាំច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ បង្អាក់ដំណើរលោក ប្រមាណ ១ម៉ោងម្ដងរួចទៅហើយ ខណៈដែលលោកធ្វើដំណើរឆ្លងដែនទៅក្រៅប្រទេសនោះ។ កាលណោះមន្ត្រីប៉ូលិសបានប្រាប់លោកថា លិខិតឆ្លងដែនរបស់លោកត្រូវបានបង្កកមិនឲ្យចេញទៅក្រៅប្រទេសទេ។ ប៉ុន្តែមួយម៉ោងក្រោយមក ប៉ូលិសក៏សម្រេចប្រថាប់ត្រាអោយលោកបានឆ្លងដែនទៅប្រទេសថៃឡើងវិញ៕