Clik here to view.
ព្រះរាជអាជ្ញារងសាលាដំបូងរាជធានីភ្នំពេញ លោក សៀង សុខ ចេញដីកាបង្គាប់ឲ្យមេធាវីលោកនាយករដ្ឋមន្ត្រី ហ៊ុន សែន គឺលោក គី តិច ចូលខ្លួនបំភ្លឺនៅសាលាដំបូងរាជធានីភ្នំពេញ នៅថ្ងៃទី៦ ខែវិច្ឆិកា ទាក់ទងបណ្ដឹងប្រឆាំងលោក លឺ ឡាយស្រេង អតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិច។
លោក ហ៊ុន សែន ប្ដឹងលោក លឺ ឡាយស្រេង ពីបទបរិហាកេរ្តិ៍ជាសាធារណៈ និងបទប្រមាថ ហើយព្រះរាជអាជ្ញារង លោក សៀង សុខ កោះហៅលោក លឺ ឡាយស្រេង ឲ្យទៅបំភ្លឺនៅសាលាដំបូងទាក់ទងការចោទប្រកាន់នេះ នៅថ្ងៃទី២៧ ខែវិច្ឆិកា។
លោក គី តិច ជាមេធាវីរបស់លោក ហ៊ុន សែន តំណាងដោយអាណត្តិ ទាមទារឲ្យលោក លឺ ឡាយស្រេង សងសំណងជំងឺចិត្តចំនួន ៥០០លានរៀល ដល់ដើមបណ្តឹងរដ្ឋប្បវេណី។ សុំឲ្យតុលាការប្រកាសផ្តន្ទាទោសបន្ថែម ផ្អែកតាមមាត្រា ៣១០ នៃក្រមព្រហ្មទណ្ឌ សុំឲ្យអយ្យការ និងសាលាដំបូងរាជធានីភ្នំពេញ ធ្វើការចោទប្រកាន់ និងផ្ដន្ទាទោសឈ្មោះ លឺ ឡាយស្រេង តាមច្បាប់។
លោក ហ៊ុន សែន ប្ដឹងទៅសាលាដំបូងរាជធានីភ្នំពេញ នេះ នៅក្រោយពេលហ្វេសប៊ុក (Facebook) ឈ្មោះ "សីហា" បានលួចថតសំឡេង លោក លឺ ឡាយស្រេង សន្ទនាជាមួយអ្នកស្រី គី លំអង ដែលជាអតីតមន្ត្រីគណបក្សហ្វ៊ុនស៊ិនប៉ិចដូចគ្នា កាលពីថ្ងៃទី២១ ខែតុលា។ នៅក្នុងសំឡេងសន្ទនាតាមទូរស័ព្ទជាសម្ងាត់នោះ លោក ហ៊ុន សែន ចោទថា លោក លឺ ឡាយស្រេង ប្រមាថព្រះមហាក្សត្រ និងបរិហារកេរ្តិ៍រូបលោក ទាក់ទងនឹងការផ្ដល់លុយជូនមន្ត្រីគណបក្សហ្វ៊ុនស៊ិនប៉ិច។
លោក លឺ ឡាយស្រេង ធ្លាប់បានបញ្ជាក់ថា លោកមិនរកមេធាវីដើម្បីតតាំងក្នុងសំណុំរឿងក្ដីនេះទេ។ លោកបញ្ជាក់ថា តុលាការកម្ពុជា មិនមែនជាតុលាការដែលផ្ដល់ភាពយុត្តិធម៌ជូនលោក និងមនុស្សទូទៅទេ ដោយលោកហៅតុលាការនេះថា ជាតុលាការតេឡេ បញ្ជាដោយលោក ហ៊ុន សែន។
ទាក់ទងនឹងសំណុំរឿងនេះ អ្នកច្បាប់លើកឡើងថា អ្នកដែលខុសច្បាប់ធ្ងន់ធ្ងរនោះ គឺអ្នកលួចថតសំឡេងសន្ទនារបស់លោក លឺ ឡាយស្រេង ដែលលោកសន្ទនាឯកជនជាសម្ងាត់ ដែលបានធានានៅក្នុងរដ្ឋធម្មនុញ្ញ និងច្បាប់មួយចំនួនទៀត តែបែរជាត្រូវបានហ្វេសប៊ុក ឈ្មោះ "សីហា" យកមកទម្លាយជាសាធារណៈ ហើយរដ្ឋាភិបាលមិនបានចាប់ខ្លួន តែបែរជាមកប្ដឹងលោក លឺ ឡាយស្រេង ដែលគេហៅថា ជាអ្នករងគ្រោះទៅវិញ៕
