Clik here to view.
មន្ត្រីគណបក្សសង្គ្រោះជាតិ នៅខេត្តព្រៃវែង អះអាងថា ចំនួនប្រជាពលរដ្ឋចុះឈ្មោះបោះឆ្នោតនៅក្នុងខេត្តនេះ មិនទាន់បានដល់ ៥០ភាគរយនៅឡើយ ខណៈការចុះឈ្មោះបោះឆ្នោតជិតបញ្ចប់។
មន្ត្រីគណបក្សសង្គ្រោះជាតិ ខេត្តព្រៃវែង កំពុងព្រួយបារម្ភថា ប្រជាពលរដ្ឋជាច្រើននៅក្នុងខេត្តនេះនឹងបាត់បង់សិទ្ធិបោះឆ្នោតជ្រើសរើសតំណាងរាស្ត្រ នៅឆ្នាំ២០១៨ ខាងមុខ ដោយសារមកទល់ពេលនេះ ចំនួនអ្នកបានចុះឈ្មោះបោះឆ្នោតនៅតិចតួចនៅឡើយ។
សមាជិកក្រុមប្រឹក្សាខេត្ត និងជាលេខាគណបក្សសង្គ្រោះជាតិ ខេត្តព្រៃវែង លោក ជុំ ចាន់ លើកឡើងថា នៅតាមការិយាល័យចុះឈ្មោះបោះឆ្នោតមួយចំនួនក្នុងខេត្តនេះ ស្ទើរតែមិនមានពលរដ្ឋណាម្នាក់ទៅចុះឈ្មោះឡើយក្នុងមួយថ្ងៃៗ។ លោកថា បើគិតជារួម គឺមកដល់ពេលនេះ អ្នកបានចុះឈ្មោះបោះឆ្នោតមិនដល់ ៥០ភាគរយផង ខណៈដែលការចុះឈ្មោះបោះឆ្នោតនៅសល់តែមួយសប្ដាហ៍ទៀតប៉ុណ្ណោះនឹងត្រូវបញ្ចប់៖ «»។
សេចក្ដីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប) បង្ហាញថា គិតត្រឹមម៉ោង ៦ល្ងាច ថ្ងៃទី១ ខែវិច្ឆិកា គឺមានប្រជាពលរដ្ឋនៅខេត្តព្រៃវែង ជាង ៣ម៉ឺននាក់ (៣៤.៤៤២) ឬស្មើនឹង ៣៤,៥៩ភាគរយ បានទៅចុះឈ្មោះបោះឆ្នោត ខណៈប្រជាពលរដ្ឋប៉ាន់ស្មានដែលត្រូវមកចុះឈ្មោះបោះឆ្នោតមានជាង ១០ម៉ឺន (១០៥.៣៦២) នាក់ និងអ្នកគ្រប់អាយុចុះឈ្មោះបោះឆ្នោតមានជាង ៧៧ម៉ឺន (៧៧៩.៩២៥)នាក់។
មន្ត្រីបក្សប្រឆាំងដដែលរិះគន់ថា ក្នុងពេលចុះឈ្មោះបោះឆ្នោតគឺ គ.ជ.ប ពុំសូវបានផ្សព្វផ្សាយឲ្យបានទូលំទូលាយដល់ប្រជាពលរដ្ឋអោយបានយល់ដឹងអំពីតម្លៃនៃការចុះឈ្មោះបោះឆ្នោតឡើយ៖ «»។
មន្ត្រីផ្នែកអង្កេតនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) លោក កន សាវង្ស ធ្លាប់លើកឡើងថា ចំនួនអ្នកដែលបានចុះឈ្មោះបោះឆ្នោតនៅទូទាំងប្រទេសគឺនៅមានចំនួនតិចនៅឡើយ ។ មូលហេតុដែលអ្នកទៅចុះឈ្មោះបោះឆ្នោតមានចំនួនតិច បណ្ដាលមកពីប្រជាពលរដ្ឋធ្វើចំណាកស្រុកផង វិបត្តិនយោបាយផង និងការមិនសម្រួលឲ្យពលករនៅក្រៅប្រទេសបានចុះឈ្មោះបោះឆ្នោត ព្រមទាំងបញ្ហាស្មុគស្មាញក្នុងការចេញលិខិតស្នាមជូនពលរដ្ឋសម្រាប់ការចុះឈ្មោះបោះឆ្នោត បូករួមនឹងស្ថានភាពមិនអំណោយផលជាច្រើនទៀត។
លោក កន សាវង្ស បន្ថែមថា ដើម្បីជំរុញឲ្យពលរដ្ឋចុះឈ្មោះបោះឆ្នោតបានច្រើននោះ គឺត្រូវសម្រួលឲ្យពលករនៅក្រៅប្រទេសបានចុះឈ្មោះបោះឆ្នោត។ គ.ប.ជ ត្រូវបង្កើនការចុះអប់រំផ្សព្វផ្សាយដល់ពលរដ្ឋ និងអាជ្ញាធរមូលដ្ឋាន ហើយត្រូវពង្រីកក្រុមការងារចុះឈ្មោះបោះឆ្នោតចល័តឲ្យបានច្រើន។ទន្ទឹមគ្នានេះ រដ្ឋាភិបាលត្រូវស្តារស្ថានភាពនយោបាយឲ្យល្អប្រសើរឡើងវិញ។
ដំណើរការចុះឈ្មោះបោះឆ្នោតក្នុងបញ្ជីបោះឆ្នោតថ្មីឆ្នាំ២០១៧ និងការធ្វើបច្ចុប្បន្នភាពបញ្ជីបោះឆ្នោតឆ្នាំ២០១៦ មានរយៈពេល ៧០ថ្ងៃ រាប់ចាប់ពីថ្ងៃទី១ ខែកញ្ញា ដល់ថ្ងៃទី៩ ខែវិច្ឆិកា ឆ្នាំ២០១៧។មកដល់ពេលនេះ ការចុះឈ្មោះបោះឆ្នោតនៅសល់តែ ៧ថ្ងៃទៀតប៉ុណ្ណោះ នឹងត្រូវបិទបញ្ចប់៕
