Clik here to view.
ចៅក្រមនៃសាលាដំបូងខែត្រស្ទឹងត្រែងមួយរូប រងការចោទថា ឃុំខ្លួនពលរដ្ឋលម្អៀង ក្នុងសំណុំរឿងប្រើហិង្សាដោយចេតនា នៅគ្រាដែលដើមបណ្ដឹងរឿងនេះ មានសាច់ញាតិជាអ្នកបើករថយន្តឲ្យខ្លួន។ ប៉ុន្តែចៅក្រមស៊ើបសួររូបនេះ បដិសេធការចោទប្រកាន់នេះ។
ពលរដ្ឋរស់នៅឃុំកាំងចាម ស្រុកថាឡាបរិវ៉ាត់ ខែត្រស្ទឹងត្រែង ចាត់ទុកការសម្រេចឃុំខ្លួនពលរដ្ឋមួយរួប របស់ចៅក្រមនៃសាលាដំបូងខែត្រស្ទឹងត្រែងថា ជារឿងអយុត្តិធម៌ ខណៈសំណុំរឿងនេះភាគីទាំងសងខាង បានវាយតប់គ្នាទៅវិញទៅមក បណ្ដាលឲ្យមានរបួសតិចតូចទាំងសងខាង។ ភាគីចុងចោទ បានដាក់ពាក្យប្ដឹងសុំការអន្តរាគមន៍ផ្នែកច្បាប់ទៅសមាគមអាដហុក (Adhoc) បន្ទាប់ពីតុលាការសម្រេចឃុំខ្លួនបុរសម្នាក់កាលពីដើមខែតុលា ឆ្នាំ២០១៧។
បុរសដែលត្រូវជាឪពុកជនជាប់ចោទ លោក ស៊ុយ តឿ ឲ្យដឹងនៅថ្ងៃទី៣១ តុលា ថា ប្រពន្ធរបស់លោកឈ្មោះ អេង សុភាព បានឈ្លោះប្រកែកគ្នា ជាមួយស្ត្រីឈ្មោះ សុខ ជា ហៅយាយវ៉ែនតា ដោយបានវាយតបគ្នាសងខាង ហើយកូនរបស់លោក ឈ្មោះ សួង តាក់ បានចូលឃាត់។ ការវាយតប់គ្នានោះ បង្កឲ្យភាគីទាំងសងខាងមានរបួសស្រាលរៀងខ្លួន ក៏ប៉ុន្តែចៅក្រមស៊ើបសួរនៃសាលាដំបូងខែត្រស្ទឹងត្រែង លោក គង់ កូមិន្ទ បានសម្រេចឃុំខ្លួនកូនប្រុសរបស់លោក ឈ្មោះ សួង តាក់ ដោយចោទថា ប្រើហិង្សាដោយចេតនា។ ឪពុកលោក សួង តាក់ ឈ្មោះ លោក ស៊ុយ តឿ ចាត់ទុកការឃុំខ្លួននេះជារឿងអយុត្តិធម៌ និងលម្អៀង។
មន្ត្រីឃ្លាំមើលសិទ្ធិមនុស្សនៃសមាគមអាដហុក ខែត្រស្ទឹងត្រែង លោក ហូ សំអុល ដែលចុះអង្កេតរឿងនេះរកឃើញថា សំណុំរឿងនេះភាគីសងខាងវាយតបគ្នាទៅវិញទៅមក បង្កឲ្យរបួសតិចតួចសងខាង ពុំមែនជាករណីធ្ងន់ធ្ងរនោះទេ។ លោកថា គួរតែចៅក្រមស៊ើបសួរ និងតំណាងអយ្យការយកពាក្យបណ្ដឹងភាគីទាំងសងខាងមកថ្លឹងថ្លែង ឲ្យបានត្រឹមត្រូវតាមច្បាប់។ លោករកឃើញថា ដើមចោទម្នាក់ឈ្មោះ សុខ ជា ហៅយាយវ៉ែនតា មានកូនប្រុសម្នាក់គឺជាអ្នកបើករថយន្តឲ្យចៅក្រមស៊ើបសួរ ក្នុងសំណុំរឿងនេះ ហេតុនេះការឃុំខ្លួននេះទំនងជាចៅក្រមលោក គង់ កូមិន្ទ លម្អៀងទៅដើមចោទ។
ឆ្លើយតបការចោទប្រកាន់នេះ ចៅក្រមស៊ើបសួរ លោក គង់ កូមិន្ទ បានបដិសេធការចោទប្រកាន់នេះ ដោយចាត់ទុកថា គ្មានមូលដ្ឋាន។ លោកសង្កត់ធ្ងន់ថា បន្ទាប់ពីលោកសម្រេចឃុំខ្លួនឈ្មោះ សួង តាក់ អាជ្ញាធរភូមិ និងអាជ្ញាធរឃុំ បានទូរស័ព្ទមកលោកថ្លែងអំណរគុណ និងជប់លៀង ដោយសារបុគ្គលឈ្មោះ សួង តាក់ តែងប្រើអំពើហិង្សាលើអ្នកភូមិ ដោយមានមន្ត្រីអាដហុកនៅពីក្រោយខ្នង។ លោកថា បទល្មើសប្រើអំពើហិង្សានេះ គឺជាហិង្សាមួយដោយព្រៃផ្សៃ វាយស្ត្រីមានផ្ទៃពោះ និងបានកាច់វ៉ែនតាស្ត្រីនោះចោលទៀតផង។
ជុំវិញការលើកឡើងរបស់ចៅក្រមនេះ មន្ត្រីអាដហុកខែត្រស្ទឹងត្រែង លោក ហូ សំអុល ឆ្លើយតបថា ប្រសិនចៅក្រមស៊ើបសួរចោទ បុរសឈ្មោះ សួង តាក់ ដើរវាយគេឯងពេញភូមិ ហេតុអ្វីក៏មិនមានចំណាត់ការផ្នែកច្បាប់អំឡុងពេល ប្រើអំពើហិង្សានោះ។ លោកកត់សម្គាល់ថា បុរសឈ្មោះ សួង តាក់ ក៏ធ្លាប់ត្រូវបានគេវាយបែកក្បាល តែតុលាការខែត្រស្ទឹងត្រែងមិនទាន់ចាត់ការរហូតមកទល់ពេលនេះ។
រហូតមកទល់ពេលនេះ ដើមចោទឈ្មោះ សួង តាក់ ត្រូវបានចៅក្រមស៊ើបសួរនៃសាលាដំបូងខែត្រស្ទឹងត្រែង លោក គង់ កូមិន្ទ សម្រេចឃុំខ្លួននៅពន្ធនាគារខែត្រស្ទឹងត្រែង ជាងកន្លះខែមកហើយ៕
