លោក លឺ ឡាយស្រេង អតីតឧបនាយករដ្ឋមន្ត្រី អះអាងថា អ្នកដែលលួចថតសំឡេងសន្ទនារបស់លោកយកមកផ្សព្វផ្សាយជាសាធារណៈនោះ គឺជាអ្នកដែលប្រមាថព្រះមហាក្សត្រ ហើយតុលាការត្រូវផ្ដន្ទាទោសអ្នកនោះ មិនមែនរូបលោកនោះទេ។
ការបញ្ជាក់ដូច្នេះរបស់លោក លឺ ឡាយស្រេង នៅបន្ទាប់ពីលោក អង្គ វង្សវឌ្ឍានា រដ្ឋមន្ត្រី ក្រសួងយុត្តិធម៌ និងលោកនាយករដ្ឋមន្ត្រី ហ៊ុន សែន បានព្រួតដៃគ្នាប្ដឹងលោក ទៅតុលាការ ចោទប្រកាន់ពីបទប្រមាថព្រះចេស្ដាព្រះមហាក្សត្រ។
លោក លឺ ឡាយស្រេង ដែលជាអតីតមន្ត្រីជាន់ខ្ពស់គណបក្សហ៊្វុនស៊ិនប៉ិចដែរនោះ ប្រកាសជំហរថា លោកមិនប្ដឹងបកចំពោះអ្នកលួចថតសំឡេងលោក យកមកផ្សព្វផ្សាយជាសាធារណៈទេ ដោយលោកមិនចង់ឲ្យភាគីខ្មែរដូចគ្នាហែកហួរ ប្ដឹងផ្ដល់បំផ្លាញគ្នាឯងនោះទេ។
លោក លឺ ឡាយស្រេង មានប្រសាសន៍កាលពីថ្ងៃទី២៤ តុលាថា លោកគ្មានចេតនាប្រមាថព្រះចេស្ដាព្រះមហាក្សត្រឡើយ អ្វីដែលលោកនិយាយគ្រាន់តែជាការសន្ទនាសម្ងាត់រវាងមនុស្សពីរនាក់ប៉ុណ្ណោះ ផ្ទុយវិញ អ្នកលួចថតសំឡេងលោក និងយកមផ្សព្វផ្សាយទៅវិញទេ ដែលជាអ្នកប្រព្រឹត្តិខុសច្បាប់ និងប្រមាថព្រះមហាក្សត្រ។
មេធាវីរបស់លោក ហ៊ុន សែន គឺលោក គី តិច និងលោក អង្គ វង្សវឌ្ឍានា បានដាក់ពាក្យប្ដឹងលោក លឺ ឡាយស្រេង កាលពីថ្ងៃទី២៤ តុលា ដោយស្នើឲ្យសាលាដំបូងរាជធានីភ្នំពេញ ចាត់វិធានការផ្លូវច្បាប់ជាបន្ទាន់ និងតឹងរ៉ឹងជាទីបំផុត ចំពោះករណីប្រមាថព្រះមហាក្សត្រធ្ងន់ធ្ងរដល់ព្រះចេស្ដាព្រះមហាក្សត្រ ដោយយោងលើរដ្ឋធម្មនុញ្ញ និងក្រមព្រហ្មទណ្ឌ។ នៅក្នុងពាក្យបណ្ដឹងនេះ ក៏បានស្រង់យកខ្លឹមសាររដ្ឋធម្មនុញ្ញមាត្រា ៧ កថាខ័ណ្ឌ ៣ ចែងថា អង្គព្រះមហាក្សត្រ មិនអាចអ្នកណារំលោភបំពានបានឡើយ។
អ្នកជំនាញខាងវិទ្យាសាស្ត្រនយោបាយ លោក ឯម សុវណ្ណារា មានប្រសាសន៍ថា រដ្ឋាភិបាលការពារព្រះចេស្ដាព្រះមហាក្សត្រមិនឲ្យអ្នកណាម្នាក់ប្រមាថព្រះមហាក្សត្រនេះ ជារឿងល្អ ក៏ប៉ុន្តែរដ្ឋាភិបាលមិនត្រូវប្ដឹងតែលោក លឺ ឡាយស្រេង ដោយផ្អែកលើភស្តុតាង ខ្សែអាត់សំឡេង ដែលគណនីហ្វេសប៊ុក (Facebook) ឈ្មោះ សីហា យកមកផ្សព្វផ្សាយនោះទេ ក្រសួងយុត្តិធម៌ ឬរដ្ឋាភិបាល ត្រូវស្វែងរកឲ្យឃើញម្ចាស់គណនីឈ្មោះ សីហានេះ យកមកផ្ដន្ទាទោសដូចគ្នា ទើបឆ្លុះបញ្ចាំងថា ជាការអនុវត្តច្បាប់មានស្មើភាពគ្នានៅក្នុងសង្គម។
លោក មេធាវី សេក សោភ័ណ ពន្យល់ថា រដ្ឋធម្មនុញ្ញកម្ពុជា បានចែងពីការពារមនុស្សគ្រប់រូប និងមានសិទ្ធិស្មើគ្នានៅចំពោះមុខច្បាប់។ លើសពីនេះទៀត អ្វីដែលរដ្ឋាភិបាលត្រូវចាត់ការផ្លូវច្បាប់បន្ទាន់នោះ គឺការស្វែងរកម្ចាស់គណនីហ្វេសប៊ុក ឈ្មោះ សីហានោះ យកមកផ្ដន្ទាទោសសិន ដោយសារការលួចថតសំឡេងការសន្ទនាឯកជនសម្ងាត់របស់គេយកមកផ្សព្វផ្សាយម្ដងហើយម្ដងទៀត តែរដ្ឋាភិបាលមិនខ្វល់ចំពោះទង្វើនេះទៅវិញ។
លោក ហ៊ុន សែន ប្រកាសប្ដឹងលោក លឺ ឡាយស្រេង ចំនួនពីរ ទី១ ប្ដឹងចោទថា លោក លឺ ឡាយស្រេង ប្រមាថព្រះមហាក្សត្រ ទី២ ប្ដឹងពីបទបរិហារកេរ្តិ៍រឿងថា ទិញទឹកចិត្តមន្ត្រីគណបក្សហ៊្វុនស៊ិនប៉ិចម្នាក់២ម៉ឺនដុល្លារ។ ក្រៅពីបណ្ដឹងរបស់លោក លោក ហ៊ុន សែន និងបក្សពួករបស់លោក គឺលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌នេះ គឺព្រះអង្គម្ចាស់នរោត្តម រាណឫទ្ធិក៏ប្រកាសប្ដឹងលោក លឺ ឡាយស្រេង ពីករណីដូចគ្នានេះដែរ តែមកទល់ពេលនេះ អតីតជាចៅហ្វាយនាយរបស់លោក ព្រឹទ្ធាចារ្យ លឺ ឡាយស្រេង ផងនោះ មិនទាន់ដាក់ពាក្យប្ដឹងជាផ្លូវការនៅឡើយ។
លោក លឺ ឡាយស្រេង អតីតជាមន្ត្រីជាន់ខ្ពស់គណបក្សហ៊្វុនស៊ិនប៉ិច និងជារដ្ឋមន្ត្រីក្រសួងព័ត៌មាន និងក្រសួងអភិវឌ្ឍន៍ជនបទ បញ្ជាក់ថា លោកទទួលស្គាល់នូវកំហុសរបស់លោក ដោយលោកសុំព្រះរាជទានលើកលែងទោសពីព្រះមហាក្សត្រម្ដងហើយម្ដងទៀតថា ជាអ្នកស្រលាញ់ព្រះមហាក្សត្រ និងការពាររបបរាជនិយមតាំងពីលោកនៅបម្រើការងារជាមួយគណបក្សហ៊្វុនស៊ិនប៉ិច ហើយបច្ចុប្បន្ននេះ លោកគ្មានចូលរួមជាមួយគណបក្សណាទេ អ្វីដែលលោកចង់បាន កុំឲ្យខ្មែរបែកបាក់គ្នា និងធ្វើទុក្ខបុកម្នេញគ្នាឥតឈប់ឈរនោះ។ លោកបន្ថែមថា លោកហ៊ុន សែន ទៅវិញទេ ដែលធ្លាប់ប្រមាថព្រះមហាក្សត្រ និងចង់ទាំងរំលាយរាជបល្ល័ង្កទៀតផង។
ការដាក់ពាក្យប្ដឹងប្រឆាំងលោក លឺ ឡាយស្រេង នេះ គឺ សំអាងទៅលើហ្វេសប៊ុកឈ្មោះ សីហា បានទម្លាយការខ្សែអាត់សំឡេងរបស់ លោក លឺ ឡាយស្រេង សន្ទនាជាលក្ខណៈឯកជនជាមួយអតីតសហការីរបស់ខ្លួន គឺអ្នកស្រី គី លំអង ចំនួនពីរដង កាលពីថ្ងៃទី២១ តុលា យកមកធ្វើជាភស្តុតាង។ នៅក្នុងកិច្ចសន្ទនានោះ លោក លឺ ឡាយស្រេង និយាយថា ប្រសិនបើព្រះមហាក្សត្រ ទ្រង់មិនអាចអន្តរាគមន៍ ដោះស្រាយវិបត្តិនយោបាយសព្វថ្ងៃបានទេ ទ្រង់គួរដាក់រាជ្យវិញទៅ។ ក្រៅពីនេះ លោក លឺ ឡាយស្រេង បានរិះគន់សម្ដេចក្រុមព្រះ ថាជាអ្នកនយោបាយ ដែលអង្គុយចាំទទួលយកតែផល ដោយមិនចេះអៀនខ្មាស និងធ្វើឲ្យបាត់ព្រះកិត្តិនាមព្រះរាជវង្សានុវង្សជាដើម។ ដោយឡែកនៅក្នុងពាក្យបណ្ដឹងរបស់រដ្ឋាភិបាលនេះ មិនបានប្ដឹងអ្នកស្រី គី លំអងទេ។
ការលួចថតសំឡេងគេរបស់សីហានេះ មិនមែនជាលើកទី១ទេ នរណាក៏ដឹងដែរថា ម្ចាស់គណនីនេះ បំពាន់ច្បាប់ម្ដងហើយម្ដងទៀត គ្មានខ្លាចរអាអ្វីឡើយ ចំពោះទង្វើខុសច្បាប់របស់ខ្លួនលួចថតសំឡេងគេសន្ទនាតាមទូរស័ព្ទដោយសេរីនេះ។ កាលពីមុន គណនីឈ្មោះ សីហានេះ បានលួចថតការសន្ទនារបស់ មន្ត្រីបក្សប្រឆាំងជាច្រើនរូបទៀត និងយកមកផ្សព្វផ្សព្វផ្សាយជាបន្តបន្ទាប់ដូចគ្នានេះដែរ។ ផ្ទុយទៅវិញ សកម្មភាពថតសំឡេងនេះ ត្រូវបានលោក ហ៊ុន សែន ក៏ធ្លាប់បានប្រកាសសរសើរ ជាសាធារណៈ ថាមានបច្ចេកទេសពូកែខាងលួចថតសំឡេងនេះទៅវិញ។
ចំពោះអ្នកវិភាគឯករាជ្យ លោក បណ្ឌិត ឡៅម៉ុងហៃ មានប្រសាសន៍ថា មូលហេតុសំខាន់ដែល លោក ហ៊ុន សែន អនុញ្ញាតឲ្យមានប្រព័ន្ធតាមដានដូច្នេះ គឺដោយសារតែរដ្ឋាភិបាល ភ័យខ្លាច និង លែងទុកចិត្តអ្នកណាទាំងអស់ហើយ ទោះបីជាទង្វើនោះខុសច្បាប់ក្ដី ហើយរបបដែលមានការតាមដានដូច្នេះ គឺលោកបញ្ជាក់ថា គឺជារបបផ្ដាច់ការ។
ការលបថតសំឡេងគេ ជាការខុសច្បាប់នេះ មានចែងនៅក្នុងច្បាប់ជាច្រើន រួមមាន ក្រមព្រហ្មទណ្ឌ ច្បាប់ស្ដីពីទូរគមនាគមន៍ និងរដ្ឋធម្មនុញ្ញជាដើម។
មាត្រា៣១៨ នៃក្រមព្រហ្មទណ្ឌ បទប៉ះពាល់ដល់ការសម្ងាត់នៃការសន្ទនាតាមទូរស័ព្ទ អំពើប្រព្រឹត្តដោយគំនិតទុច្ចរិត ស្ដាប់ ឬធ្វើឲ្យធ្វើច្របូកច្របល់ ការសន្ទនាតាមទូរស័ព្ទ ត្រូវផ្ដន្ទាទោសដាក់ពន្ធនាគារពី១ ខែទៅ ១ឆ្នាំ និងពិន័យជាប្រាក់ពី១សែនរៀល ទៅ២លានរៀល។ ចំពោះមាត្រា ៣២១ ស្ដីពីវិធានភស្តុតាងចែងថា ចម្លើយដែលទទួលបានពីការបង្ខិតបង្ខំ ខាងរូបកាយ ឬខាងផ្លូវចិត្តគ្មានតម្លៃជាភស្ដុងតាងទេ។ នៅត្រង់ចំណុចនេះអ្នកច្បាប់ពន្យល់ថា ទោះបីជាលោក លឺ ឡាយស្រេង ទទួលស្គាល់ថា សំឡេងសន្ទនានោះជាសំឡេងលោកក៏ដោយ ក៏តុលាការមិនអាចយកសំឡេងនោះ មកធ្វើជាមូលដ្ឋានក្នុងការចោទប្រកាន់បានទេ។
មាត្រា១០៥ នៃក្រមព្រហ្មទណ្ឌដដែល ចែងថា ចំពោះមន្ត្រីនគរបាលយុត្តិធម៌គ្មានសិទ្ធិបង្គាប់បញ្ជា អ្នកណាម្នាក់ ទៅថតសំឡេងគេឆ្លងឆ្លើយ ដែលចេញតាមមធ្យោបាយទូរគមនាគមន៍ សារតាមទូរសារ ឬអ៊ីនធឺណែត យកមកធ្វើជាភស្ដុ តាងដាក់បន្ទុកនរណាម្នាក់បានទេ។
ចំពោះមាត្រា៤០ កថាខណ្ឌ៣ ចែងថា ការរក្សាសិទ្ធិមិនឲ្យរំលោភលើលំនៅឋាន និងអាថ៌កំបាំង នៃការឆ្លងឆ្លើយតាមលិខិត តាមសារទូរលេខ ទូរពុម្ព ទូរគមនាគមន៍ តាមទូរស័ព្ទ ត្រូវបានធានា។
ដោយឡែក ចំពោះមាត្រា៩៧ នៃច្បាប់ស្ដីពីគមនាគមន៍វិញ ចែងថា ការស្ដាប់ ឬការលបថតការសន្ទនា ដោយការប្រើប្រាស់ប្រព័ន្ធទូរគមនាគមន៍ ដោយបុគ្គល ដែលពុំមែន ជាភាគីនៃការសន្ទនា ត្រូវផ្ដន្ទាទោសដាក់ពន្ធនាគារពី ១ខែ ទៅ១ឆ្នាំ និងពិន័យជាប្រាក់ពី១លានរៀលទៅ២លានរៀល។ ម្យ៉ាងវិញទៀតនៅក្នុងកថាខណ្ឌទី៣ ចែងថា ត្រូវផ្ដន្ទាទោសដូចគ្នា ចំពោះការផ្សព្វផ្សាយខ្លឹមសារ នៃការសន្ទនា ដោយពុំបានទទួលសិទ្ធិស្របច្បាប់ពីភាគីការសន្ទនា ឬពីអាជ្ញាធរ ធម្មានុរូប ឬពីបទដ្ឋានគតិយុត្តិជាធរមាន។
ទាក់ទងនិងបញ្ហានេះ ក្រុមអ្នកច្បាប់មើលឃើញថា រដ្ឋាភិបាល ឬក្រសួងយុត្តិធម៌ត្រូវធានាឲ្យមានការអនុវត្តច្បាប់របស់ប្រទេស ក៏ប៉ុន្តែ លោក អង្គ វង្សវឌ្ឍានា ជារដ្ឋមន្ត្រីក្រសួងយុត្តិធម៌ មកតាំងខ្លួន ជាដើមបណ្ដឹងទាំងបំពានច្បាប់ទាំងនេះទៅវិញ។
រដ្ឋាភិបាលអនុវត្តច្បាប់មិនបានស្មើភាពគ្នាបែបនេះ គឺធ្វើឲ្យពលរដ្ឋ និងក្រុមដែលមានមតិផ្ទុយពីរដ្ឋាភិបាលស្ថិតនៅក្នុងភាពគ្រោះថ្នាក់ ព្រោះថា រដ្ឋាភិបាល ឬតុលាការ អាចចាប់ខ្លួន អាចដាក់ទោសទាំងកំរោល ដូចជាការចាប់ខ្លួនឃុំខ្លួន អ្នកវិភាគនយោបាយ មន្ត្រីបក្សប្រឆាំងជាបន្តបន្ទាប់ រួមទាំងលោក កឹម សុខា ផង សូម្បីតែស្ត្រីរងគ្រោះដីធ្លីក៏តុលាការរបស់លោក ហ៊ុន សែន មិនលើកលែងដែរ ដូចជាអ្នកស្រី ទេព វន្នី ជាដើម។
លោក លឺ ឡាយស្រេង ជាអតីតមន្ត្រីជាន់ខ្ពស់គណបក្សហ៊្វុនស៊ិនប៉ិច តែម្នាក់គត់ ដែលហ៊ានចេញមុខរិះគន់រដ្ឋាភិបាលឥតសំចៃមាត់ ចំពោះទង្វើមិនប្រក្រតីរបស់រដ្ឋាភិបាលនោះ។ ការរងពាក្យប្ដឹងប្រឆាំងរូបលោកនៅពេលនេះ នៅក្រោយពីលោកបានរិះគន់ខ្លាំងៗ ទៅលើការធ្វើវិសោធនកម្មច្បាប់ចំនួន៤ ទាក់ទងនឹងការបោះឆ្នោត ដែលសហគមន៍ជាតិ-អន្តរជាតិចាត់ទុកការធ្វើវិសោធនកម្មច្បាប់ដើម្បីរំលាយគណបក្សសង្គ្រោះជាតិនោះ។
លោក លឺ ឡាយ ស្រេង និងលោក បណ្ឌិត ឡៅ ម៉ុងហៃ គម្រោងគាល់ព្រះមហាក្សត្រ ដើម្បីសុំព្រះអង្គកុំឡាយព្រះហត្ថលេខាទទួលស្គាល់ច្បាប់ដ៏ចម្រូងចម្រាសនេះ នៅក្រោយពេលច្បាប់ទាំង៤នេះ ត្រូវបានសភា និងព្រឹទ្ធសភាឯកបក្សអនុម័តនោះ។ ក៏ប៉ុន្តែក្រោយមកក៏ស្រាប់តែមានការលួចថតសំឡេងលោក លឺ ឡាយស្រេង យកមកធ្វើជាភស្តុតាងប្ដឹងផ្ដល់ទៅតុលាការវិញ។ បញ្ហានេះ មានចម្ងល់ជាច្រើនថា តើការលួចថតសំឡេងនិងការប្ដឹងផ្ដល់នេះ ជាការផែនការរបស់រដ្ឋាភិបាល ដើម្បីទប់ស្កាត់ចលនារបស់លោក លឺ ឡាយស្រេង និងលោក ឡៅម៉ុងហៃ កុំឲ្យស្នាមមេដៃគាល់ព្រះមហាក្សត្រ ដើម្បីស្នើសុំព្រះអង្គកុំឡាយព្រះហត្ថលេខាលើច្បាប់ទាំង៤នោះឬយ៉ាងណា?
កន្លងមកព្រះមហាក្សត្រ នរោត្តម សីហមុនី ព្រះអង្គតែងតែចេញទៅក្រៅប្រទេសដើម្បីពិនិត្យព្រះរាជសុខភាព នៅស្របពេលច្បាប់ជ្រើសតាំងតំណាងរាស្ត្រ ត្រូវបានគណបក្សកាន់អំណាចធ្វើវិសោធនកម្មម្ដងជាពីរដងនោះ។ បញ្ហានេះ អ្នកវិភាគលើកឡើងថា ព្រះអង្គទំនងជាមិនពេញព្រះទ័យ និងមិនចង់ចុះហត្ថលេខា ទទួលស្គាល់ការធ្វើវិសោធនកម្មដ៏ចម្រូងចម្រាសនោះ។
លោក លឺ ឡាយស្រេង ប្រកាសថា លោកនឹងធ្វើដំណើរមកដល់សហរដ្ឋអាមេរិកនៅថ្ងៃទី២៦ តុលា ដោយលោកបញ្ជាក់ថា លោកមិនទៅចំណាយពេលឥតប្រយោជន៍ ដើម្បីតតាំងគ្នាជាមួយលោក ហ៊ុន សែន ក្នុងតុលាការកម្ពុជា ដែលលោកហៅថា ជាតេឡេបញ្ជារបស់លោក ហ៊ុន សែន នោះទេ ប៉ុន្តែ បើសិនជា តុលាការនៅកម្ពុជា ជាតុលាការឯករាជ្យ លោកមិនខ្លាចនឹងតតាំងនោះឡើយ៕