អ្នកឃ្លាំមើលផែនការអភិវឌ្ឍសង្គម និងប្រជាពលរដ្ឋខេត្តព្រះសីហនុ កំពុងទន្ទឹងរង់ចាំមើល លទ្ធផលនៃគម្រោងសាងសង់ផ្លូវមានល្បឿនលឿន របស់រាជរដ្ឋាភិបាលកម្ពុជា ចេញពីរាជធានីភ្នំពេញ ឆ្ពោះទៅកាន់ខេត្តព្រះសីហនុ ទន្ទឹមគ្នានេះ ពួកគេក៏ស្នើឲ្យរដ្ឋាភិបាល និងក្រុមហ៊ុន ពន្លឿនការសាងសង់ ហើយត្រូវផ្ដល់សំណងផលប៉ះពាល់ ពីគម្រោងនេះ ជូនប្រជាពលរដ្ឋឲ្យបានសមរម្យ។
មន្ត្រីអង្គការក្រៅរដ្ឋាភិបាលថ្លែងថា គម្រោងសាងសង់ផ្លូវល្បឿនលឿនពីភ្នំពេញ ឆ្ពោះទៅកាន់ខេត្តព្រះសីហនុ របស់រដ្ឋាភិបាល ហាក់មានការយឺតយ៉ាវ ព្រោះតាមការអះអាងកន្លងមក គម្រោងនេះ នឹងផ្ដើមសាងសង់ក្នុងឆ្នាំ២០១៧ ប៉ុន្តែរហូតមកដល់ពេលនេះ រដ្ឋាភិបាល មិនទាន់បង្ហាញលទ្ធផល នៃគម្រោងនេះ ជាសាធារណៈជូនប្រជាពលរដ្ឋ និងផ្នែកពាក់ព័ន្ធអោយបានដឹងនោះទេ។
អ្នកស្រី ជៀប សុធារី មន្ត្រីសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ ឲ្យអាស៊ីសេរី ដឹងតាមទូរស័ព្ទនៅថ្ងៃទី១៧ ខែតុលា ថា គម្រោងស្ថាបនាផ្លូវល្បឿនលឿននេះ រដ្ឋាភិបាលគួរមានការសិក្សាពីផលប៉ះពាល់ជាមួយពលរដ្ឋ ឲ្យបានត្រឹមត្រូវជាមុន ហើយផ្លូវថ្មីត្រូវឲ្យមានគុណភាព ព្រោះតាមការកត់សម្គាល់គម្រោងសាងសង់ស្ពាន និងផ្លូវមួយចំនួន របស់ក្រុមហ៊ុនចិនហាក់ពុំសូវមានគុណភាពទេកន្លងមក។
អ្នកស្រី សុធារី ថា គេមិនទាន់ឃើញគម្រោងនេះលេចចេញជារូបរាងនៅឡើយ។
កាលពីថ្ងៃទី១៤ ខែតុលា ឆ្នាំ២០១៦ ក្រសួងសាធារណការ និងដឹកជញ្ជូន បានចុះកិច្ចព្រមព្រៀងជាមួយក្រុមហ៊ុនចិន លើគម្រោងសាងសង់ និងជួសជុលផ្លូវ ស្ពានសំខាន់ៗចំនួន៣ខ្សែ មានតម្លៃសរុបជិត ២ពាន់លានដុល្លារសហរដ្ឋអាមេរិក។ គម្រោងទាំងនេះ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងប្រាប់អ្នកកាសែតថា ចាប់ផ្ដើមដំណើរការសាងសង់នៅឆ្នាំ២០១៧នេះ រួមមាន៖ ផ្លូវល្បឿនលឿនពីភ្នំពេញ ឆ្ពោះទៅកាន់ខេត្តព្រះសីហនុ ស្ពានឆ្លងទន្លេមេគង្គ ភ្ជាប់ពីស្រុកក្រូចឆ្មារ ទៅស្រុកស្ទឹងត្រង់ ខេត្តកំពង់ចាម និងការសាងសង់ផ្លូវជាតិលេខ១១ ពីអ្នកលឿងខេត្តព្រៃវែង ទៅថ្នល់ទទឹងខេត្តកំពង់ចាម។
នៅពេលនោះលោក ស៊ុន ចាន់ថុល ឲ្យដឹងថា គម្រោងសាងសង់ផ្លូវជាតិលេខ១១ និងស្ពានស្ទឹងត្រង់-ក្រូចឆ្មារ ធ្វើឡើងដោយប្រាក់កម្ចីសម្បទាន របស់ប្រទេសចិន និងប្រាក់បដិភាគ របស់រដ្ឋាភិបាល ៥ភាគរយ ប៉ុន្តែសម្រាប់ផ្លូវល្បឿនលឿនចេញពីភ្នំពេញ ទៅខេត្តព្រះសីហនុ ត្រូវចំណាយថវិកាសាងសង់ ដោយប្រាក់កម្ចី របស់ប្រទេសចិនទាំងស្រុងតែម្ដង។
ប្រជាពលរដ្ឋមួយចំនួនរស់នៅខេត្តព្រះសីហនុ បានស្វាគមន៍ និងចាត់ទុកគម្រោងសាងសង់ផ្លូវល្បឿនលឿន របស់រដ្ឋាភិបាល ចេញពីរាជធានីភ្នំពេញ ឆ្ពោះទៅខេត្តព្រះសីហនុ ថា អាចជួយកាត់បន្ថយចរាចរណ៍កកស្ទះ និងកាត់បន្ថយអត្រាគ្រោះថ្នាក់ចរាចរណ៍នាមូលដ្ឋាននេះ ឲ្យថយចុះចំនួននាថ្ងៃអនាគត។ ទន្ទឹមគ្នានេះ ពួកគេ ក៏ស្នើឲ្យគម្រោងសាងសង់ផ្លូវលឿននេះ ចេញជារូបរាងឲ្យបានឆាប់។
ការស្ថាបនាផ្លូវល្បឿនលឿននេះ លោក ស៊ុន ចាន់ថុល រដ្ឋមន្ត្រីក្រសួងសាធារណការ ឲ្យដឹងថា ត្រូវចំណាយថវិកាអស់ប្រមាណ ១ពាន់ ៩០០លានដុល្លារអាមេរិក៕