ថ្ងៃនេះខួបគម្រប់ ៥ឆ្នាំនៃថ្ងៃសោយទិវង្គតរបស់ព្រះបរមរតនកោដ្ឋ ព្រះបាទ នរោត្តម សីហនុ។ ព្រះមហាក្សត្រ និងសម្ដេចម៉ែ ប្រារព្ធព្រះរាជពិធីនៅក្នុងព្រះបរមរាជវាំង ដោយមានការចូលរួមពីមន្ត្រីធំៗមួយចំនួន។ ចំណែកក្រុមពលរដ្ឋស្នើទៅរដ្ឋាភិបាលឲ្យរៀបចំពីធីសាសនា នៅមុខព្រះបរមរាជវាំងឲ្យពិធីរាប់បាត្រ និងសូត្រធម៌ជាដើម ខណៈនៅមុខព្រះរាជវាំងមិនបានរៀបចំពិធីសាសនានោះ។
ចាប់តាំងពីព្រឹកព្រលឹមស្រាងៗ មកក្រុមសព្វមុខមន្ត្រីតាមក្រសួងស្ថាប័ននាំគ្នាដាក់កម្រងផ្កា នៅមុខព្រះបរមរូបព្រះបរមរតកោដ្ឋ ព្រះបាទ នរោត្តម សីហនុ ក្នុងបវិវេណ សួនច្បារវិមានឯករាជ្យ ព្រោះថ្ងៃទី១៥ ខែតុលា នេះ ជាខួបគម្រប់ ៥ឆ្នាំ នៃថ្ងៃសោយទិវង្គតរបស់ព្រះអង្គ។ តំណាលគ្នានេះសំឡេងត្រែក៏លាន់លឺទ្រហឹងពេញទីធ្លានោះដែរ។
ពិធីនេះមិនឃើញមានការចូលរួមលោកនាយករដ្ឋមន្ត្រី ហ៊ុន សែន និងមន្ត្រីកំពូលមកដាក់កម្រងផ្កាទេនៅព្រះបរមរូបទេ។ ប៉ុន្តែ លោក ហ៊ុន សែន សរសេរនៅលើហ្វេសប៊ុក (Facebook) របស់លោកដោយបួងសួងឲ្យកម្ពុជាមានសុខសន្តិភាព និងរីកចម្រើន។
ដោយឡែក ពលរដ្ឋជាអ្នកលក់ដូរនៅខេត្តកំពង់ធំ លោកស្រី ធាវី បានស្កាត់មកដាក់កម្រងផ្កានៅមុខព្រះបរមរូបក្នុងក្រុងភ្នំពេញ និយាយថា សព្វថ្ងៃនេះពលរដ្ឋមានលំបាកច្រើន គឺបញ្ហាជីវភាពជាងនេះទៅទៀត អ្នកនយោបាយឈ្លោះទាស់ទែងគ្នា។ ពលរដ្ឋរូបនេះស្នើទៅអ្នកនយោបាយគ្រប់គណបក្សត្រូវចេះសាមគ្គីជួយជាតិ និងជួយពលរដ្ឋ ឲ្យដូចសម្ដេច សីហនុ បានធ្វើកាលពីទ្រង់នៅព្រះជន្ម។
ពលរដ្ឋម្នាក់ លោក ដាង ច័ន្ទវុត្ថា ដែលបានមកដាក់ផ្កាគោរពព្រះវិញ្ញាណក្ខន្ធព្រះបរមរតនកោដ្ឋ ព្រះបាទសម្ដេច នរោត្តម សីហនុ ប្រាប់ថា រយៈពេល៥ឆ្នាំ នៃសោយទិវង្គត សម្តេច សីហនុ កន្លងទៅនេះ លោកស្រីនៅតែស្លាយអាល័យអាឡោះ ព្រះអង្គព្រោះជាក្សត្រល្អ និងជាអ្នកដឹកនាំប្រទេសធ្វើឲ្យមានការរីកចំរើបគ្រប់វិស័យ។ ពលរដ្ឋរូបនេះយល់ថា រដ្ឋាភិបាលគួររៀបចំខួបគម្រប់ ៥ឆ្នាំ នៃថ្ងៃសោយទិវង្គតរបស់ព្រះអង្គ ឲ្យបានអធិកអធមយ៉ាងនេះ ជាពិសេសគួរមានពិធីរាប់បាត្រព្រះសង្ឃរាប់ពាន់អង្គនៅមុខព្រះបរមរាជរាំង។
វិបត្តិនយោបាយនៅកម្ពុជាកាន់តែអាក្រក់ទៅៗ ពីមួយថ្ងៃទៅមួយថ្ងៃ ខណៈរដ្ឋាភិបាលរបស់លោក ហ៊ុន សែន មានផែនការរំលាយគណបក្សប្រឆាំងចោល។ សហគមន៍អន្តរជាតិប្រឆាំងនឹងទង្វើរបស់រដ្ឋាភិបាលលោក ហ៊ុន សែន បញ្ឈប់ផែនការរំលាយបក្សប្រឆាំង ដោះលែង លោក កឹម សុខា ប្រធានគណបក្សសង្គ្រោះជាតិ និងអនុញ្ញាតឲ្យសង្គមស៊ីវិល និងប្រព័ន្ធផ្សព្វផ្សាយឯករាជ្យ អាចបន្តការងាររបស់ខ្លួនជាធម្មតាឡើងវិញ។
ក្រៅពីពលរដ្ឋបង្ហាញការគោរពស្រលាញ់ របស់អង្គព្រះមហាវីរក្សត្រ ព្រះសង្ឃមួយអង្គគង់នៅវត្តស្ទឹងមានជ័យ ព្រះតេជព្រះគុណ អ៊ិន ពុទ្ធី មានថេរដីកាស្នើទៅព្រះមហាក្សត្រ ព្រះបាទ សម្ដេច នរោត្តម សីហមុនី ចេញព្រះភ័ក្ត្រអន្តរាគមន៍ដោះស្រាយវិបត្តិនយោបាយនៅពេលនេះ។ ព្រះតេជព្រះគុណបន្តថា បើគ្មានការអន្តរាគមន៍ពីព្រះមហាក្សត្រទេ លទ្ធិប្រជាធិបតេយ្យនៅប្រទេសកម្ពុជានឹងបាត់បង់ក្រោយការបាត់បង់គណបក្សសង្គ្រោះជាតិពីកម្ពុជា។
ក្រៅពីមានស្នាមព្រះហស្តក្នុងដឹកនាំជាតិមានការរីកចំរើនស្ទើរគ្រប់វិស័យ មហាជនទូទៅចាត់ទុកព្រះសម្ដេច នរោត្តម សីហនុ ថា ជាក្សត្របង្រួបបង្រួមជាតិ ផ្សះផ្សាជាតិ។ ព្រះបាទសម្ដេច នរោត្ដម សីហនុ បានសោយទិវង្គតកាលពីថ្ងៃទី១៥ ខែតុលា ឆ្នាំ២០១២ នាទីក្រុងប៉េកាំង ប្រទេសចិន ដោយរោគគាំងបេះដូង ក្នុងព្រះជន្ម ៩០ព្រះវស្សា៕