ជំទប់ទី២ ឃុំពងទឹក ស្រុករំដួល ខែត្រស្វាយរៀង ចោទមេឃុំមកពីបក្សកាន់អំណាចថា បានបញ្ចុះបញ្ចូលឲ្យលោកចូលជាមួយបក្សកាន់អំណាច ដើម្បីរក្សាអាសនៈឃុំនេះ ស្របពេលដែលគណបក្សសង្គ្រោះជាតិអាចនឹងត្រូវរលាយឆាប់ៗខាងមុខ។ ចំណែកមេឃុំពងទឹក ទទួលស្គាល់ថា លោកពិតជាបានបញ្ចុះបញ្ចូលមែនដោយសារមានបញ្ជាពីថ្នាក់លើ។
មន្ត្រីគណបក្សសង្គ្រោះជាតិ ខែត្រស្វាយរៀង ចាត់ទុកការបញ្ចុះបញ្ចូល របស់អាជ្ញាធរមូលដ្ឋាន ឲ្យចូលរួមជាមួយបក្សកាន់អំណាចថា ថា ជាទម្រង់គំរាមកំហែងផ្នែកនយោបាយ និងផ្ទុយពីក្របខ័ណ្ឌច្បាប់។
ជំទប់ទី២ ឃុំពងទឹក ស្រុករំដួល ខែត្រស្វាយរៀង លោក នូ ឡុន ឲ្យដឹងនៅថ្ងៃទី១២ តុលា ថា មេឃុំពងទឹក លោក ស៊ិន ស៊ីមន បានព្យាយាមលួងលោមលោក ឲ្យចូលជាមួយបក្សកាន់អំណាច ដើម្បីអនាគតប្រពន្ធកូន និងតួនាទីតំណែង ស្របពេលដែលមន្ត្រីបក្សប្រឆាំងមួយចំនួនធំ បានរត់ទៅក្រៅប្រទេសអស់ ហើយគណបក្សសង្គ្រោះជាតិ អាចនឹងត្រូវរំលាយនៅពេលឆាប់ៗ។ ចំណែកឯ អាសនៈរបស់អាជ្ញាធរឃុំទាំងអស់ កូតាពីបក្សសង្គ្រោះជាតិ ក៏អាចត្រូវរលាយដែរ។ លើសពីនេះ បើមន្ត្រីបក្សសង្គ្រោះជាតិចូលរួមជាមួយបក្សកាន់អំណាច គេនឹងរក្សាតំណែង និងប្រាក់ខែឲ្យនៅដដែល។ លោកប្ដេជ្ញាថា ទោះបីមានការបញ្ចុះបញ្ចូលយ៉ាងណាក្តី លោកមិនយល់ព្រមដាច់ខាត ព្រោះតួនាទី និង អាសនៈរបស់លោក គាំទ្រដោយពលរដ្ឋ៖ «មកចូលជាមួយបក្សប្រជាជនទៅ ដើម្បីគេទុកតួនាទី និងមុខដំណែងឲ្យ ឲ្យនៅធ្វើការវិញ។ ខ្ញុំបានសួរគេវិញថា ចុះបើខ្ញុំមិនចូល តើមានបញ្ហាអីកើតឡើងទេ?»។
ឆ្លើយតបការចោទប្រកាន់នេះ មេឃុំពងទឹក លោក ស៊ិន ស៊ីមន ទទួលស្គាល់ថា លោកពិតជាបានបញ្ជុះបញ្ចូលជំទប់ទី ២ មកពីបក្សប្រឆាំងឲ្យចូលជាមួយបក្សកាន់អំណាចមែន ហើយករណីនេះក៏មានការសហការជាមួយថ្នាក់លើដែរ។ លើសពីនេះ បក្សសង្គ្រោះជាតិ នឹងរំលាយឆាប់ៗទៀតផង។ ហេតុនេះអាសនៈបក្សនេះនៅឃុំនេះក៏នឹងត្រូវរលាយអស់ដែរ៖ «ពុំមែនជាខ្ញុំនឹកឃើញទេ មានការសហការពីថ្នាក់លើដែរ សហការពីថ្នាក់លើថា ឲ្យនិយាយគ្នា»។
ប្រធានប្រតិបត្តិគណបក្សសង្គ្រោះជាតិ ខែត្រស្វាយរៀង លោក ម៉ៅ វិបុល កត់សម្គាល់ថា ពុំមែនតែឃុំពងទឹកទេ ដែលមានការលួងលោកបែបនេះកើតឡើង នៅឃុំសង្កែ ស្រុករំដួល ក៏មានសេចក្តីរាយការណ៍ថា មានការបញ្ចុះបញ្ចូលដូចគ្នានេះដែរ។ លោកអំពាវនាវឲ្យអាជ្ញាធរមូលដ្ឋានបក្សកាន់អំណាច បញ្ឈប់សកម្មភាពនេះជាបន្ទាន់ ដែលលោកចាត់ទុកថា ជាការបំភិតបំភ័យផ្នែកនយោបាយដល់មន្ត្រីមូលដ្ឋានបក្សសង្គ្រោះជាតិ៖ «បើយើងពិតជាពលរដ្ឋស្រឡាញ់មែនខ្លាចអី បើដឹកនាំ ៣០ ទៅ ៤០ ឆ្នាំពលរដ្ឋស្គាល់ច្បាស់ហើយ អ៊ីចឹងធ្វើយ៉ាងសូមស្ងប់ស្ងាត់ និងបោះឆ្នោតដោយសេរី ត្រឹមត្រូវ និងយុត្តិធម៌ ឲ្យទទួលយកទាំងអស់គ្នាផង»។
មន្ត្រីអង្កេតជាន់ខ្ពស់នៃអង្គការខុមហ្វ្រែល (Comfrel) លោក កន សាវាង្ស យល់ថា ការបញ្ចុះបញ្ចូលមានពីរយ៉ាង គឺការបង្ខំ និងការស្ម័គ្រចិត្ត តែប្រសិនជាការបញ្ចុះបញ្ចូលដោយបង្ខំ និងមានលក្ខខណ្ឌផ្សេងៗ គឺជារឿងមិនត្រឹមត្រូវ និងជាសញ្ញាគំរាមកំហែង ផ្ទុយពីច្បាប់។ លោកបញ្ជាក់ថា ការបញ្ចុះបញ្ចូល ដោយលើកយកបញ្ហាផ្សេងៗ គឺពុំមែនជាការបញ្ចុះបញ្ចូលមានលក្ខណៈត្រឹមត្រូវទេ ផ្ទុយទៅវិញគឺជាករណីបំភិតបំភ័យ៖ «កាលណាលើកយកអ្នកឯងមិនទៅទេ អ្នកឯងត្រូវរលាយ ត្រូវគេដុតផ្ទះ ឬអ្នកឯងត្រូវឈរជើងផ្សេងៗតាម ជាមធ្យោបាយណាមួយដែលបំភិតបំភ័យគេដើម្បីឲ្យគេចេញពីគណបក្សនោះ ឲ្យចូលបក្សខ្លួនឯង អាហ្នឹងវាចូលបំភិតបំភ័យហើយ ពុំមែនជាករណីស្រុះស្រូលទេ»។
លោក កន សាវាង្ស បន្ថែមថា រហូតមកទល់ពេលនេះមិនទាន់មានភស្តុតាងណាមួយបញ្ជាក់ គណបក្សសង្គ្រោះជាតិត្រូវរំលាយនោះទេ ព្រោះការរំលាយគណបក្សនីមួយៗ ពុំមែនគ្រាន់តែនិយាយស្ដីនោះទេ វាឋិតលើការចោទប្រកាន់តាមផ្លូវតុលាការផ្អែកតាមអង្គហេតុ និងក្របខ័ណ្ឌច្បាប់កំណត់។ លើសពីនេះ បើសិនជាតុលាការរកឃើញថា ប្រធានគណបក្សមានទោស ក៏គេអាចដោះដូរក្បាលម៉ាស៊ីនដែរ៕