Clik here to view.
គ្រួសារខ្មែរដែលជនជាតិវៀតណាម ព្រួតវាយសម្លាប់ នៅឃុំអ្នកលឿង ស្រុកពាមរក៏ ខេត្តព្រៃវែង អំពាវនាវឲ្យតុលាការពន្លឿននីតិវិធី ខណៈសំណុំរឿងនេះ បានអូសបន្លាយជាងមួយឆ្នាំទៅហើយ ដោយសារតែតុលាការចេះតែពន្យារពេល មិនចាត់ការតាមនីតិវិធី។ មន្ត្រីអង្គការសិទ្ធិមនុស្សលើក ឡើងថា តុលាការគួរតែពន្លឿននីតិវិធីតាមការស្នើសុំរបស់ជនរងគ្រោះ ព្រោះពួកគេកំពុងមានវិបត្តិ ផ្លូវចិត្ត និងវិបត្តិសេដ្ឋកិច្ចគ្រួសារធ្ងន់ធ្ងរ។
សំណុំរឿងជនជាតិវៀតណាម ព្រួតគ្នាវាយសម្លាប់បុរសជាជនជាតិខ្មែរម្នាក់ នៅភូមិអ្នកលឿងក្រោម ឃុំអ្នកលឿង ជាប់នឹងភូមិ៦ ឃុំព្រែកខ្សាយខ ស្រុកពាមរក៏ ខេត្តព្រៃវែងនោះ បានអូសបន្លាយពេល ជាងមួយឆ្នាំទៅហើយ។ គ្រួសារជនរងគ្រោះ អះអាងថា តុលាការ ហាក់ទុកសំណុំរឿងនេះ ចោល ដោយមិនចាត់ការឲ្យលឿនទៅមុខសោះ ខណៈពួកគាត់ កំពុងរស់រងទុក្ខវេទនា និងទន្ទឹងចាំយុត្តិធម៌។
ភរិយាជនរងគ្រោះ អ្នកស្រី ចាន់ ស៊ីណា រៀបរាប់ថា សំណុំរឿងឃាតកម្មដ៏ឃោរឃៅដែលប្រព្រឹត្ត ដោយជនជាតិ01វៀតណាម លើប្ដីអ្នកស្រីនេះ គឺតុលាការបានកោះហៅអ្នកស្រីអោយទៅជួបតែម្ដងគត់ កាលពីពេលថ្មីៗនេះ ប៉ុន្តែតុលាការគ្រាន់តែប្រាប់ថា សំណុំរឿងនេះត្រូវពន្យារពេល ហើយតុលាការក៏មិនបានបញ្ជាក់ថា នឹងចាប់ផ្ដើមជំនុំជម្រះនៅពេលណានោះឡើយ៖ «គេ (តុលាការ) គ្រាន់តែប្រាប់យើងថា លើកថ្ងៃមួយមាត់គត់ ហើយគេអោយយើង ត្រឡប់មកផ្ទះវិញ។ ខ្ញុំភ័យខ្លាចតែគេអត់កាត់ក្ដី។ សូមអោយតុលាការកាត់ក្ដីឲ្យលឿនៗទៅ ដើម្បីបានសំណងខ្លះយកមករកស៊ីនៅតាមខេត្តផ្សេងៗ ដូចជាទៅសៀមរាបអីអញ្ចឹង ព្រោះខ្ញុំមិនចង់នៅអ្នកលឿង ដោយសារនៅអ្នកលឿងពិបាករកស៊ីណាស់»។
អ្នកស្រី ចាន់ ស៊ីណា ប្ដឹងទាមទារឲ្យអាជ្ញាធរ និងតុលាការបន្តចាប់ខ្លួនអ្នកពាក់ព័ន្ធដទៃទៀត និងស្នើ ឲ្យពន្លឿននីតិវិធីលើសំណុំរឿងនេះ។ អ្នកស្រីប្ដឹងទាមទារសំណងចំនួន ៣០លានរៀល និងឲ្យ តុលាការផ្ដន្ទាទោសជនល្មើសតាមច្បាប់។
ជនរងគ្រោះដែលជនជាតិវៀតណាម ព្រួតវាយសម្លាប់មានឈ្មោះ រ័ត្ន ធី អាយុ ៣៣ឆ្នាំ។ ភរិយាជន រងគ្រោះ រៀបរាប់ថា កាលពីយប់ថ្ងៃទី៧ ខែសីហា ឆ្នាំ២០១៦ ប្ដីអ្នកស្រី បានដើរទៅទិញបារីនៅតូប លក់ដូរក្បែរផ្ទះ។ពេលនោះ ជនជាតិវៀតណាមម្នាក់ បានសម្លុតទារបារី តែប្ដីអ្នកស្រីមិនឲ្យ ក៏កើតជាទំនាស់ពាក្យសម្ដីរហូតឈានដល់ផ្ទុះហិង្សាកាន់តែធំ ដោយមានជនជាតិវៀតណាមលើសពី២០ នាក់ ប្រដាប់ដោយដំបង ឈើមូល ឈើជ្រុង ដែកគាស់ និងកាំបិត ចូលរួមព្រួតវាយប្ដីអ្នកស្រីរហូត ដល់ស្លាប់ និងមានបំណងសម្លាប់អ្នកស្រី និងពលរដ្ឋខ្មែរណាដែលហ៊ានចូលជួយទៀតផង។
ក្នុងសំណុំរឿងនេះ ចៅក្រមស៊ើបសួរនៃសាលាដំបូងខេត្តព្រៃវែង បានចោទប្រកាន់មនុស្ស៧នាក់ តាមមាត្រា២២៤ នៃក្រមព្រហ្មទណ្ឌ ក្នុងបទចោទស្ថានទម្ងន់ទោស ដោយសារមរណភាពនៃជន រងគ្រោះ ដែលនឹងជាប់ពន្ធនាគារពី ៧ឆ្នាំ ទៅ ១៥ឆ្នាំ និងមាត្រា២៩ នៃច្បាប់ អន្តោប្រវេសន៍ពីបទ ចូលក្នុងប្រទេសកម្ពុជាដោយគ្មានការអនុញ្ញាត។ ក្នុងចំណោមជនជាប់ចោទទាំង៧នាក់នោះ មាន ម្នាក់ឈ្មោះវៀន យ៉ាងស៊ុយ ជាជនជាតិវៀតណាម គឺតុលាការកំពុងតាមចាប់ខ្លួន ហើយម្នាក់ឈ្មោះ តូ យ៉ាងហុក ត្រូវបានដោះលែងវិញ។ បច្ចុប្បន្ននេះ នៅមានជនជាប់ចោទ៥នាក់ទៀត កំពុងឃុំខ្លួន ក្នុងពន្ធនាការ រួមមានទី១ឈ្មោះ វៀន យ៉ាងកង ទី២ ឈ្មោះវៀន យ៉ាងងឿ ទី៣ ឈ្មោះ ឡាំ យ៉ាងសៀង ទី៤ឈ្មោះ វីរៈ ដែន និងទី៥ ឈ្មោះ ជិន បារាំង។
មន្ត្រីសម្របសម្រួលសមាគមអាដហុក (adhoc) ប្រចាំខេត្តព្រៃវែង អ្នកស្រី អ៊ាង គឹមលី មានប្រ សាសន៍ថា ករណីជនជាតិវៀតណាម ព្រួតវាយលើពលរដ្ឋកម្ពុជានេះ គឺបទឧក្រិដ្ឋធ្ងន់ធ្ងរដែលទាម ទារឲ្យអាជ្ញាធរក៏ដូចជាតុលាការ ត្រូវតែចាត់វិធានការឲ្យម៉ឺងម៉ាត់ និងបន្ទាន់ដើម្បីស្វែងរកយុត្តិធម៌ ជូនជនរងគ្រោះ៖ «តុលាការគួរតែពន្លឿនឲ្យជនរងគ្រោះទទួលបាននូវភាពយុត្តិធម៌។ កាត់ទោសឲ្យ ជនប្រព្រឹត្ត បានទទួលទោសតាមច្បាប់ហើយគាត់ក៏ទទួលបានសំណងដែរ ដើម្បីដោះស្រាយជីវភាពគ្រួសាររបស់គាត់ ព្រោះថា គាត់បានបាត់បង់សសររឹងមាំនៅក្នុងគ្រួសារ ដែលធ្វើឲ្យគ្រួសាររបស់គាត់ ក្រីក្រ»។
សព្វថ្ងៃ អ្នកស្រី ចាន់ ស៊ីណា កំពុងរស់នៅចិញ្ចឹមកូន ៦នាក់ ដោយកូនប្រុសពៅ អាយុទើបបាន ១ឆ្នាំ។ ជីវភាពអ្នកស្រីកាន់តែធ្លាក់ដុនដាប បន្ទាប់ពីស្វាមីស្លាប់ទៅ។ អ្នកជិតខាងផ្ទះជនរងគ្រោះ សុទ្ធតែ បង្ហាញក្ដី អាណិតអាសូរចំពោះស្ត្រីមេម៉ាយម្នាក់នេះ ដែលខិតខំតស៊ូទាំងត្រដាបត្រដួស។ ពួកគេថា តុលាការគួរតែចាត់វិធានការឲ្យបានលឿន និងមានយុត្តិធម៌ពេញលេញ ដើម្បីបន្សាបការឈឺចាប់ ផ្លូវចិត្តរបស់គ្រួសារជនរងគ្រោះ៕