ព្រះរាជអាជ្ញាសាលាដំបូងខេត្តរតនគិរី លោក ជា ពេជ្រ សម្រេចចោទប្រកាន់ អតីតអ្នកកាសែត ឌឹ ខេមបូឌា ដេលី (The Cambodia Daily) ចំនួន២នាក់ ពីបទញុះញង់ កាលពីចុងខែសីហា។
មេធាវីការពារក្តីឲ្យអ្នកកាសែតទាំងពីរនាក់នោះ គឺលោក សេក សោភណ្ឌ ត្រូវបានវិទ្យុសំឡេងប្រជាធិបតេយ្យ (VOD) ដកស្រង់សម្ដីកាលពីចុងសប្ដាហ៍នេះថា កូនក្តីរបស់លោកត្រូវបានចោទប្រកាន់ ពីបទញុះញង់ ឲ្យប្រព្រឹត្តបទឧក្រិដ្ឋ តាមមាត្រាទី៤៩៤ និង៤៩៥ នៃក្រមព្រហ្មទណ្ឌ តាំងពីថ្ងៃទី២៨ ខែសីហា ដោយមិនបានជូនដំណឹងមកកាន់មេធាវីនោះទេ។ លោកបន្តថា ការចោទប្រកាន់កូនក្តីលោកនេះ គឺធ្វើឡើងដោយគ្មានមូលដ្នាន។
កាសែតក្នុងស្រុក វីអូឌី បានផ្សាយថា អតីតអ្នកកាសែត ខេមបូឌា ដេលី ចំនួន២រូបនោះ គឺលោក ស័មប័រ ភីធ័រ (Zsombor Peter) និងលោក អូន ភាព កាលពី៥ខែមុន បានចុះសម្ភាសន៍ពលរដ្ឋក្នុងឃុំប៉ាតេ ស្រុកអូរយ៉ាដាវ ខេត្តរតនគិរី ជុំវិញការបោះឆ្នោតក្រុមប្រឹក្សាឃុំសង្កាត់។ លោក អូន ភាព ប្រាប់វិទ្យុVOD ថា លោកមិនបានដឹងពីការសម្រេចចោទប្រកាន់របស់តុលាការនៅឡើយទេ ប៉ុន្តែលោកថា ប្រសិនជាតុលាការសម្រេចបែបនេះមែន វាជារឿងអយុត្តិធម៌សម្រាប់រូបលោក៕
