Clik here to view.
គណៈកម្មាធិការជាតិរៀបចំការបោះឆ្នោត (គ.ជ.ប) ឱ្យដឹងថា ពលរដ្ឋខ្មែរជាង ២៧ម៉ឺន ៦ពាន់នាក់ ស្មើនឹងជាង ១៦ភាគរយ បានទៅចុះឈ្មោះបោះឆ្នោត ខណៈពលរដ្ឋចំនួនជាង ២ពាន់ ២រយនាក់ ត្រូវបានលុបឈ្មោះចេញពីបញ្ជីឆ្នាំ២០១៧ និងពលរដ្ឋជាង២ពាន់ ៤រយនាក់ កែតម្រូវឈ្មោះ ក្នុងរយៈពេល៣១ថ្ងៃកន្លងមក។
គ.ជ.ប ឱ្យដឹងថា តាមការប៉ាន់ស្មានពលរដ្ឋខ្មែរ ដែលត្រូវទៅចុះបោះឆ្នោត ក្នុងបញ្ជីចុះឈ្មោះបោះឆ្នោតថ្មីឆ្នាំ២០១៧ មានចំនួនជាង១លាន ៦សែននាក់ ខណៈប្រជាពលរដ្ឋខ្មែរ ដែលមានអាយុចាប់ពី១៨ឆ្នាំឡើងទៅ ត្រូវបានប៉ាន់ស្មានថា មានចំនួនជាង ៩លាន ៨សែននាក់។ ការចុះឈ្មោះបោះឆ្នោតសកល នឹងត្រូវបិទបញ្ចប់នៅថ្ងៃទី០៩ ខែវិច្ឆិកា ឆ្នាំ២០១៧។
ជាមួយគ្នានេះដែរ គ.ជ.ប នៅថ្ងៃសុក្រ ទី០៦ ខែតុលា ខាងមុខនេះ នឹងរៀបចំកិច្ចប្រជុំផ្សព្វផ្សាយការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ ស្ដីពីបណ្ដឹងទាក់ទងនឹងបញ្ជីបោះឆ្នោតដំបូង នីតិវិធីនៃការសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ និងបណ្ដឹងទាក់ទងនឹងការចុះបញ្ជីគណបក្សនយោបាយឈរឈ្មោះបោះឆ្នោត ខណៈការចុះឈ្មោះបោះឆ្នោតអសកល នឹងចាប់ផ្ដើមពីថ្ងៃទី១៩ ខែតុលា ដល់ថ្ងៃទី០១ ខែវិច្ឆិកា ឆ្នាំ២០១៧។
ចំណែកការបោះឆ្នោតជ្រើសរើសព្រឹទ្ធសភា នឹងប្រព្រឹត្តទៅនៅថ្ងៃទី១៤ ខែមករា ឆ្នាំ២០១៨ ដោយមានអ្នកបោះឆ្នោតកើនឡើងពី មួយម៉ឺនមួយពាន់បួនរយចិតសិបប្រាំមួយនាក់ ទៅមួយម៉ឺនមួយពាន់ប្រាំមួយរយកៅសិបប្រាំនាក់៕
