ពលខ្មែរ-អាមេរិកាំង និង នៅក្រៅប្រទេស មានបំណងរួមតែមួយ គឺទាមទារឲ្យរដ្ឋាភិបាលលោក ហ៊ុន សែន បញ្ឈប់ការធ្វើទុក្ខបុកម្នេញ លើគណបក្សប្រឆាំង និង ស្តារលទ្ធិប្រជាធិបតេយ្យ សិទ្ធិមនុស្ស សេរីភាពក្នុងបញ្ចេញមតិឡើងវិញ ដើម្បីឲ្យការបោះឆ្នោតជាតិខាងមុខ ប្រព្រឹត្តទៅមានលក្ខណៈសេរី ត្រឹមត្រូវ និង យុត្តិធម៌។ ពួកគាត់ទាមទារ ឲ្យអន្តរជាតិ ដាក់សម្ពាធរដ្ឋាភិបាលកម្ពុជា ទាំងផ្នែកសេដ្ឋកិច្ច និង ការទូត ដើម្បីស្តារស្ថានការណ៍ទាំងនេះ។
ការស្វះស្វែងរកកិច្ចអន្តរាគមន៍ ពីសហរដ្ឋអាមេរិកនេះ ធ្វើឡើងបន្ទាប់ពីក្រុមពលរដ្ឋមើលឃើញ ថារាជរដ្ឋាភិបាលកម្ពុជាកំពុងតែដឹកនាំប្រទេសឆ្ពោះទៅកាន់របបផ្តាច់ការ ដោយបិទនូវសិទ្ធិសេរីភាពធំៗរបស់ពលរដ្ឋខ្លួន។ តាមរយៈញត្តិដែលក្រុមពលរដ្ឋខ្មែរអាមេរិកាំង ជាង ៤០០នាក់ បានដាក់ទៅឲ្យក្រសួងការបរទេសសហរដ្ឋអាមេរិក កាលពីថ្ងៃទី ១៥ ខែកញ្ញាកន្លងទៅនេះ ពលរដ្ឋចង់អោយសហរដ្ឋអាមេរិក ដាក់សម្ពាធទាំងផ្នែកសេដ្ឋកិច្ច និងការទូត ចំពោះរដ្ឋាភិបាលកម្ពុជា ដើម្បីស្តាស្ថានការណ៍ ដែលកំពុងកើតឡើងនាពេលនេះ។ ប្រធានអង្គការសម្ព័ន្ធមិត្តខ្មែរ-អាមេរិកាំង លោក ទូច វិបុល ដែលតំណាងក្រុមអ្នកតវ៉ា ហើយបានប្រគល់ញ្ញត្ដិ ជូនមន្ត្រីក្រសួងការបរទេសអាមេរិក បញ្ជាក់ថាមន្រ្តីជាន់ខ្ពស់អាមេរិក ទទួលបន្ទុកកិច្ចការកម្ពុជា បានប្រាប់លោក ថាគេបានថតរូបនៃហ្វូងបាតុករ និង បញ្ជូលទៅឯកអគ្គរដ្ឋទូតអាមេរិកប្រចាំនៅកម្ពុជា ដើម្បីបានជ្រាប អំពីការតវ៉ារបស់ពលរដ្ឋខ្មែរ-អាមេរិក ដែលសំដែងការមិនពេញចិត្ត ចំពោះរដ្ឋាភិបាលលោក ហ៊ុន សែន។ តំណាងបាតុករដដែល ដែលបានទៅចូលជួបមន្រ្តីអាមេរិក បានបញ្ជាក់បន្ថែមថា មន្រ្តីអាមេរិកថ្លែងអំណរគុណពលរដ្ឋខ្មែរនៅក្រៅប្រទេស ដែលក្រោកឈរឡើង បង្ហាញនូវឆន្ទៈរបស់ខ្លួន ប្រឆាំងនឹងការរំលោភច្បាប់ និង សិទ្ធិមនុស្សនៅកម្ពុជា។ លោកបន្ត ថាតាមមន្រ្តីជាន់ខ្ពស់នៅក្នុងក្រសួងការបរទេស ប្រហែលជានៅចុងខែនេះ នឹងមានច្បាប់មួយចេញពីសភាសហរដ្ឋអាមេរិក ដែលមានការគាំទ្រដោយក្រសួងការបរទេស មានចំណាត់ការទៅលើរដ្ឋាភិបាលរបស់លោក ហ៊ុន សែន ផងដែរ។
លោក ទូច វិបុល បានឡើងធ្វើសេចក្តីថ្លែងការណ៍រួម តំណាងឲ្យសំឡេងពលរដ្ឋ-ខ្មែរនៅទូទាំងពិភពលោក ដែលប្ដេជ្ញា ថានឹងមិនឲ្យកម្ពុជា វិលទៅរកឆ្នាំសូន្យ និង ក្រើនរំលឹកឲ្យអន្តរជាតិកុំភ្លេចកាតព្វកិច្ចរបស់ខ្លួន៖ “ក្នុងខណៈនេះ សហគមន៍អន្តរជាតិ មិនអាចគេចវេស ពីការទទួលខុសត្រូវរបស់ខ្លួនម្តងហើយ ម្តងទៀតបានទេ នៅចំពោះមុខកម្ពុជាកំពុងធ្លាក់ក្នុងរណ្តៅនៃរបបផ្តាច់ការ។ លទ្ធិប្រជាធិបតេយ្យក្រោមរបប ហ៊ុន សែន ទៅមុខមួយជំហាន ថយក្រោយពីរជំហាន ចាប់តាំងពីការបោះឆ្នោត ដែលរៀបចំដោយអ៊ុនតាក់ ក្នុងឆ្នាំ ១៩៩៣”។
ពលរដ្ឋខ្មែរ មកពីរដ្ឋមីនីសូតា មកតវ៉ាប្រឆាំងរដ្ឋាភិបាលលោក ហ៊ុន សែន ដែលលោកស្រីចាត់ទុក ថាជារដ្ឋាភិបាលផ្តាច់ការ មិនគោរពតាមឆន្ទៈប្រជារាស្រ្ត ព្រោះរំលោភគោលការណ៍ លទ្ធិប្រជាធិបតេយ្យសេរីពហុបក្ស។ លោកស្រី វង្ស សុធី បន្តថារដ្ឋាភិបាលមិនគោរពតាមមាគ៌ាច្បាប់ ឲ្យបានត្រឹមត្រូវ ទើបធ្វើឲ្យប៉ះពាល់ដល់សិទ្ធិពលរដ្ឋ និង ការបោះឆ្នោតសេរី ត្រឹមត្រូវ និង យុត្តិធម៌។ លោកស្រី ទាមទារឲ្យផ្តល់សេរីភាព ដល់បក្សម្ខាងទៀត ដើម្បីធ្វើឲ្យលំហប្រជាធិបតេយ្យមានភាពប្រសើរឡើងវិញ៖ “គាត់មិនអាចមានតែម្នាក់គាត់ទេ។ បើសិនគាត់មានតែម្នាក់គាត់ អំណាចផ្តាច់ការហើយ។ យើងចង់ឲ្យដោះលែងលោក កឹម សុខា ដោយសារការចោទប្រកាន់លើគាត់ អត់មានលក្ខណៈ ដែលយើងអាចទទួលយកបានទេ។ ខ្ញុំបានមើលវីដេអូគាត់ដែលគាត់និយាយ។ គាត់និយាយជាលក្ខណៈទូទៅ បើកចំហ នរណាក៏អាចមើលបាន អត់មែនសម្ងាត់ទេ អត់និយាយពីចង់ផ្តួលរំលំរដ្ឋាភិបាលនោះទេ។ គាត់និយាយអំពីគោលការណ៍លទ្ធិប្រជាធិបតេយ្យ”។
ចំណែក ពលរដ្ឋខ្មែរដែលមកពីទីក្រុងឡូវែលឯណោះវិញ ប្រឆាំងដាច់ខាត ការណ៍ដែលរដ្ឋាភិបាល រឹតត្បិតសិទ្ធិសេរីភាពបណ្តាញផ្សព្វផ្សាយ និង អង្គការសង្គមស៊ីវិល។ លោក ថាមានតែសហគមន៍អន្តរជាតិ ជាពិសេសសហរដ្ឋអាមេរិកប៉ុណ្ណោះ ដែលអាចដាក់សម្ពាធ លើរដ្ឋាភិបាលលោក ហ៊ុន សែន ដើម្បីស្តារស្ថានការណ៍ដុនដាប់នេះបាន៖ “បងប្អូនស្នើឲ្យក្រសួងការបរទេស និង រដ្ឋាភិបាលសហរដ្ឋអាមេរិក និង សាកលលោកចាប់អារម្មណ៍រឿងនេះ គឺធ្វើយ៉ាងណាឲ្យកម្ពុជា ឲ្យរដ្ឋាភិបាលលោក ហ៊ុន សែន ដោះលែងលោក កឹម សុខា និង ស្នើឲ្យមានការបោះឆ្នោតសេរី និង យុត្តិធម៌នៅកម្ពុជាឆាប់ៗ”។
អ្នកតវ៉ាម្នាក់ទៀតពីទីក្រុងឡូវែលដែរ អ្នកស្រី ស៊ូស៊ី ឈួន មិនត្រឹមតែចង់ឲ្យសហគមន៍អន្តរជាតិ ដាក់សម្ពាធលើរដ្ឋាភិបាលកម្ពុជាប៉ុណ្ណោះទេ ប៉ុន្តែ លោកស្រីទាមទារឲ្យលោក ហ៊ុន សែន ចុះចេញពីតំណែងឥឡូវនេះ “ពួកខ្ញុំធ្វើដំណើររាប់រយគីឡូ ដើម្បីមកទីនេះ រួមគ្នាទាមទាររកយុត្តិធម៌ជូនប្រទេសកម្ពុជា។ លោក ហ៊ុន សែន យកអាមេរិកជាខ្មាំង ដោយចោទអាមេរិក ថាជាប់ពាក់ព័ន្ធនឹងអំពើក្បត់ជាតិ ក្នុងករណីចោទប្រកាន់លោក កឹម សុខា។ ពួកយើងខ្ញុំទាមទារឲ្យលោក ហ៊ុន សែន បញ្ឈប់ការចោទបែបនេះ និង ទាមទារឲ្យលោក ហ៊ុន សែន ចុះចេញពីអំណាចជាបន្ទាន់។ អាមេរិកាំងជួយលុយទៅស្រុកខ្មែរ ដើម្បីជួយពលរដ្ឋខ្មែរ ប៉ុន្តែ លោក ហ៊ុន សែន និង បក្សពួកនាំគ្នាកេងប្រវ័ញ្ចលុយទាំងនោះ។ យើងខ្ញុំសុំស្នើឲ្យរដ្ឋាភិបាលអាមេរិក ដាក់ទណ្ឌកម្ម កុំឲ្យលោក ហ៊ុន សែន និង មន្រ្តីរបស់គាត់ ជាន់ទឹកដីអាមេរិកឲ្យសោះ”។
ពលរដ្ឋខ្មែរនៅឯទីក្រុងឡុងប៊ិចវិញ ក៍បានប្រមូលផ្តុំគ្នាធ្វើបាតុកម្មជាលើកទីពីរ កាលពីថ្ងៃទី ១៦ ខែ កញ្ញា នៅមុខសាលាក្រុងឡុងប៊ិច ដើម្បីទាមទារឲ្យដោះលែងលោក កឹម សុខា និង សកម្មជននយោបាយដទៃទៀត។ ពួកគាត់ទាមទាររកសេរីភាពជូនពលរដ្ឋខ្មែរ នៅកម្ពុជា៕