Clik here to view.
ខ្សែភាពយន្តខ្នាតធំរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» របស់អ្នកស្រី អេនជេលីណា ជូលី (Angelina Jolie) នឹងត្រូវដាក់បញ្ចូលយកទៅប្រកួតប្រជែងជាខ្សែភាពយន្តបរទេសល្អបំផុត សម្រាប់ដណ្តើមយកពានរង្វាន់ អូស្កា (Osca) ដ៏ល្បីល្បាញរបស់សហរដ្ឋអាមេរិក។
ទស្សនាវដ្ដីកម្សាន្តអនឡាញរបស់អាមេរិកឈ្មោះ ឌែតឡាញ ហូលីវូដ (Deadline Hollywood) ឲ្យដឹងថា គណៈកម្មាធិការកម្ពុជាសម្រាប់ការជ្រើសរើសខ្សែភាពយន្តដើម្បីប្រកួតយកពានរង្វាន់ អូស្កា បានសម្រេចចិត្តជាផ្លូវការជ្រើសរើសយកខ្សែភាពយន្តរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» ដើម្បីយកទៅប្រកួតប្រជែងជាខ្សែភាពយន្តបរទេសល្អបំផុត សម្រាប់ដណ្ដើមយកពានរង្វាន់ អូស្កា នៅឆ្នាំ២០១៨ ខាងមុខនេះ។
នេះជាលើកទីមួយហើយ ដែលចាងហ្វាងអាម៉េរិកាំងល្បីឈ្មោះបោះសំឡេងរូបនេះគឺអ្នកស្រី អេនជេលីណា ជូលី នឹងក្លាយជាអ្នកតំណាងរបស់ប្រទេសកម្ពុជាដើម្បីដណ្ដើមយកពានរង្វាន់ អូស្កា នេះ។ ហើយនេះក៏គឺជាការដាក់បញ្ចូលខ្សែភាពយន្តសម្រាប់យកទៅប្រកួតប្រជែងយកពានរង្វាន់អូស្កាលើកទី ៦ ផងដែរ សម្រាប់ប្រទេសកម្ពុជា។ ខ្សែភាពយន្តចុងក្រោយដែលប្រទេសកម្ពុជា បានជ្រើសរើសយកទៅប្រកួតប្រជែងយកពានរង្វាន់អូស្កា នៃខ្សែភាពយន្តភាសាបរទេសល្អបំផុត គឺ ខ្សែភាពយន្តកម្ពុជា-បារាំងបែបឯកសារ ផលិតក្នុងឆ្នាំ២០១៣ ដោយលោក ប៉ាន់ រិទ្ធី ដែលមានចំណងជើងថា «រូបភាពដែលបាត់បង់» (The Missing Picture)។
ខ្សែភាពយន្តខ្នាតធំរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» ដែលត្រូវបានផលិតសម្រាប់យកទៅចាក់បញ្ចាំងលើបណ្ដាញអនឡាញ ណែតហ្លីក (Netflix) ត្រូវបានដឹកនាំ និងសហនិពន្ធ ដោយអ្នកស្រី អេនជេលីណា ជូលី។ ខ្សែភាពយន្តនេះ រៀបរាប់អំពីដំណើរខ្សែជីវិតរបស់អ្នកនិពន្ធម្នាក់គឺអ្នកស្រី អ៊ឹង លឿង(Ung Loung) ដែលបានហែលឆ្លងកាត់របបវាលពិឃាដសម័យខ្មែរក្រហម។
អ្នកស្រី អេនជេលីណា ជូលី ថ្លែងក្នុងសេចក្តីថ្លែងការណ៍ចេញផ្សាយនៅថ្ងៃទី១៨ ខែកញ្ញា នេះថា ការជ្រើសរើសនេះពិតជាមានអត្ថន័យធំធេងណាស់សម្រាប់អ្នកស្រី និងពលរដ្ឋកម្ពុជា ដែលបានចូលរួមសហការក្នុងការផលិតខ្សែភាពយន្តនេះ។ អ្នកស្រីបន្តថា ការណ៍ដែលអ្នកស្រីបានធ្វើការងារជាមួយសិល្បករ-សិល្បការិនីកម្ពុជា ដើម្បីនាំមកជូននូវរឿងនេះឲ្យពិភពលោកបានដឹង គឺជាបទពិសោធន៍ដ៏អស្ចារ្យ និងប្រកបដោយគុណធម៌មួយ។
ដោយឡែកសម្រាប់អ្នកស្រី អ៊ឹង លឿង វិញ អ្នកស្រីមានប្រសាសន៍ថា នេះជាដំណឹងដែលប្រកបដោយការរំភើបចិត្តមួយ ហើយថា វាជាវិថីដ៏វែងឆ្ងាយមួយសម្រាប់អ្នកស្រី។ អ្នកស្រីថា រឿងរ៉ាវក្នុងខ្សែភាពយន្តនេះ ជាការឆ្លុះបញ្ចាំងអំពីបទពិសោធរបស់ប្រជាជនកម្ពុជារាប់លាននាក់កាលពីសម័យខ្មែរក្រហម។
ស្របពេលដែលមានដំណឹងអំពីការដាក់បញ្ចូលខ្សែភាពយន្ត «មុនដំបូងខ្មែរក្រហមសម្លាប់ប៉ារបស់ខ្ញុំ» នេះ យកទៅប្រកួតប្រជែងយកពានរង្វាន់ អូស្កា នេះ មន្ត្រីនាំពាក្យក្រសួងវប្បធម៌ និងវិចិត្រសិល្បៈ លោក ថៃ នរៈសត្យា ក៏បានព្រមានផងដែរអំពីសកម្មភាពល្មើសច្បាប់នៃការថតចម្លងខ្សែភាពយន្តនេះ យកទៅចាក់ផ្សាយយ៉ាងព្រោងព្រាតនៅលើបណ្ដាញសង្គមហ្វេសប៊ុក។ លោក ថៃ នរៈសត្យា ថា ទង្វើនេះជាទង្វើខុសច្បាប់ ហើយអ្នកប្រព្រឹត្តិអាចនឹងប្រឈមនឹងការផ្តន្ទាទោសស្របតាមច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល៕
