កម្ពុជាស្នើប្រទេសកូរ៉េខាងជើងបញ្ឈប់ការសាកល្បងនុយក្លេអ៊ែរ និងមីស៊ីលគ្រប់ប្រភេទ ដើម្បីការពារសន្តិភាព និងស្ថិរភាពនៅក្នុងឧបទ្វីបកូរ៉េ ខណៈពិភពលោកកំពុងថ្កោលទោសការគំរាមកំហែងពីប្រទេសកុម្មុយនិស្តមួយនេះ។
សេចក្ដីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី១២ កញ្ញា សំដែងការព្រួយបារម្ភយ៉ាងខ្លាំង ចំពោះការសាកល្បងនុយក្លេអ៊ែរ របស់ប្រទេសកូរ៉េខាងជើង រំលងប្រទេសជប៉ុន កាលពីថ្ងៃទី៣ កញ្ញា ឆ្នាំ២០១៧។
ក្រសួងការបរទេសកម្ពុជា ចាត់ទុកការសាកល្បងនុយក្លេអ៊ែរលើកទី៦នេះ ជាការរំលោភជាថ្មីម្ដងទៀត ចំពោះសេចក្ដីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ និងបង្កការគំរាមកំហែងយ៉ាងធ្ងន់ធ្ងរដល់សន្តិភាព សន្តិសុខ និងស្ថិរភាពនៅឧបទ្វីបកូរ៉េ និងនៅក្នុងតំបន់ទាំងមូល ហើយនឹងធ្វើឲ្យធ្ងន់ធ្ងរថែមទៀត ចំពោះស្ថានភាពដែលតឹងតែងស្រាប់ក្នុងឧបទ្វីបនេះ៕