Clik here to view.
អ្នកឃ្លាំមើលការងារអភិវឌ្ឍន៍សង្គម និងប្រជាពលរដ្ឋខេត្តព្រះសីហនុ បង្ហាញអារម្មណ៍សោកស្តាយដែលដីចំណីមាត់បឹង ឬផ្ទៃរងទឹកភ្លៀងនៃបឹងព្រែកទប់ ស្ថិតក្នុងសង្កាត់លេខ៣ ក្រុង-ខេត្តព្រះសីហនុ ដែលរួមតូច។ នៅមុនសកម្មភាពដឹកដីចាក់លុបបឹងរំលោភធ្វើកម្មសិទ្ធិឯកជនពីមន្ត្រីមានអំណាច និងឈ្មួញមានទ្រព្យមួយចំនួន បឹងនេះមានទំហំជាង ២០០ហិកតារ (២៧០ហិកតារ) ប៉ុន្តែបច្ចុប្បន្ននេះ ផ្ទៃបឹងធម្មជាតិទឹកសាបមួយនេះបានរួមតូចនៅសល់ត្រឹមផ្ទៃបឹងជាង ១៦ហិកតារតែប៉ុណ្ណោះ។
ប្រជាពលរដ្ឋរស់នៅខេត្តព្រះសីហនុ អះអាងថា មហិច្ឆតាដឹកដីចាក់លុបរំលោភយកមាត់បឹង ឬផ្ទៃរងទឹកភ្លៀងបឹងព្រែកទប់ធ្វើកម្មសិទ្ធិឯកជនរបស់ឈ្មួញ និងមន្ត្រីមានអំណាចមួយចំនួនកន្លងទៅ ពេលនេះពួកគេបានសម្រេចបំណងហើយ ព្រោះលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ព្រមទាំងរដ្ឋបាលខេត្តព្រះសីហនុ ត្រៀមចេញប័ណ្ណកម្មសិទ្ធិកាន់កាប់ដីនៅជុំវិញបរិវេណបឹងព្រែកទប់នេះ ជូនបុគ្គលឯកជនកាន់កាប់ស្របច្បាប់។
មន្ត្រីអង្គការលីកាដូ (LICADHO) ប្រចាំខេត្តព្រះសីហនុ លោក ស្រេង វ៉ាន់លី បង្ហាញអារម្មណ៍ហួសចិត្តកាលបើបទបញ្ជារបស់លោកនាយករដ្ឋមន្ត្រី ហ៊ុន សែន ដែលបានដាក់បទបញ្ជាឲ្យមន្ត្រីក្រសួងស្ថាប័នពាក់ព័ន្ធក្រោមឱវាទរបស់លោក ត្រូវការពារទ្រព្យសម្បត្តិសាធារណៈរបស់រដ្ឋមានបឹង អូរ ឆ្នេរ ព្រៃកោងកាង ឆ្នេរសមុទ្រ និងធនធានជីវចម្រុះបាតសមុទ្រផ្សេងៗឲ្យបានគង់វង្ស ប៉ុន្តែបែរជាមន្ត្រីក្រោមឱវាទមិនស្តាប់ ឬអនុវត្តតាមនោះទេ។ ផ្ទុយទៅវិញ អ្នកទាំងនោះបន្តធ្វើសកម្មភាពផ្គើនទៅបទបញ្ជារបស់ប្រមុខដឹកនាំថែមទៀត។
លោក វ៉ាន់លី សង្កេតឃើញថា រាល់ថ្ងៃនេះ លោកឃើញមានសកម្មភាពរថយន្តដឹកដីធំៗដឹកដីចាក់លុបចូលផ្ទៃបឹងព្រែកទប់ជាបន្តបន្ទាប់ ទោះបីកន្លងទៅ អតីតអភិបាលខេត្តព្រះសីហនុ លោក សាយ ហាក់ ធ្លាប់បានបញ្ជាឲ្យវាយកម្ទេចចោលសំណង់ផ្ទះវីឡារបស់លោក ខាត់ ប៊ុណ្ណា មន្ត្រីមន្ទីររៀបចំដែនដីខេត្តព្រះសីហនុ ទៅតាមបទបញ្ជាលោកនាយករដ្ឋមន្ត្រី ហ៊ុន សែន ក្តី ក៏ប៉ុន្តែដីចំណីផ្ទះវីឡាដែលត្រូវអាជ្ញាធរវាយកម្ទេចកាលពីពេលមុន ត្រូវបានកាន់កាប់ដោយបុគ្គលផ្សេងៗទៅវិញ។
មន្ត្រីសង្គមស៊ីវិលរូបនេះស្នើដល់លោកនាយករដ្ឋមន្ត្រី ហ៊ុន សែន ត្រូវនិរាករណ៍រាល់ប័ណ្ណកម្មសិទ្ធិទាំងឡាយណាដែលបុគ្គលឯកជនប៉ងរំលោភយកដីចំណីមាត់បឹង ឬផ្ទៃរងទឹកភ្លៀងបឹងព្រែកទប់កន្លងទៅយកមកដាក់ជាសម្បត្តិរដ្ឋគ្រប់គ្រងវិញ។
មន្ត្រីអង្គការលីកាដូ (LICADHO) ខេត្តព្រះសីហនុ បង្ហាញការសោកស្តាយ និងហួសចិត្តដែលមកដល់ពេលនេះទៅហើយ មិនគួរលោកនាយករដ្ឋមន្ត្រី ហ៊ុន សែន ទុកបណ្តោយឲ្យបុគ្គលមានអំណាច និងឈ្មួញមានទ្រព្យមួយចំនួនតូចដែលកន្លងទៅបានប៉ុនប៉ងឃុបឃិតរំលោភយកដីចំណីមាត់បឹងនោះធ្វើកម្មសិទ្ធិ អាចសម្រេចមហិច្ឆតាពួកគេនោះទេ៖ «សូមឲ្យការអភិវឌ្ឍហ្នឹងឲ្យបានចំណេញទាំងអស់គ្នា កុំឲ្យកាត់ឆ្វៀលដីបឹងត្រឹមតែ ១៦,៣០ហិកតារហ្នឹងជាសម្បត្តិរបស់រដ្ឋ ហើយនៅសល់ច្រើនហិកតារទៀតហ្នឹងមានការកាត់ធ្វើប្លង់កម្មសិទ្ធិ ដើម្បីជាប្រយោជន៍របស់អ្នកមានលុយមានអំណាចមួយចំនួន»។
លោក វ៉ាន់លី ដែលបានចុះពិនិត្យផ្ទាល់ដល់ទីតាំងបឹងព្រែកទប់ បង្ហាញការសោកស្តាយដែលពេលនេះផ្ទៃរងទឹកភ្លៀង និងផ្ទៃបឹងព្រែកទប់ទាំងមូលដែលធ្លាប់មានទំហំជាង ២០០ហិកតារ ប៉ុន្តែពេលនេះរួមនៅសល់ផ្ទៃបឹងត្រឹមជាង ១៦ហិកតារ (១៦,៣) តែប៉ុណ្ណោះ។
មន្ត្រីឃ្លាំមើលការអភិវឌ្ឍសង្គមរូបនេះ ស្ទើរមិនជឿថា រដ្ឋាភិបាល ឬថ្នាក់ដឹកនាំក្រសួងដែនដីជាដើម អាចជួយលៃលកឲ្យបុគ្គលមានអំណាច និងឈ្មួញមានទ្រព្យមួយចំនួនបានសម្រេចមហិច្ឆតាប៉ុនប៉ងរំលោភកាន់កាប់ដីចំណីមាត់បឹងព្រែកទប់នាពេលកន្លងទៅ ឈានទៅអាចសម្រេចបំណងពួកគេទេ។ លោក វ៉ាន់លី ថ្លែងថា នៅក្នុងពេលដ៏ឆាប់ខាងមុខ មន្ត្រីជំនាញមន្ទីររៀបចំដែនដីខេត្តព្រះសីហនុ នឹងឈានទៅចេញប្លង់កម្មសិទ្ធិកាន់កាប់ដីនៅជុំវិញបរិវេណមាត់បឹងព្រែកទប់ទទួលស្គាល់ដោយក្រសួងរៀបចំដែនដី និងរដ្ឋបាលខេត្តព្រះសីហនុ ព្រមទាំងមន្ត្រីពាក់ព័ន្ធក្រោមឱវាទថែមទៀតក្នុងពេលដ៏ឆាប់ខាងមុខ។
ទាក់ទិនបញ្ហានេះ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចេញលិខិតជម្រាបជូនលោក យន្ត មីន អភិបាលខេត្តព្រះសីហនុ កាលពីថ្ងៃទី១០ ខែមីនា ឆ្នាំ២០១៧ ដោយបើកផ្លូវឲ្យរដ្ឋបាលខេត្តនេះអាចដំណើរការចុះបញ្ជីដីធ្លីជាលក្ខណៈប្រព័ន្ធជូនប្រជាពលរដ្ឋដែលកាន់កាប់ដីនៅជុំវិញមាត់បឹងព្រែកទប់ ស្ថិតក្នុងសង្កាត់លេខ៣ ក្រុងខេត្តព្រះសីហនុ ប្រើប្រាស់ស្របច្បាប់។
ព្រមជាមួយគ្នានេះ លោកក៏តម្រូវឲ្យរដ្ឋបាលខេត្តព្រះសីហនុ រក្សាទីតាំងតំបន់អភិរក្សទឹកសាបបឹងព្រែកទប់ មានទំហំជាង ១៦ហិកតារ (១៦,៣) ឲ្យស្របតាមអនុក្រឹត្យចុះថ្ងៃទី១៣ ខែកញ្ញា ឆ្នាំ២០១៦ ដោយត្រូវរក្សាដីចំណីផ្លូវជុំវិញបឹងសងខាងអ័ក្សផ្លូវសរុបមានទទឹង ២០ម៉ែត្រ សម្រាប់រៀបចំជាផ្លូវទំនប់ ប្រព័ន្ធលូបង្ហូរទឹកកខ្វក់នៅតាមបណ្ដោយដីចំណីផ្លូវព័ទ្ធជុំវិញបឹង និងត្រូវការពារប្រឡាយធម្មជាតិដែលតភ្ជាប់ទៅនឹងបឹងធម្មជាតិមួយនេះ ដោយត្រូវរៀបចំប្រព័ន្ធអាងចម្រោះទឹកកខ្វក់នៅខាងមុខប្រឡាយនោះ មុននឹងបង្ហូរទឹកចេញពីប្រឡាយចូលទៅក្នុងផ្ទៃបឹងព្រែកទប់។
ត្រង់ចំណុចនេះ អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី ថ្លែងហួសចិត្តកាលបើដឹងថា សកម្មភាពចាក់ដីរំលោភយកបឹងធម្មជាតិទឹកសាបនៃបឹងព្រែកទប់ពីបុគ្គលមានអំណាច និងឈ្មួញមានទ្រព្យមួយចំនួននៅពេលនេះ បានសម្រេចបំណងពួកគេដោយជោគជ័យ ឬឈានទៅមានប្លង់កម្មសិទ្ធិកាន់កាប់ដីនេះស្របច្បាប់ចេញដោយស្ថាប័នជំនាញថែមទៀត។
អ្នកស្រី សុធារី ស្នើដល់លោកនាយករដ្ឋមន្ត្រី ហ៊ុន សែន ជួយពិចារណាជាថ្មីទៀត ឬជួយថែរក្សាបរិវេណដីនៅជុំវិញបរិវេណបឹងព្រែកទប់ទាំងផ្ទៃរងទឹកភ្លៀង និងផ្ទៃបឹងព្រែកទប់ទាំងមូល ឲ្យមានទំហំធំដូចដើមវិញ ដោយមិនគួរអនុញ្ញាតឲ្យជនឆក់ឱកាសដែលមានមហិច្ឆតាចាក់ដីរំលោភយកដីចំណីមាត់បឹងព្រែកទប់ធ្វើកម្មសិទ្ធិឯកជន អាចសម្រេចមហិច្ឆតារបស់ពួកគេនោះទេ៖ «អ្វីដែលយើងព្រួយបារម្ភនោះ គឺថាតើសម្ដីរបស់សម្តេចហ្នឹង មានមន្ត្រីជំនាញពាក់ព័ន្ធនៅតាមបណ្តាខេត្តហ្នឹងយកចិត្តទុកដាក់កម្រិតណា គឺមន្ត្រីជំនាញពាក់ព័ន្ធមានទាំងមន្ទីររៀបចំដែនដី មន្ទីរបរិស្ថាន និងមន្ត្រីជលផលជាដើម អនុវត្តតាមដែរឬទេ»។
មន្ត្រីសមាគមអាដហុកខេត្តព្រះសីហនុ បានស្នើដល់លោក ជា សុផារ៉ា រដ្ឋមន្ត្រីក្រសួងដែនដី និងលោក យន្ត មីន អភិបាលខេត្តព្រះសីហនុ បំពេញការងារដោយត្រូវតម្កល់ផលប្រយោជន៍សង្គមជាតិជាធំ ហើយត្រូវជៀសឲ្យផុតពីការឃុបឃិតណាមួយដែលនាំឲ្យមានការបំផ្លាញទ្រព្យសម្បត្តិជាតិនាថ្ងៃអនាគតទៀត។
អ្នកស្រី សុធារី អ្នកឃ្លាំមើលសង្គមរូបនេះបានឲ្យដឹងថា អ្នកមានឈ្មោះកាន់កាប់ចំណែកក្បាលដីនៅជុំវិញបរិវេណមាត់បឹងព្រែកទប់ ភាគច្រើនជាមន្ត្រីមានឋានៈបុណ្យស័ក្តិខ្ពស់កំពុងបម្រើការងារនៅតាមមន្ទីរស្ថាប័នរដ្ឋមួយចំនួននៃរដ្ឋបាលខេត្តព្រះសីហនុ និងមន្ត្រីខ្លះទៀតកំពុងបម្រើការងារនៅតាមក្រសួងស្ថាប័នរដ្ឋថ្នាក់ជាតិ។
អ្នកស្រី សុធារី សោកស្តាយដែលបទបញ្ជារបស់លោកនាយករដ្ឋមន្ត្រី ហ៊ុន សែន ថ្លែងនៅក្នុងវេទិកាការពារបរិស្ថាន ឬធនធានធម្មជាតិលើកទីពីរកាលពីថ្ងៃទី២២ ខែសីហា នាវិមានសន្តិភាព ប៉ុន្តែបែរជាមិនមានមន្ត្រីក្រោមឱវាទរបស់លោកអនុវត្តតាមនោះទេ ហើយថែមទាំងបានផ្គើនទៅនឹងបទបញ្ជានេះថែមទៀត។
បញ្ហានេះដែរ លោក នួន ប៉ុក ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ បានឲ្យដឹងថា កន្លងទៅ មន្ត្រីជំនាញបានចុះបោះបង្គោលកំណត់ផ្ទៃរងទឹកភ្លៀងបឹងទឹកសាបព្រែកទប់ ដោយអនុវត្តត្រឹមត្រូវតាមអនុក្រឹត្យរបស់រាជរដ្ឋាភិបាលស្ដីពីការងារថែរក្សាការពារផ្ទៃបឹងព្រែកទប់ មានទំហំជាង ១៦ហិកតារ (១៦,៣ហិកតារ) សម្រាប់រក្សាប្រភពទឹកស្អាតនាខេត្តព្រះសីហនុ។ លោកបន្តថា សកម្មភាពចុះកំណត់ព្រំដីផ្ទៃរងទឹកភ្លៀងនេះ បានឈានដល់រាល់ថ្ងៃនេះ ក្រុមការងារធ្វើសកម្មភាពដឹកដីចាក់រៀបចំស្ថាបនាផ្លូវ សង់ទំនប់ការពារផ្ទៃបឹង និងដាំដើមឈើជុំវិញមាត់បឹង ដើម្បីកែលំអបឹងទឹកសាបមួយនេះឲ្យក្លាយទៅជាតំបន់ទេសចរណ៍តាមបែបធម្មជាតិសម្រាប់បម្រើដល់ភ្ញៀវទេសចរជាតិ និងអន្តរជាតិ ឲ្យចូលមកទស្សនាកម្សាន្តនៅតំបន់បឹងព្រែកទប់នេះក្នុងពេលដ៏ឆាប់ខាងមុខ។
លោក នួន ប៉ុក បន្តថា នៅថ្ងៃអនាគត ទីតាំងនៅជុំវិញតំបន់បរិវេណមាត់បឹងព្រែកទប់មានទីតាំងនៅជាប់ឆ្នេរឯករាជ្យ ឬឆ្នេរ ៧ជាន់ ស្ថិតក្នុងសង្កាត់លេខ៣ ក្រុង-ខេត្តព្រះសីហនុ នឹងត្រូវធានាថែរក្សាការពារសោភ័ណភាពធម្មជាតិ វប្បធម៌ ព្រមទាំងអភិរក្សប្រែក្លាយបឹងទឹកសាបមួយនេះសម្រាប់បម្រើដល់ផលប្រយោជន៍រួមរបស់សាធារណជនទូទៅ និងរួមគ្នាថែរក្សាបឹងព្រែកទប់ឲ្យបានគង់វង្ស។ ប៉ុន្តែការអះអាងនេះ ត្រូវបានសាធារណជន ពិសេសប្រជាពលរដ្ឋរស់នៅខេត្តព្រះសីហនុ រិះគន់ និងចាត់ទុកសកម្មភាពចាក់ដីអភិវឌ្ឍផ្លូវជុំវិញមាត់បឹងព្រែកទប់ ថានាំឲ្យបាត់បង់ផ្ទៃបឹងធម្មជាតិមួយនេះថែមទៀត។ ប្រជាពលរដ្ឋខេត្តព្រះសីហនុ ស្នើដល់លោកនាយករដ្ឋមន្ត្រី ហ៊ុន សែន ឲ្យជួយថែរក្សាការពារផ្ទៃរងទឹកភ្លៀង ឬមាត់បឹងព្រែកទប់ឲ្យបានគង់វង្ស ជាពិសេសត្រូវនិរាករណ៍រាល់ប័ណ្ណកម្មសិទ្ធិទាំងឡាយណាដែលមន្ត្រីជំនាញចេញឲ្យបុគ្គលឯកជនកន្លងទៅ។
យោងតាមរបាយការណ៍របស់មន្ទីរឧស្សាហកម្ម និងសិប្បកម្មខេត្តព្រះសីហនុ បានបង្ហាញថា បរិវេណនៅជុំវិញមាត់បឹងព្រែកទប់ ឬផ្ទៃរងទឹកភ្លៀង ផ្ទៃបឹងព្រែកទប់ ព្រមទាំងបរិវេណដីហ៊ុមព័ទ្ធនៅជុំវិញមាត់បឹងព្រែកទប់ទាំងមូលសរុបមានជាង ២០០ហិកតារ (២៧០)។ ប៉ុន្តែក្រោយមក បន្ទាប់ពីមានសកម្មភាពទន្ទ្រានកាន់កាប់ដីផ្ទៃរងទឹកភ្លៀងខុសច្បាប់ពីឈ្មួញ និងមន្ត្រីមានអំណាចមួយចំនួនជាបន្តបន្ទាប់ ដោយមានការឃុបឃិតពីមន្ត្រីស្ថាប័នជំនាញខ្លះនៃរដ្ឋបាលខេត្តព្រះសីហនុ នាំឲ្យផ្ទៃបឹងព្រែកទប់បានរួមនៅសល់ជាង ៩០ហិកតារ ដែលកាលណោះនៅក្នុងអាណត្តិដឹកនាំរបស់លោក សាយ ហាក់ ធ្វើជាអភិបាលខេត្ត។ កន្លងទៅ លោក សាយ ហាក់ ធ្លាប់បានបញ្ជាឲ្យសមត្ថកិច្ចវាយកម្ទេចវីឡារបស់លោក ខាត់ ប៊ុណ្ណា មន្ត្រីមន្ទីររៀបចំដែនដីខេត្តនេះចោល ដែលកាលណោះចោទថា បានសង់នៅលើដីចំណីមាត់បឹងព្រែកទប់ ប៉ុន្តែពេលបច្ចុប្បន្ន ដីផ្ទៃមាត់បឹងព្រែកទប់ ត្រូវមន្ត្រីមានអំណាច និងឈ្មួញបានរំលោភស្ទើរទាំងស្រុងអស់ទៅហើយ។ បន្តបន្ទាប់មកទៀត នៅក្នុងអាណត្តិទី៤ ក្រោមការដឹកនាំរបស់លោក ស្បោង សារ៉ាត់ ជាអភិបាលខេត្តព្រះសីហនុ វិញ គឺដីផ្ទៃរងទឹកភ្លៀងបឹងព្រែកទប់ដែលនៅសល់ជាង ៩០ហិកតារ ត្រូវបានមន្ត្រីមានអំណាច និងឈ្មួញមានទ្រព្យនៅក្នុងអាណត្តិដឹកនាំរបស់លោក ស្បោង សារ៉ាត់ ឃុបឃិតគ្នារំលោភធ្វើជាកម្មសិទ្ធិស្ទើរគ្មានសល់។
សកម្មភាពទន្ទ្រានកាន់កាប់ដីនៅជុំវិញបឹងព្រែកទប់នេះ លោក ស្បោង សារ៉ាត់ អតីតអភិបាលខេត្តព្រះសីហនុ និងអតីតប្រធានមន្ទីរសុរិយោដីខេត្តព្រះសីហនុ អាចដឹងរឿងនេះច្បាស់ជាងមន្ត្រីស្ថាប័នពាក់ព័ន្ធខ្លះទៀតនៅក្រោមរដ្ឋបាលខេត្តព្រះសីហនុ នៅក្នុងរជ្ជកាលនោះ។ ក្រោយមក លោក ស្បោង សារ៉ាត់ បានសម្រេចរក្សាផ្ទៃបឹងព្រែកទប់នៅចន្លោះពី ១៥ ទៅ ១៦ហិកតារតែប៉ុណ្ណោះ។
ទោះយ៉ាងណា លោក យន្ត មីន អភិបាលខេត្តព្រះសីហនុ មានប្រសាសន៍ថា បញ្ហាកើតមាននៅបឹងព្រែកទប់ មានទីតាំងនៅក្នុងសង្កាត់លេខ៣ បច្ចុប្បន្ននេះ ក្រុមការងារចម្រុះរបស់រដ្ឋាភិបាលមានក្រសួងដែនដី និងរដ្ឋបាលខេត្តព្រះសីហនុ ជាដើម បានចុះអនុវត្តតាមសេចក្តីសម្រេចរបស់រាជរដ្ឋាភិបាល ដើម្បីទៅអភិរក្សថែរក្សាការពារបឹងធម្មជាតិទឹកសាបមួយនេះឲ្យបានគង់វង្ស និងដាក់ឲ្យការពារដោយព្រះរាជ្យក្រឹត្យ៕