Clik here to view.
ក្រុមយុវជនជាសិស្សនិស្សិត និងបុគ្គលិកក្រុមហ៊ុនឯកជនមានគ្នាប្រមាណ ៣០នាក់ ដែលប៉ុនប៉ងចូលទៅកាន់ភូមិស្រែគរចាស់ និងភូមិក្បាលរមាស ក្នុងស្រុកសេសាន ខេត្តស្ទឹងត្រែង អះអាងថានឹងបន្តទាមទារឲ្យអាជ្ញាធរផ្តល់សិទ្ធិឲ្យពលរដ្ឋដែលរងគ្រោះដោយសារគម្រោងសាងសង់ទំនប់វារីអគ្គិសនីសេសានក្រោមពីរ ទទួលបានទំនាក់ទំនងពីមជ្ឈដ្ឋានខាងក្រៅ បន្ទាប់ពីអ្នកភូមិមិនព្រមចាកចេញពីលំនៅឋាន ដែលនឹងត្រូវទឹកលិចនៅពេលក្រុមហ៊ុនបិទទឹកបញ្ចូលអាង។
ការអះអាងនេះ កើតមានឡើងបន្ទាប់ពីអាជ្ញាធរស្រុកសេសាន បានរារាំងមិនឲ្យក្រុមសកម្មជនបរិស្ថានមានគ្នាប្រមាណ ៣០នាក់ចូលទៅជួបពលរដ្ឋទាំងពីរភូមិ កាលពីថ្ងៃទី៨ ខែកញ្ញា រួមទាំងប្រើកងកម្លាំងអមដំណើរក្រុមសកម្មជន ឲ្យត្រឡប់ចេញផុតពីទឹកដីខេត្តស្ទឹងត្រែង។
សកម្មជនមួយរូប គឺលោក សាន់ ម៉ាឡា បញ្ជាក់នៅថ្ងៃទី៩ ខែកញ្ញា ថា ពលរដ្ឋដែលរងគ្រោះដោយសារការសាងសង់ទំនប់វារីអគ្គិសនីសេសានក្រោមពីរ ហើយមិនព្រមចាកចេញពីភូមិចាស់ កំពុងឋិតក្រោមការបំបិទសេរីភាពធ្ងន់ធ្ងរពីអាជ្ញាធរ ជាពិសេសផ្ដាច់ការទាក់ទងពលរដ្ឋពីខាងក្រៅមិនឲ្យចូលជួបអ្នកភូមិដែលកំពុងត្រូវការជំនួយពីខាងក្រៅ។ លោកបន្តថា នេះជាលើកទីពីរហើយដែលកងប៉ូលិសប្រដាប់អាវុធ បានរារាំងមិនឲ្យសកម្មជន និងសហគមន៍ពីខាងក្រៅចូលភូមិ៖ «បច្ចុប្បន្នកំពុងតែផ្តាច់ទំនាក់ទំនងរវាងប្រជាជនខាងក្រៅ និងខាងក្នុង វាជាការរំលោភសិទ្ធិដ៏ធ្ងន់ធ្ងរមួយទៅលើជនជាតិដើមភាគតិចនៅតំបន់នោះ»។
ក្រុមសកម្មជនដែលមានបំណងទៅកាន់ភូមិស្រែគរ និងភូមិក្បាលរមាស បានសម្រេចចិត្តត្រឡប់ទៅកាន់រាជធានីភ្នំពេញវិញហើយនៅថ្ងៃទី៩ ខែកញ្ញា បន្ទាប់ពីពួកគេត្រូវបានសមត្ថកិច្ចរារាំងនៅចំណុចបំបែកភូមិច្រប់ ក្នុងឃុំក្បាលរមាស។ ពួកគេបានចុះពីរថយន្តក្រុងធ្វើដំណើរថ្មើរជើងប្រមាណ ២គីឡូម៉ែត្រទៀត ដើម្បីចូលភូមិ ប៉ុន្តែសមត្ថកិច្ចបានបន្តថែមកម្លាំង ហើយបង្ខំឲ្យពួកគេឡើងរថយន្តចាកចេញពីតំបន់នោះ។
ឆ្លើយតបការចោទប្រកាន់នេះ អ្នកនាំពាក្យសាលាខេត្តស្ទឹងត្រែង លោក ម៉ែន គុង បញ្ជាក់ថា តំបន់ភូមិស្រែគរ និងភូមិក្បាលរមាសចាស់ គឺជាតំបន់ប្រឈមគ្រោះថ្នាក់ ខណៈទីនោះនឹងក្លាយជាអាងស្តុកទឹក ពីព្រោះឱសានវាទនៃការបិទទ្វារទំនប់នឹងត្រូវចាប់ផ្តើមនៅចុងខែកញ្ញា នេះ។ លោកថា អាជ្ញាធរបានដាក់ក្រុមការងារប្រចាំការនៅតំបន់នោះ ដើម្បីដោះស្រាយបញ្ហាជូនពលរដ្ឋរួចហើយ ហេតុនេះអាជ្ញាធរមិនអនុញ្ញាតឲ្យអ្នកក្រៅចូលតំបន់នោះទេ៖ «មកដល់ដំណាក់កាលនេះ អាជ្ញាធរមានពេលវេលាគ្រប់គ្រាន់ដើម្បីជួយគិតគូរត្រៀមរៀបចំជួយពលរដ្ឋនៅតំបន់នោះ ដូច្នេះហើយសូមកុំឲ្យមានក្រុម ឬសកម្មភាពណាចូលទៅធ្វើសកម្មភាពនៅទីនោះទេ»។
អាជ្ញាធរខេត្តស្ទឹងត្រែង កាលពីថ្ងៃទី១២ ខែសីហា បានចាត់ក្រុមការងារចុះផ្សព្វផ្សាយឱសានវាទបិទទ្វារទំនប់ផ្លូវការ ដើម្បីឲ្យប្រជាពលរដ្ឋដែលមិនព្រមចាកចេញ ប្រុងប្រយ័ត្ន និងកែប្រែចិត្តទទួលយកសំណង ហើយចាកចេញទៅរស់នៅភូមិថ្មីដូចពលរដ្ឋផ្សេងទៀត។
មេឃុំសេសាន លោក សៀក មេគង្គ បញ្ជាក់ថា អាជ្ញាធរបានព្យាយាមដោះស្រាយបញ្ហារបស់អ្នកភូមិដល់ទីបំផុត ប៉ុន្តែអ្នកភូមិប្រកាន់ជំហរដាច់ខាត ហេតុនេះអាជ្ញាធរគ្មានគោលការណ៍បង្ខំអ្នកភូមិឡើយ។ លោកថា ក្រុមសកម្មជនមិនជូនដំណឹងអាជ្ញាធរ ទើបមិនបានដឹងពីបម្រាមទៅកាន់តំបន់នោះ៖ «សារព័ត៌មានទាក់ទងកាសែតស្អីហ្នឹង មុននឹងចូលត្រូវមានការអនុញ្ញាតពីសាលាខេត្ត»។
ទោះបីយ៉ាងណាក៏ដោយ ពលរដ្ឋនៅឃុំស្រែគរចាស់ទាំងពីរភូមិ និងភូមិក្បាលរមាស ជាង ១២០គ្រួសារដែលមិនព្រមចាកចេញ ប្រកាន់ជំហរថានឹងនាំគ្នារស់នៅទីទួលសុវត្ថិភាពក្បែរភូមិចាស់ ប្រសិនបើទឹកលិចភូមិរបស់ពួកគេ៕
