តំណាងរាស្ត្រគណបក្សប្រឆាំង គ្រោងដាក់លិខិតទៅប្រធានរដ្ឋសភាដើម្បីកោះហៅរដ្ឋមន្ត្រី ២ក្រសួង គឺរដ្ឋមន្ត្រីក្រសួងព័ត៌មាន ទៅសួរនាំករណីបិទវិទ្យុក្នុងស្រុកដែលផ្សាយបន្តពីវិទ្យុអាស៊ីសេរី វិទ្យុសំឡេងសហរដ្ឋអាមេរិក និងវិទ្យុសំឡេងប្រជាធិបតេយ្យ និងរដ្ឋមន្ត្រីក្រសួងយុត្តិធម៌ ទាក់ទងករណីចាប់ខ្លួនតំណាងរាស្ត្ររដ្ឋសភាទាំងមានអភ័យឯកសិទ្ធិ។
ប្រធានក្រុមតំណាងរាស្ត្រគណបក្សសង្គ្រោះជាតិ លោក សុន ឆ័យ ប្រាប់ថា គណបក្សប្រឆាំងសម្រេចរួចហើយថា នឹងកោះអញ្ជើញរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ គឺតាំងពីសប្ដាហ៍មុន ប៉ុន្តែដោយសារមានព្រឹត្តិការណ៍ចាប់ខ្លួនប្រធានគណបក្សប្រឆាំង លោក កឹម សុខា ទើបមានការពន្យារពេល។ ក្រោយពេលចាប់ខ្លួន លោក កឹម សុខា នេះ លោក សុន ឆ័យ អះអាងថា គណបក្សប្រឆាំងសម្រេចថា នឹងកោះហៅរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ឲ្យបំភ្លឺករណីចាប់ខ្លួនតំណាងរាស្ត្រទាំងមានអភ័យឯកសិទ្ធិ៖ «ហេតុផលដែលក្រសួងយុត្តិធម៌ បានចេញសេចក្ដីថ្លែងការណ៍គាំទ្រទៅដល់អាជ្ញាធរដែលចាប់អ្នកតំណាងរាស្ត្រយើងទាំងអភ័យឯកសិទ្ធិ ហើយថាជាការចាប់ដោយបានប្រព្រឹត្តបទល្មើសជាក់ស្ដែង ដូច្នេះយើងចង់ឲ្យមានការពន្យល់»។
តាំងពីថ្ងៃទី២៣ ខែសីហា មក ក្រសួងព័ត៌មាន បានដកអាជ្ញាប័ណ្ណបញ្ឈប់ការផ្សាយទាំងស្រុងរបស់វិទ្យុក្នុងស្រុកជាច្រើនស្ថានីយដែលផ្សាយបន្តកម្មវិធីវិទ្យុ វី.អូ.អេ អាស៊ីសេរី វិទ្យុសំឡេងប្រជាធិបតេយ្យ (VOD) និងកម្មវិធីគោលនយោបាយរបស់គណបក្សសង្គ្រោះជាតិ ជាបន្តបន្ទាប់ ក្រោមហេតុផលថា ស្ថានីយវិទ្យុទាំងនោះរំលោភលើកិច្ចព្រមព្រៀងជាមួយក្រសួង។
នៅយប់កណ្ដាលអធ្រាត្រ ថ្ងៃទី២ ឈានចូលថ្ងៃទី៣ ខែកញ្ញា សមត្ថកិច្ចរដ្ឋាភិបាលបានឡោមព័ទ្ធ និងចូលចាប់ប្រធានបក្សប្រឆាំង លោក កឹម សុខា នៅក្នុងផ្ទះ ហើយបញ្ជូនទៅកាន់មន្ទីរកែប្រែត្រពាំងផ្លុង ឬ ម៣ នៅខេត្តត្បូងឃ្មុំ។
នៅថ្ងៃតែមួយ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានផ្ញើលិខិតឲ្យម្ចាស់ស្ថានីយវិទ្យុក្នុងស្រុក ២ទៀត គឺវិទ្យុសំបុកឃ្មុំ និង វិទ្យុស្ត្រីនៃមណ្ឌលព័ត៌មានស្ត្រីកម្ពុជា ដោយបញ្ជាឲ្យបិទការផ្សាយបន្តពីវិទ្យុ វី.អូ.អេ និង អាស៊ីសេរី ក្រោមហេតុផលថា វិទ្យុបរទេសទាំងពីរនេះ ពុំទាន់បានចុះបញ្ជីការិយាល័យតំណាងនៅក្រសួងព័ត៌មាន នៅឡើយ។
ទាក់ទងករណីគម្រោងកោះហៅរដ្ឋមន្ត្រីទាំង ២ក្រសួង ឲ្យបំភ្លឺនៅរដ្ឋសភានេះ អាស៊ីសេរី មិនទាន់អាចទាក់ទងអ្នកនាំពាក្យក្រសួងព័ត៌មាន លោក អ៊ុក គឹមសេង បានទេ ខណៈដែលអ្នកនាំពាក្យក្រសួងយុត្តិធម៌ លោក ជិន ម៉ាលីន បញ្ជាក់ថា តំណាងរាស្ត្រមានសិទ្ធិកោះហៅសមាជិករដ្ឋាភិបាល ប៉ុន្តែសមាជិករដ្ឋាភិបាលក៏មានសិទ្ធិពិចារណាក្នុងការទៅបំភ្លឺ ឬមិនទៅបំភ្លឺដែរ។ តែយ៉ាងណា លោក ជិន ម៉ាលីន មិនទាន់ប្រកែកថា ទៅ ឬ មិនទៅនោះទេ ដោយលោកថា ក្រសួងនឹងពិចារណានៅពេលលិខិតតំណាងរាស្ត្រទៅដល់ក្រសួង៖ «សំខាន់ឲ្យគាត់ដាក់លិខិតមកសិនមក ហើយគេនឹងធ្វើការពិចារណានៅតាមក្រោយ។ សំណួរដែលគាត់សួរហ្នឹង វាមានសារសំខាន់បែបណា ឬមួយក៏មិនចាំបាច់ទេ ដោយសារតែក្រសួងបានធ្វើការបំភ្លឺទៅលើទិដ្ឋភាពច្បាប់មួយចំនួនតាមរយៈសេចក្ដីថ្លែងការណ៍ និងការបំភ្លឺមួយចំនួនរួចទៅហើយ ហើយបើគាត់នៅតែមិនយល់ទៀត តើចាំបាច់ក្រសួងនឹងទៅពន្យល់នៅនឹងសភាទៀត យើងនឹងពិចារណានៅពេលក្រោយ»។
អ្នកនាំពាក្យក្រសួងយុត្តិធម៌ កាលពីថ្ងៃទី៦ ខែកញ្ញា បានចេញសេចក្ដីថ្លែងការណ៍អះអាងការចាប់លោក កឹម សុខា ត្រឹមត្រូវតាមច្បាប់ ហើយចោទបក្សប្រឆាំងវិញថា បានចេញសេចក្ដីថ្លែងការណ៍បកស្រាយបំភ្លៃច្បាប់ និងបានទម្លាក់កំហុសទៅលើស្ថាប័នអនុវត្តច្បាប់។
អ្នកសិក្សាស្រាវជ្រាវវិទ្យាសាស្ត្រនយោបាយ លោក ឯម សុវណ្ណារ៉ា គិតថា វិធីសាស្ត្រកោះហៅរដ្ឋមន្ត្រីទៅសួរនាំនៅរដ្ឋសភានៅពេលនេះពុំមានឥទ្ធិពលទេ ដោយសារកន្លងមកគណបក្សកាន់អំណាចមិនទៅឆ្លើយដោយផ្ទាល់ក៏បាន។ ម្យ៉ាងទៀតលោកថា មេបក្សកាន់អំណាច គឺលោកនាយករដ្ឋមន្ត្រី ហ៊ុន សែន ក៏ធ្លាប់ប្រកាសមិនឲ្យសមាជិករដ្ឋាភិបាលទៅឆ្លើយនៅរដ្ឋសភាក៏បានដែរ៖ «សង្គ្រោះជាតិ ពុំមានឥទ្ធិពលអីទៅលើរដ្ឋមន្ត្រីដែលគណបក្សសង្គ្រោះជាតិ គ្រោងនឹងកោះមកឆ្លើយសំណួរនៅរដ្ឋសភាទេ។ ...វិធានការរបស់គណបក្សសង្គ្រោះជាតិថ្មីក៏ដោយ ចាស់ក៏ដោយ គឺអត់មានប្រសិទ្ធភាពអី ទៅលើគណបក្សកាន់អំណាចទេ វាអត់មានភាពទាក់ទាញទៅដល់ប្រជាពលរដ្ឋ ព្រោះគាត់ធ្វើគ្រាន់តែឲ្យមានសកម្មភាព។ ខ្ញុំគិតទៅវាអត់មានយន្តការអីដែលអាចដាក់បន្ទុកបាន»។
ប្រធានក្រុមតំណាងរាស្ត្របក្សប្រឆាំង លោក សុន ឆ័យ បញ្ជាក់ថា ទោះយ៉ាងណា ក៏ក្រុមតំណាងរាស្ត្របក្សប្រឆាំងធ្វើលិខិតកោះអញ្ជើញរដ្ឋមន្ត្រីទៅសួរដែរ ព្រោះអ្នកតំណាងរាស្ត្របក្សប្រឆាំងមិនទាន់អស់ចិត្តនោះទេចំពោះការចាប់មេបក្ស គឺលោក កឹម សុខា៕