មន្ត្រីមូលដ្ឋានគណបក្សសង្គ្រោះជាតិ នៅខេត្តកំពង់ធំ បញ្ជាក់ជំហរថា ពួកគេនៅតែរឹងមាំ មិនតក់ស្លុត បើទោះបីជាមានបញ្ហាអាក្រក់កើតឡើងទៅលើគណបក្សរបស់ខ្លួនក៏ដោយ។ មិនតែប៉ុណ្ណោះ ពួកគេអះអាងថា នឹងនៅតែបន្តបំពេញការងារជូនពលរដ្ឋដោយគ្មានការភ័យខ្លាចទៅតាមគោលនយោបាយរបស់គណបក្ស និងទៅតាមសេចក្ដីត្រូវការរបស់ពលរដ្ឋមូលដ្ឋាន។
បើទោះបីជាមានករណីគំរាមថា នឹងរំលាយគណបក្សសង្គ្រោះជាតិចោល ហើយនឹងឈានដល់ការរំលាយមន្ត្រីគណបក្សមួយនេះ តាំងពីថ្នាក់មូលដ្ឋានរហូតដល់ថ្នាក់រដ្ឋសភា ព្រឹទ្ធសភាក្តី ប៉ុន្តែមន្ត្រីគណបក្សសង្គ្រោះជាតិ តាមមូលដ្ឋានក្នុងខេត្តកំពង់ធំ មួយចំនួនមិនព្រួយបារម្ភ ឬសោកស្ដាយតួនាទីរបស់ខ្លួនទេ។ ប៉ុន្តែអ្វីដែលពួកគេសោកស្ដាយ និងបារម្ភ គឺមិនបានបំពេញការងារជូនពលរដ្ឋឱ្យអស់លទ្ធផលដែលម្ចាស់ឆ្នោតបានជឿទុកចិត្តមកលើពួកគាត់ ម្យ៉ាងបារម្ភពីស្ថានភាពស្រុកទេសទៅថ្ងៃខាងមុនតែប៉ុណ្ណោះ។
មេឃុំតាំងក្រសាំង ស្រុកសន្ទុក មកពីគណបក្សសង្គ្រោះជាតិ លោក នី សុវណ្ណ មានប្រសាសន៍ថា ពួកគាត់នៅតាមមូលដ្ឋានមានជំហររឹងមាំដដែល ដើម្បីបំពេញការងារជូនពលរដ្ឋបន្តទៀត។ លោកអះអាងថា ទោះបីជាមានការគំរាមរំលាយគណបក្សប្រឆាំង ហើយនឹងឈានដល់ការដកតំណែងមន្ត្រីគណបក្សសង្គ្រោះជាតិ ក៏គ្មានការតក់ស្លុតដែរ។ មេឃុំដដែលបន្តថា ម្ចាស់ឆ្នោតទៅវិញទេ ដែលសោកស្ដាយ ព្រោះខំបោះឆ្នោតជូនគណបក្សសង្គ្រោះជាតិ ប៉ុន្តែត្រូវបានគេរំលាយចោលនោះ៖ «នៅរឹងមាំនៅឡើយទេ នៅថ្នាក់មូលដ្ឋាននេះ។ ប៉ុន្តែបើឈានដល់ការបិទ ការរំលាយហ្នឹង ប្រជាពលរដ្ឋខ្ញុំគាត់មានការសោកស្ដាយ»។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរចាប់ខ្លួនកាលពីយប់រំលងអធ្រាត្រឈានចូលថ្ងៃទី៣ ខែកញ្ញា ក្រោមបទចោទក្បត់ជាតិ។ ក្រោយពេលចាប់ខ្លួនបានប៉ុន្មានម៉ោង លោកនាយករដ្ឋមន្ត្រី ហ៊ុន សែន បានព្រមានរំលាយគណបក្សប្រឆាំងចោលទៀតផង ប្រសិនបើរកឃើញថា មានសមាជិករដ្ឋសភា និងព្រឹទ្ធសភារបស់បក្សមួយនេះចេញមុខប្រឆាំងការចាប់ខ្លួនលោក កឹម សុខា ដោយកម្លាំងនគរបាល។
កាលពីថ្ងៃទី៦ ខែកញ្ញា មន្ត្រីនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន លើកឡើងថា គណបក្សសង្គ្រោះជាតិ នឹងពុំអាចមានវត្តមានធ្វើសកម្មភាពនយោបាយនៅកម្ពុជា បន្តទៅទៀតឡើយ ប្រសិនបើគណបក្សនេះរឹងរូសមិនព្រមតែងតាំងប្រធានថ្មីជំនួសលោក កឹម សុខា។ ឯអ្នកនាំពាក្យក្រសួងមហាផ្ទៃ លោក ខៀវ សុភ័គ វិញ ក៏ព្រមានទៀតថា នៅពេលដែលគណបក្សប្រឆាំងត្រូវបានរំលាយចោល សមាជិកក្រុមប្រឹក្សាឃុំ-សង្កាត់ ដែលទើបជាប់ឆ្នោតទាំងអស់របស់គណបក្សសង្គ្រោះជាតិ មានចំនួនជាង ៥ពាន់នាក់ រួមទាំងក្រុមប្រឹក្សាស្រុក រហូតដល់ថ្នាក់ព្រឹទ្ធសភា (ប្រសិនបើមាន) ព្រមទាំងតំណាងរាស្ត្ររបស់គណបក្សនេះផងដែរ នឹងត្រូវបាត់បង់តំណែងទាំងអស់គ្នា។
ចុងក្រោយគឺស្ថាប័នគណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ថា ចាប់ពីថ្នាក់តំណាងរាស្ត្ររហូតដល់ក្រុមប្រឹក្សារាជធានី-ខេត្ត និងឃុំ នឹងត្រូវបញ្ចប់តំណែង ប្រសិនបើបក្សប្រឆាំងពិតជាត្រូវរំលាយចោល។
ពលរដ្ឋនៅក្រុងស្ទឹងសែន ម្នាក់ លោក ធុន ផល្លា មិនពេញចិត្តចំពោះការព្រមានបែបនេះទេ ដោយលោកហាក់ងឿងឆ្ងល់ថា បើគង់នឹងរំលាយចោលដដែល ហេតុអ្វីខំប្រឹងរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីខែមិថុនា កន្លងទៅ។ លោកសោកស្ដាយ ប្រសិនបើគេរំលាយគណបក្សសង្គ្រោះជាតិ ចោលមែននោះ៖ «ប្រសិនបើរាជរដ្ឋាភិបាលគាត់រំលាយគណបក្សប្រឆាំងចោលហាក់បីដូចជា រិញមួយដែលអត់មានគូប្រកួត។ អ៊ីចឹងថ្ងៃអនាគតមិនបាច់មានការបោះឆ្នោតធ្វើអី»។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីខែមិថុនា នៅក្នុងខេត្តកំពង់ធំ លទ្ធផលផ្លូវការបង្ហាញថា គណបក្សសង្គ្រោះជាតិ ឈ្នះដឹកនាំជាមេឃុំចំនួន ៤១ឃុំ-សង្កាត់ ក្នុងចំណោមឃុំ-សង្កាត់ចំនួន ៨១ ហើយក្នុងចំណោមអាសនៈចំនួន ៥៧៧ គឺគណបក្សនេះទទួលបានអាសនៈចំនួន ២៨៥។
ចៅសង្កាត់ស្រយ៉ូវ លោក យង់ សេងហាក់ អះអាងថា រយៈពេលជាង ២ខែមកហើយ ដែលលោកបានចូលកាន់តំណែង និងបំពេញការងារជូនពលរដ្ឋមូលដ្ឋាន។ លោកពេញចិត្តចំពោះការងារមួយនេះ ប៉ុន្តែប្រសិនបើមានករណីរំលាយគណបក្ស និងដកតំណែងរបស់លោកចេញ គឺគ្មានអ្វីត្រូវមិនតក់ស្លុត ឬព្រួយបារម្ភនោះដែរ គ្រាន់តែសោកស្ដាយដោយមិនបានបម្រើពលរដ្ឋបន្តទៀតប៉ុណ្ណោះ៖ «ការសោកស្ដាយរបស់ខ្ញុំគឺតូចចិត្តបន្តិចត្រង់ថា ប្រជាពលរដ្ឋខំគាំទ្រខ្ញុំ ៤ពាន់នាក់ជាង ដោយសារខ្ញុំមិនអាចបម្រើអស់ពីចិត្ត អស់ពីកម្លាំងកាយ»។
លោកបន្ថែមថា ចំពោះមុខ គឺខិតខំបំពេញការងារជូនពលរដ្ឋឱ្យអស់ពីកម្លាំងកាយចិត្ត ព្រមទាំងជំរុញ និងផ្សព្វផ្សាយឱ្យពួកគាត់ដែលមិនទាន់បានចុះឈ្មោះបោះឆ្នោត នាំគ្នាទៅចុះឈ្មោះឱ្យបានកាន់តែច្រើន។
ប្រធានប្រតិបត្តិគណបក្សសង្គ្រោះជាតិ និងជាសមាជិកក្រុមប្រឹក្សាខេត្តកំពង់ធំ លោក ស៊ុន ចន្ធី មានប្រសាសន៍ថា មន្ត្រីរបស់ខ្លួននៅតែមានស្មារតីរឹងមាំដើម្បីបំពេញការងារជូនពលរដ្ឋ ប៉ុន្តែខាងលោកបារម្ភចំពោះស្ថានភាពនយោបាយប្រទេសជាតិ នៅពេលខាងមុខ។ បន្ថែមពីនេះ បារម្ភចំពោះការអនុវត្តច្បាប់របស់រាជរដ្ឋាភិបាល ដែលមិនបានឆ្លើយតបទៅនឹងសេចក្ដីត្រូវការរបស់ពលរដ្ឋ ប៉ុន្តែមាលក្ខណៈគាបសង្កត់គណបក្សប្រឆាំងបែបនេះ៖ «យើងបារម្ភពីដំណើរការប្រជាធិបតេយ្យ ដំណើរការគោរពសិទ្ធិមនុស្ស នៅប្រទេសកម្ពុជា ព្រោះច្បាប់មួយដែលរដ្ឋាភិបាលបង្កើតឡើង មិនបានឆ្លើយតបទៅនឹងតម្រូវការរបស់ប្រជាពលរដ្ឋ»។
ប្រធានប្រតិបត្តិគណបក្សដដែលបញ្ជាក់ថា មន្ត្រីរបស់ខ្លួន ក្រៅពីមិនតក់ស្លុតចំពោះស្ថានភាពនយោបាយដែលកំពុងមានភាពចម្រូងចម្រាស ពួកគាត់នឹងតស៊ូបម្រើពលរដ្ឋ ព្រមទាំងបន្តដំណើរទៅមុខដោយអហិង្សា សន្តិវិធី ហើយឈរជាមួយពលរដ្ឋជានិច្ច។
ប្រធានមជ្ឈមណ្ឌលអប់រំប្រជាពលរដ្ឋដើម្បីការអភិវឌ្ឍ និងសន្តិភាព លោក យង់ គិមអេង យល់ថា គម្រោងរំលាយគណបក្សប្រឆាំងនៅមិនទាន់មានអ្វីជាផ្លូវការនោះទេ ប៉ុន្តែលោកមិនចង់ឃើញប្រទេសកម្ពុជា ដើរទៅដល់ផ្លូវគ្រោះថ្នាក់បែបនោះឡើយ។ ជាងនេះទៀត លោករឹតតែមិនចង់ឃើញការបែកបាក់ជាតិកាន់តែធ្ងន់ធ្ងរជាងនេះ៖ «យើងមានប្រវត្តិឈឺចាប់ និងបែកបាក់ ល្មមនឹងឆ្អែតគ្រប់គ្រាន់ហើយ ហើយក៏យើងគួរតែរិះរកដំណោះស្រាយមួយនឹងការរស់នៅជាមួយគ្នាមួយដែលមានភាពសុខដុមរមនា»។
យ៉ាងនេះក្ដី សង្គមស៊ីវិលដដែលមើលឃើញថា ប្រសិនបើមន្ត្រី និងគណបក្សប្រឆាំង ត្រូវបានគេរំលាយចោល គឺប៉ះពាល់ដល់ទឹកចិត្តប្រជាពលរដ្ឋស្ទើរកន្លះនគរ ប៉ះពាល់ដល់ជីវភាពរស់នៅរបស់ពួកគាត់ផង។ មិនតែប៉ុណ្ណោះ ប៉ះពាល់ដល់ការវិនិយោគទុន និងទេសចរជាដើម។ លោកបន្ថែមថា ក្នុងបរិបទសង្គមប្រជាធិបតេយ្យ អ្នកនយោបាយខ្មែរមិនគួរធ្វើនយោបាយដោយចាត់ទុកគ្នាជាសត្រូវស្លាប់រស់នោះឡើយ ពោលគឺត្រូវចាត់ទុកគ្នាជាមិត្តភ័ក្ដិ បងប្អូន ដើម្បីជួយប្រទេសជាតិឱ្យកាន់តែខ្លាំង និងជួយពលរដ្ឋឱ្យកាន់តែរីកចម្រើន៕