សហគមន៍ខ្មែរនៅក្រៅប្រទេស គ្រោងធ្វើបាតុកម្មនៅមុខសាលាក្រុង ក្នុងរដ្ឋរៀងៗខ្លួន ដើម្បីទាមទារ ឲ្យដោះលែងប្រធានគណបក្សសង្គ្រោះជាតិ លោក កឹម សុខា ជាបន្ទាន់ និងដោយឥតលក្ខខណ្ឌ។ ប្រធានសាខាគណបក្សសង្គ្រោះជាតិ ប្រចាំសហរដ្ឋអាមេរិក លោក អ៊ុង រិទ្ធី បានប្រាប់អាស៊ីសេរី តាមទូរស័ព្ទថា ពលរដ្ឋខ្មែរ-អាមេរិកាំង ប្រមាណជាង ១០០នាក់ នៅរដ្ឋម៉ាសាឈូសេត (Massachusetts) បានជួបជុំគ្នាធ្វើបាតុកម្មនៅមុខសាលាក្រុងឡូវែល កាលពីល្ងាចថ្ងៃទី៥ ខែកញ្ញា ដោយមានការចូលរួមពីអតីតអភិបាលក្រុងឡូវ៉ែល គឺលោក រ៉ដនី អេលៀត (Rodney Elliot)។
ចំណែកប្រធានអង្គការសម្ព័ន្ធមិត្តខ្មែរ-អាមេរិកាំង លោក ទូច វិបុល ក៏បានឲ្យដឹងថា សហគមន៍ខ្មែរនៅរដ្ឋវ៉ាស៊ីនតុន (Washington State) និងរដ្ឋកាលីហ្វរនីញ៉ា (California) គ្រោងជួបជុំគ្នានៅថ្ងៃអាទិត្យទី១០ ខែកញ្ញា ចុងសប្តាហ៍នេះ។ លោក ទូច វិបុល បន្តថា សហគមន៍ខ្មែរនៅក្នុងរដ្ឋមួយចំនួន រួមមានវ៉ឺហ្យីណា (Virginia) ម៉ារីលែន (Maryland) រដ្ឋថេនឺស៊ី (Tennessee) រដ្ឋភីនស៊ីវ៉ឺនីយ៉ា (Pennsylvania) ជាដើម ដែលគ្រោងមកជួបជុំគ្នាតវ៉ា នៅថ្ងៃសុក្រ ទី១៥ ខែកញ្ញា នៅក្នុងរដ្ឋធានីវ៉ាស៊ីនតុន៖«យើងធ្វើខាងមុខក្រសួងការបរទេសនេះ ដើម្បីផ្ញើសារទៅអ្នកធ្វើគោលនយោបាយរបស់សហរដ្ឋអាមេរិក ឲ្យយល់អំពីបញ្ហារំលោភលទ្ធិប្រជាធិបតេយ្យ រំលោភសិទ្ធិសេរីភាពរបស់ប្រជាពលរដ្ឋខ្មែរ ដែលជាអំពើប្រឆាំងនឹងតម្លៃស្នូល ដែលសហរដ្ឋអាមេរិកគេមានជំនឿទៅលើសេរីភាព ឯករាជ្យភាព និងលទ្ធិប្រជាធិបតេយ្យ»។
ចំណែកសហគមន៍ខ្មែរនៅប្រទេសកាណាដា និងអូស្ត្រាលីវិញ ក៏គ្រោងធ្វើបាតុកម្មតវ៉ា នៅថ្ងៃសៅរ៍ ទី៩ ខែកញ្ញា ខាងមុខនេះ។ តំណាងរាស្ត្រខ្មែរ-អូស្រ្តាលី លោក ហុង លីម ដែលដឹកនាំបាតុកម្មធ្វើឡើង នៅមុខសាលាក្រុង ស្ព្រីវ៉េល(Springvale) ក្នុងរដ្ឋវិកថូរីយ៉ា (Victoria) មានប្រសាសន៍ថា ពលរដ្ឋខ្មែរ-អូស្ត្រាលី មានការខកចិត្ត និងសោកស្ដាយជាខ្លាំង ចំពោះវិធានការរបស់រដ្ឋាភិបាលលោក ហ៊ុន សែន ដែលបានរំលោភអំណាច និងព្យាយាមកម្ចាត់មេដឹកនាំគណបក្សប្រឆាំង ដើម្បីបន្តការដឹកនាំរបស់ខ្លួន៕