បណ្ដាញអាស៊ីដើម្បីការបោះឆ្នោតដោយសេរី ឬហៅកាត់ថា អានហ្វ្រែល (ANFREL) និងបណ្ដុំអង្គការអន្តរជាតិ ឃ្លាំមើលការបោះឆ្នោតជាង ១០ ថ្កោលទោសរដ្ឋាភិបាលកម្ពុជា ថាបានរំលោភបំពានលើអង្គការសិទ្ធិមនុស្សក្នុងស្រុក និងអន្តរជាតិ រួមទាំងស្ថាប័នសារព័ត៌មាន។
សេចក្ដីថ្លែងការណ៍រួមនៃបណ្ដាញអង្គការនេះ បានភ្ជាប់ទៅនឹងស្ថានភាពដែលរដ្ឋាភិបាលបញ្ជាឱ្យវិទ្យាស្ថានជាតិប្រជាធិបតេយ្យ (NDI) នៅភ្នំពេញ បញ្ឈប់សកម្មភាពការងារ និងបញ្ជូនសមាជិកបរទេសរបស់ខ្លួនត្រឡប់ទៅវិញ និងស្ថានីយវិទ្យុក្នុងស្រុកមួយចំនួនដែលផ្សាយព័ត៌មានបន្តឲ្យវិទ្យុឯករាជ្យ ក៏ត្រូវបានបិទមិនឱ្យធ្វើអាជីវកម្ម និងព្រមានបិទកាសែត ឌឹ ខេមបូឌា ដេលី (The Cambodia Daily)។
បណ្ដុំអង្គការអន្តរជាតិឃ្លាំមើលការបោះឆ្នោត ព្រួយបារម្ភអំពីការបោះឆ្នោតជាតិឆ្នាំ២០១៨ ជិតមកដល់ដែលគេយល់ឃើញថា រដ្ឋាភិបាលបានធ្វើសកម្មភាពគាបសង្កត់ទាំងនេះ មិនត្រឹមតែធ្វើឱ្យការបោះឆ្នោតមានលក្ខណៈសេរី និងត្រឹមត្រូវនោះទេ ប៉ុន្តែវារឹតតែធ្វើឲ្យស្ថានភាពប្រទេសកម្ពុជា កាន់តែដើរថយក្រោយថែមទៀត។
ក្នុងសេចក្ដីថ្លែងការណ៍រួមគ្នាបន្ទាន់មួយចេញផ្សាយនៅថ្ងៃទី១ ខែកញ្ញា ដែលមានបណ្ដាញអាស៊ីដើម្បីការបោះឆ្នោតដោយសេរី ឬហៅកាត់ថា អានហ្វ្រែល (ANFREL) និងបណ្ដុំអង្គការអន្តរជាតិឃ្លាំមើលការបោះឆ្នោតជាង ១០ទៀតបានលើកឡើងថា ក្រសួងការបរទេសកម្ពុជា បានចេញបញ្ជាឱ្យវិទ្យាស្ថានជាតិប្រជាធិបតេយ្យនៅភ្នំពេញ បញ្ឈប់សកម្មភាពរបស់ខ្លួន និងបញ្ជូនសមាជិកបរទេសរបស់ខ្លួនត្រឡប់ទៅវិញ នៅថ្ងៃទី២៣ ខែសីហា បន្ទាប់ពីការបោះឆ្នោតឃុំសង្កាត់ខែមិថុនា ឆ្នាំ២០១៧។
សេចក្ដីថ្លែងការណ៍នេះបន្តថា អង្គការសង្គមស៊ីវិលក្នុងស្រុក និងស្ថាប័នប្រព័ន្ធផ្សព្វផ្សាយឯករាជ្យបានប្រឈមមុខនឹងភាពស្អប់ខ្ពើមពីរដ្ឋាភិបាលកម្ពុជា។ សេចក្ដីថ្លែងការណ៍ដដែលក៏ទាមទារឱ្យបញ្ឈប់ការយាយីលើសិទ្ធិមនុស្ស និងប្រព័ន្ធផ្សព្វផ្សាយ។ ការចូលរួមរបស់សង្គមស៊ីវិល និងប្រព័ន្ធផ្សព្វផ្សាយបាននាំឱ្យមានដំណើរការបោះឆ្នោតដោយសន្តិវិធី និងត្រឹមត្រូវ ដូចដែលបានឃើញនៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០១៧ កន្លងមកហើយ។
សកម្មភាពនាពេលថ្មីៗនេះ របស់រាជរដ្ឋាភិបាលកម្ពុជា បានបន្តនូវទម្រង់នៃការយាយីដែលបណ្ដាលមកពីប្រព័ន្ធផ្សព្វផ្សាយ និងអង្គការមិនមែនរដ្ឋាភិបាលដែលធ្វើការគាំទ្រសេរីភាពបញ្ចេញមតិ និងសិទ្ធិមនុស្សនៅក្នុងប្រទេស។ នេះរួមបញ្ចូលទាំងការស៊ើបអង្កេតទៅលើសកម្មភាព និងការគំរាមកំហែងប្រឆាំង និងសមាជិកឃ្លាំមើលការបោះឆ្នោត និងអង្គការសិទ្ធិមនុស្សដែលត្រូវបានគេស្គាល់ថា ជាបន្ទប់ស្ថានការណ៍ ហើយសកម្មភាពផ្លូវច្បាប់ប្រឆាំងនឹងស្ថាប័នសារព័ត៌មានឯករាជ្យដូចជាសារព័ត៌មានកាសែត ឌឹ ខេមបូឌា ដេលី វិទ្យុសំឡេងសហរដ្ឋអាមេរិក និងវិទ្យុអាស៊ីសេរី ជាដើម។
ទាក់ទងបញ្ហានេះដែរ មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) នៅថ្ងៃទី១ កញ្ញា បានចេញសេចក្ដីប្រកាសព័ត៌មានព្រួយបារម្ភចំពោះស្ថានភាពប្រទេសកម្ពុជា មួយរយៈពេលចុងក្រោយនេះ។
ប្រធានមជ្ឈមណ្ឌលនេះ លោក ប៉ា ងួនទៀង បានថ្លែងថា អ្វីដែលកំពុងកើតឡើងបច្ចុប្បន្ននេះ គឺជាគ្រោះថ្នាក់ដែលមិនអាចធានាឲ្យការបោះឆ្នោតនៅពេលខាងមុខមានភាពសេរី និងយុត្តិធម៌នោះទេ។ លោកថា វាដល់ពេលដែលសហគមន៍អន្តរជាតិ ជាពិសេសប្រទេសដៃគូអភិវឌ្ឍរបស់កម្ពុជា ប្រើនូវអំណាចវិនិយោគ និងពាណិជ្ជកម្មរបស់ខ្លួន ជំរុញទៅរដ្ឋាភិបាលដើម្បីធានាថា បរិយាកាសការបោះឆ្នោតនៅឆ្នាំ២០១៨ មានលក្ខណៈសេរី និងយុត្តិធម៌៕