អ្នកវិភាគលើកឡើងថា សារនយោបាយមួយចំនួនដែលលោកនាយករដ្ឋមន្ត្រី ហ៊ុន សែន ប្រើប្រាស់នៅពេលលោកចុះជួបកម្មកររោងចក្រកាត់ដេរនោះ មិនមានប្រសិទ្ធភាពឡើយ បើសិនជាការដឹកនាំរបស់លោកមិនធ្វើឲ្យលក្ខខណ្ឌការងារ និងប្រាក់បៀវត្សរបស់កម្មករទទួលបានប្រសើរឡើងទេនោះ។
យុទ្ធនាការចុះជួបកម្មកររោងចក្រកន្លងមក លោក ហ៊ុន សែន តែងតែផ្ញើសារព្រមានកម្មករដែលភ្ជាប់បក្សប្រឆាំងថា មិនអនុញ្ញាតឲ្យមានបាតុកម្មកើតមានឡើងដូចកាលពីឆ្នាំ២០១៣ កើតមានទៀតទេ។ ក្រៅពីផ្ញើសារព្រមានអំពីមិនឲ្យធ្វើបាតុកម្មនេះ លោក ហ៊ុន សែន ក៏មិនភ្លេចឃោសនារកសំឡេងគាំទ្រគណបក្សរបស់លោក និងបង្អាប់គណបក្សដទៃទៀត ថ្វីត្បិតតែរយៈកាលនៃការឃោសនាបោះឆ្នោតមិនទាន់បានមកដល់ក៏ដោយ។ សារដែលលោកធ្លាប់លើកជាញឹកញយក្នុងរយៈពេលថ្មីៗនេះ នោះគឺសារអំពីពាក្យថា ៣កុំ និង ៣សុំ។ លោក ហ៊ុន សែន បានអំពាវនាវឲ្យកម្មករឈប់គាំទ្រក្រុម ៣កុំ គឺទី១ កុំឲ្យគេមកវិនិយោគ ទី២ កុំឲ្យគេមកទិញទំនិញពីកម្ពុជា និងទី៣ កុំឲ្យផ្ដល់ជំនួយ។ ក្រៅពីសារ ៣កុំនេះ លោក ហ៊ុន សែន អះអាងថា ក្រោមការដឹកនាំរបស់លោក លោកប្រើយុទ្ធសាស្ត្របញ្ច្រាសពីក្រុមប្រឆាំងវិញ ដើម្បីអភិវឌ្ឍប្រទេស ៣សុំ គឺទី១ សុំឲ្យបរទេសមកវិនិយោគ ទី២ សុំឲ្យគេមកទិញទំនិញពីកម្ពុជា និងទី៣ សុំឲ្យគេផ្ដល់ជំនួយ។
អ្នកឃ្លាំមើលការអភិវឌ្ឍសង្គម លោកបណ្ឌិត មាស នី មានប្រសាសន៍ថា រដ្ឋាភិបាលមិនអាចទប់ស្កាត់កម្មករក្នុងការធ្វើបាតុកម្មបាននោះទេ បើសិនជាអំពើយុត្តិធម៌ ការគាបសង្កត់កម្មករនៅតែកើតឡើង។ លោកបញ្ជាក់ថា ប្រាក់ចំណូលកម្មករនេះ ជាប្រាក់ចំណូលមួយផ្នែកធំសម្រាប់លើកស្ទួយសេដ្ឋកិច្ចជាតិ ដែលបញ្ហានេះ អាជ្ញាធររដ្ឋាភិបាលមិនត្រូវគាបសង្កត់ និងប្រើអំពើហិង្សាលើកម្មករដូចដែលបានធ្វើកាលពីឆ្នាំ២០១៤ នៅផ្លូវវ៉េងស្រេង ទេ។
របាយការណ៍រដ្ឋាភិបាលបង្ហាញថា រោងចក្រកាត់ដេរមានចំនួន ៦៤រោងចក្រនៅឆ្នាំ១៩៩៧ បានកើនឡើងជាង ១ពាន់រោងចក្រនៅឆ្នាំ២០១៧ និងមានកម្មករជិត ៨សែននាក់ ហើយប្រាក់ខែគោលរបស់កម្មករក្នុងឆ្នាំ២០១៧ គឺចំនួន ១៥៣ដុល្លារក្នុងមួយខែ។ ខាងសហជីពអះអាងថា បច្ចុប្បន្នតំណាងសហជីព និងខាងសមាគមរោងចក្រកាត់ដេរនៅកម្ពុជា កំពុងតែចរចាគ្នាអំពីការដំឡើងប្រាក់ឈ្នួលជូនកម្មករនេះនៅឡើយ ដែលខាងសហជីពទាមទារខ្ពស់ជាងការសន្យារបស់លោកនាយករដ្ឋមន្ត្រីដែលថា នឹងផ្ដល់ជូន ១៦៨ដុល្លារក្នុង១ខែនោះ ដើម្បីឲ្យសមតុល្យ និងតម្លៃទំនិញកំពុងតែកើនឡើងនៅលើទីផ្សារ។
ថ្វីត្បិតតែលោកនាយករដ្ឋមន្ត្រី ហ៊ុន សែន មិនបានបញ្ជាក់ថា ក្រុម ៣នោះ ជាក្រុមខាងណាក៏ដោយ ប៉ុន្តែគេកាត់យល់បានថា លោកសំដៅទៅគណបក្សសង្គ្រោះជាតិ ដែលជាគណបក្សប្រឆាំងដ៏ធំមួយ ហើយជាដៃគូនយោបាយរបស់លោក ហ៊ុន សែន។
សូមស្ដាប់បទសម្ភាសន៍ផ្ទាល់របស់លោក ជុន ច័ន្ទបុត្រ ជាមួយប្រធានក្រុមតំណាងរាស្ត្រគណបក្សសង្គ្រោះជាតិ លោក សុន ឆ័យ៖