ប៉ូលិសសង្កាត់គោកចក ក្រុងសៀមរាប បានចាប់ខ្លួនក្មេងប្រុសម្នាក់អាយុជាង ១៣ឆ្នាំ ដោយសារតែបានចាប់កុមារតូចម្នាក់ជ្រមុជក្នុងទឹកប្រឡាយ រហូតដល់ស្លាប់។ ក៏ប៉ុន្តែក្រោយមក គេអះអាងថាព្រះរាជអាជ្ញាអមសាលាដំបូងខេត្តសៀមរាប បានបញ្ជាឲ្យប៉ូលិសដោះលែងក្មេងប្រុសជាជនដៃដល់នោះវិញ។
ក្រុមគ្រួសាររបស់កុមារដែលស្លាប់ រិះគន់ថា ការដែលប៉ូលិសដោះលែងជនដៃដល់ក្នុងអំពើសម្លាប់មនុស្សបែបនេះ គឺជារឿងអយុត្តិធម៌បំផុតសម្រាប់គ្រួសាររបស់គេ។
ពលរដ្ឋមួយគ្រួសារនៅភូមិត្រពាំងសេះ សង្កាត់គោកចក ក្រុងសៀមរាប មិនសុខចិត្តចំពោះតុលាការខេត្តសៀមរាប ដែលបានសម្រេចឲ្យប៉ូលិសសង្កាត់គោកចក ដោះលែងក្មេងប្រុសម្នាក់ជាជនដៃដល់ ក្នុងការសម្លាប់កូនតូចរបស់គាត់ម្នាក់អាយុ ៥ឆ្នាំទេ។
ម្ដាយរបស់កុមារតូចដែលស្លាប់នោះ គឺលោកស្រី ហេង ភារុំ។ លោកស្រីមានប្រសាសន៍នៅព្រឹកថ្ងៃច័ន្ទ ទី២៨ ខែសីហា ថា កាលពីថ្ងៃទី២៥ ខែសីហា ក្មេងប្រុសម្នាក់ឈ្មោះ យិត ស្នា អាយុ ១៣ឆ្នាំ និង ១១ខែ បានជិះម៉ូតូ ១គ្រឿងទៅលាងទឹកក្នុងប្រឡាយ។ ពេលនោះកូនប្រុសតូចរបស់គាត់ឈ្មោះ ស៊ត ភារិទ្ធ អាយុ ៥ឆ្នាំ បានទៅលេងទឹកប្រឡាយជិតក្មេងដែលកំពុងលាងម៉ូតូនោះដែរ។ កូនតូចរបស់គាត់បានបាចទឹកលេងទៅប៉ះនឹងក្មេងប្រុសកំពុងលាងម៉ូតូ ធ្វើឲ្យក្មេងនោះខឹង ហើយក៏ចាប់កូនតូចជ្រមុជទៅក្នុងប្រឡាយទឹករហូតដល់ស្លាប់។
លោកស្រី ហេង ភារុំ បញ្ជាក់ថា បន្ទាប់ពីក្មេងប្រុសអាយុជាង ១៣ឆ្នាំ ជ្រមុជទឹកកូនរបស់គាត់ស្លាប់ គឺប៉ូលិសសង្កាត់គោកចក បានទៅចាប់កុមារនោះ ប៉ុន្តែក្រោយមកត្រូវដោះលែងតាមបញ្ជារបស់តុលាការ។ ស្ត្រីដដែលបញ្ជាក់ថា ជារឿងអយុត្តិធម៌បំផុតសម្រាប់រូបគាត់៖ «អត់ព្រមទេ ហើយក៏អត់អស់ចិត្ត ពីព្រោះកូនប្រុសតូចរបស់ខ្ញុំស្លាប់ទាំងមូល បែរជាប៉ូលិសចាប់ជនដៃដល់ ហើយដោះលែងវិញ»។
ឪពុកមារបស់កុមារតូចដែលស្លាប់ លោក វិន វណ្ណារ៉ា ក៏យល់ថា រឿងនេះអយុត្តិធម៌សម្រាប់អ្នកស្លាប់ដែរ ហើយលោកទាមទារឲ្យតុលាការគួរតែមានចំណាត់ការផ្លូវច្បាប់ប្រឆាំងនឹងក្មេងប្រុសអាយុជាង ១៣ឆ្នាំនោះ៖ «ខ្ញុំសោកស្ដាយមែនទែន ដោយបាត់បង់ក្មួយជាទីស្រឡាញ់។ សូមតុលាការជួយផ្ដល់យុត្តិធម៌ឲ្យត្រឹមត្រូវផង»។
គ្រួសាររបស់កុមាររងគ្រោះ ឲ្យដឹងថា គេនឹងដាក់ពាក្យប្ដឹងទៅតុលាការថ្នាក់ខ្ពស់មួយជាន់ទៀត ជុំវិញករណីដែលតុលាការខេត្តសៀមរាប សម្រេចឲ្យប៉ូលិសដោះលែងក្មេងប្រុសដែលសម្លាប់មនុស្សនេះ។
ទោះជាយ៉ាងណា អាស៊ីសេរី មិនអាចសុំការពន្យល់ពីព្រះរាជអាជ្ញាអមសាលាដំបូងខេត្តសៀមរាប លោក កើត សុវណ្ណារ៉េត បានថាយ៉ាងណានៅឡើយនៅថ្ងៃទី២៨ ខែសីហា ដោយសារតែពេលទទួលទូរស័ព្ទ លោកប្រាប់ថាស្ដាប់គ្នាមិនច្បាស់។
ចំណែកអ្នកនាំពាក្យសាលាដំបូងខេត្តសៀមរាប លោក យិន ស្រាង មានប្រសាសន៍ថា លោកនៅមិនទាន់ដឹងរឿងនោះនៅឡើយ ក៏ប៉ុន្តែតាមនីតិវិធី គឺមិនអនុញ្ញាតឲ្យចាប់ខ្លួនកុមារដែលមានអាយុក្រោម ១៤ឆ្នាំឡើយ៖ «ក្មេងដែលប្រព្រឹត្តបទល្មើសអាយុក្រោម ១៤ឆ្នាំ គេមិនអាចឃាត់ខ្លួនវាបានទេ»។
អ្នកស៊ើបអង្កេតសមាគមការពារសិទ្ធិមនុស្សអាដហុក (ADHOC) ខេត្តសៀមរាប លោក ចាន់ ចំរើន ទទួលស្គាល់ថា នៅក្នុងក្រមព្រហ្មទណ្ឌមាត្រា៤០ ពិតជាមានចែងថា កុមារមិនអាចទទួលខុសត្រូវលើបទព្រហ្មទណ្ឌក៏ដោយ ក៏ប៉ុន្តែដោយសារកុមារសម្លាប់មនុស្ស ជាគោលការណ៍ គួរតែយកកុមារនោះទៅអប់រំផ្នែកស្មារតីនៅកន្លែងមួយដែលមិនមែនជាពន្ធនាគារ៕