រដ្ឋាភិបាលកម្ពុជា និងក្រុមហ៊ុន គ្រីសអេនើជី (Krisenergy) នៃប្រទេសសិង្ហបុរី នៅព្រឹកថ្ងៃទី២៣ សីហា ចុះហត្ថលេខាលើកិច្ចព្រមព្រៀងប្រេងកាតសម្រាប់ការអភិវឌ្ឍអណ្តូងប្រេងកាតនៅប្លុកអេ (A)។ ភាគីទាំងសងខាងរំពឹងថា ការអភិវឌ្ឍគម្រោងប្រេងកាតនៅប្លុក A នេះ នឹងរួមចំណែកដល់កំណើនសេដ្ឋកិច្ច និងការរីកចម្រើនរបស់កម្ពុជា តាមរយៈតំណក់ប្រេងដំបូងរបស់កម្ពុជា ដែលនឹងលេចចេញជារូបរាងនៅឆ្នាំ២០១៩ ខាងមុខនេះ។
ក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែ និងថាមពល គឺជាស្ថាប័នតំណាងនៃរដ្ឋាភិបាលកម្ពុជា ក្នុងពិធីចុះហត្ថលេខានេះ។
ចំណែកក្រុមហ៊ុន គ្រីសអេនើជីវិញ តំណាងដោយលោក ឃែលវិន តាំង (Kelvin Tang) ដែលជានាយកប្រតិបត្តិ និងជាប្រធានក្រុមហ៊ុន គ្រីសអេនើជី (KrisEnergy) ប្រចាំកម្ពុជា។
លោក ឃែលវិន តាំង (Kelvin Tang) អះអាងថា ក្រុមហ៊ុន គ្រីសអេនើជី នឹងធ្វើឲ្យកម្ពុជា ក្លាយជាប្រទេសផលិតប្រេងដូចបំណង ហើយតំណក់ប្រេងលើកដំបូងរបស់កម្ពុជា នឹងលេចជារូបរាងឡើងនៅឆ្នាំ២០១៩ ខាងមុខ។ លោកបញ្ជាក់ថា ក្រោយការចុះហត្ថលេខានេះ ក្រុមហ៊ុនរបស់លោកនឹងប្រកាសអំពីសេចក្តីសម្រេចចុងក្រោយលើការវិនិយោគបន្ត ដើម្បីសម្រេចបាននូវតំណក់ប្រេងដំបូងក្នុងរយៈពេល ២ឆ្នាំខាងមុខទៀតនេះ។
លោកបន្តថា បើទោះជាតម្លៃប្រេងនៅថេរដូចសព្វថ្ងៃ ឬមួយក៏ធ្លាក់ចុះក្នុងរយៈពេល ២ឆ្នាំខាងមុខទៀតក្តី ក៏ក្រុមហ៊ុនរបស់លោកនឹងនៅតែអាចប្រតិបត្តិការផលិតប្រេងក្នុងអណ្តូងប្រេងកម្ពុជា ដដែល។
ធនធានប្រេងកាតនៅក្នុងប្លុក A ដែលក្រុមហ៊ុន គ្រីសអេនើជី (KrisEnergy) ត្រូវធ្វើផលិតកម្មជំហានដំបូង គឺជំហាន 1 A និង 1 B នោះ មានរយៈពេលផលិតកម្ម ៩ឆ្នាំ និងមានសក្ដានុពលអាចផលិតប្រេងឆៅលើសពី ៣០លានបារ៉ែល។
លោក ឃែលវិន តាំង (Kelvin Tang) បញ្ជាក់តាមរយៈអ្នកបកប្រែថា ប្រេងដែលបូមបានពីអណ្តូងប្រេងកម្ពុជា នឹងត្រូវដាក់ដេញថ្លៃឲ្យក្រុមហ៊ុនជាតិ និងអន្តរជាតិ ដើម្បីជាប្រយោជន៍ដល់កម្ពុជា និងក្រុមហ៊ុន៖ «យើងផលិតប្រេងពីអណ្តូងលក់ទៅឲ្យអ្នកដេញថ្លៃណាដែលផ្តល់តម្លៃខ្ពស់ជាងគេ។ យើងលក់ឲ្យអ្នកទាំងអស់នោះ ដើម្បីជាប្រយោជន៍ដល់កម្ពុជា រដ្ឋាភិបាលកម្ពុជា ពលរដ្ឋកម្ពុជា និងក្រុមហ៊ុន»។
ក្រោមកិច្ចព្រមព្រៀងសម្រាប់ការអភិវឌ្ឍប្រេងនៅប្លុក A នេះ ក្រុមហ៊ុន គ្រីសអេនើជី (KrisEnergy) កាន់កាប់ភាគហ៊ុន ៩៥ភាគរយ ចំណែក ៥ភាគរយទៀត គឺជាភាគហ៊ុនរបស់រដ្ឋាភិបាលកម្ពុជា។
លោក ឃែលវិន តាំង (Kelvin Tang) បញ្ជាក់តាមរយៈអ្នកបកប្រែទៀតថា រដ្ឋាភិបាលទទួលបានអត្ថប្រយោជន៍រួចស្រេចទៅហើយតាមរយៈការប្រមូលពន្ធចំពោះប្រតិបត្តិការរបស់ក្រុមហ៊ុន ហើយការកាន់កាប់ភាគហ៊ុន ៥ភាគរយនេះ គឺមានន័យថា រដ្ឋាភិបាលនឹងក្លាយជាដៃគូធ្វើការរួមគ្នាជាមួយក្រុមហ៊ុន៖ «ភាគហ៊ុន ៥ភាគរយនេះ គឺខ្ពស់រួចជាស្រេចទៅហើយ និងអនុញ្ញាតឲ្យរដ្ឋាភិបាលធ្វើការជាដៃគូជាមួយក្រុមហ៊ុន ពិសេសយើងអង្គុយធ្វើការជាមួយគ្នា ដើម្បីអភិវឌ្ឍវិស័យនេះ ព្រមទាំងទាញយកផលចំណេញពីបច្ចេកវិទ្យារួមគ្នា។ សំខាន់នៅពេលខាងមុខនេះ គឺសង្ឃឹមថារដ្ឋាភិបាលនឹងអាចបង្កើតជាក្រុមហ៊ុនជាតិមួយផងដែរក្នុងការចម្រាញ់ប្រេង»។
តំបន់កិច្ចសន្យាប្លុក A មានទំហំជាង ៣ពាន់គីឡូម៉ែត្រការ៉េ (៣.០៨៣) ស្ថិតក្នុងអាងសមុទ្រខ្មែរក្នុងតំបន់ឈូងសមុទ្រថៃ ដែលមានជម្រៅទឹកចន្លោះពី ៥០ម៉ែត្រទៅ ៨០ម៉ែត្រ។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ថ្លែងថា ចំណូលពីវិស័យប្រេងកាតនេះ នឹងរួមចំណែកដល់ការអភិវឌ្ឍសេដ្ឋកិច្ច និងសង្គមកម្ពុជា៖ «កម្ពុជា មានទិសដៅច្បាស់លាស់ គឺនឹងមិនបណ្តោយខ្លួនឲ្យក្លាយជាប្រទេសដែលពឹងផ្អែកលើចំណូលប្រេង និងឧស្ម័នជាចរន្តដង្ហើមស្លាប់រស់នៃសេដ្ឋកិច្ចទេ ប៉ុន្តែនឹងប្រើប្រាស់ចំណូលនេះ រួមចំណែកក្នុងការកែទម្រង់រចនាសម្ព័ន្ធសេដ្ឋកិច្ច ដើម្បីធានាចីរភាព កំណើនក្នុងរយៈពេលមធ្យម និងវែង»។
ជុំវិញរឿងនេះ ទីប្រឹក្សាបច្ចេកទេស និងគោលនយោបាយផ្នែកឧស្សាហកម្ម-និស្សារណកម្មនៃអង្គការកម្មវិធីអភិវឌ្ឍន៍ធនធានយុវជន (YRDP) អ្នកស្រី គឹម ណាតាសា យល់ឃើញថា ការទទួលបានដំណក់ប្រេងនៅឆ្នាំ២០១៩ ខាងមុខ នឹងជួយបង្កើនចំណូលជាតិយ៉ាងច្រើនសម្រាប់គាំទ្រដល់ការផ្តល់សេវាសាធារណៈជូនពលរដ្ឋ ក៏ប៉ុន្តែរដ្ឋត្រូវធានាពីតម្លាភាពនៃការប្រមូល និងគ្រប់គ្រងចំណូលពីវិស័យមួយនេះ៖ «យើងលើកទឹកចិត្តឲ្យក្រសួងសេដ្ឋកិច្ច និងហិរញ្ញវត្ថុរាយការណ៍ពន្ធទៅលើប្រាក់ចំណេញរបស់ក្រុមហ៊ុនជាលម្អិត ដើម្បីឲ្យយើងអាចឃើញថា វិស័យប្រេងកាតបង្កើតបានជាចំណូលពន្ធចំនួនប៉ុន្មាន។ យើងក៏លើកទឹកចិត្តឲ្យក្រុមហ៊ុន KrisEnergy ខ្លួនឯងបន្តកិច្ចការរបស់គាត់ដែលមានតម្លាភាពកន្លងទៅ។ ចំណូលនឹងត្រូវប្រើប្រាស់ក្នុងខ្ទង់ថវិកាជាតិ ដើម្បីគាំទ្រវិស័យអាទិភាពមួយចំនួន ដូចជាវិស័យសុខាភិបាល អប់រំ កសិកម្ម និងវិស័យផ្សេងទៀតដែលចូលរួមក្នុងការកាត់បន្ថយភាពក្រីក្រ និងអភិវឌ្ឍសេដ្ឋកិច្ចជាតិយើង»។
ក្រុមហ៊ុន គ្រីសអេនើជី (KrisEnergy) គឺជាក្រុមហ៊ុនរុករកប្រេង (Upstream) ដែលធ្វើការទាក់ទងនឹងការរុករក វាយតម្លៃ អភិវឌ្ឍ និងផលិតប្រេង និងឧស្ម័ន។ ក្រុមហ៊ុននេះមានភាគហ៊ុនក្នុងតំបន់ផលិតកម្មប្រេង និងឧស្ម័នចំនួន ៥ ដោយក្នុងនោះ ៤តំបន់មានទីតាំងក្នុងឈូងសមុទ្រថៃ និងមួយទៀតក្នុងប្រទេសបង់ក្លាដេស (Bangladesh)៕