ចៅក្រមសាលាដំបូងខេត្តក្រចេះនៅថ្ងៃទី១៧ សម្រេចឃុំខ្លួនមន្ត្រីរដ្ឋបាលព្រៃឈើឆ្លូងម្នាក់ ឈ្មោះ ឃួន ជីវិន ដោយសង្ស័យថាជំរិតទារប្រាក់ពលរដ្ឋដឹកជន្លង់ម្រេច ក្នុងស្រុកស្នួល ខេត្តក្រចេះ។
ដីកាចៅក្រមសាលាដំបូងខេត្តក្រចេះលោក ញ៉ិល ប៊ុនលី បញ្ជាក់ថា លោក ឃួន ជីវិន ត្រូវបានឃុំខ្លួនបណ្ដោះអាសន្ន នៅពន្ធនាគារខេត្តក្រចេះ ពីបទរំលោភអំណាច តាមមាត្រា ៣៥ នៃច្បាប់ស្ដីពីការប្រឆាំងអំពើពុករលួយ និងបទអនុគ្រោះចំពោះបទល្មើសព្រៃឈើដោយមន្ត្រីរដ្ឋបាលព្រៃឈើ តាមមាត្រា ១០១ ចំណុចទី៣ នៃច្បាប់ស្ដីពីព្រៃឈើ។
អង្គភាពប្រឆាំងអំពើពុករលួយបានចាប់ខ្លួនលោក ឃួន ជីវិន កាលពីល្ងាចថ្ងៃទី១៦ សីហា ក្រោយបែកធ្លាយវីដេអូលើបណ្ដាញសង្គមហ្វេសប៊ុក (Facebook) បង្ហាញថា មន្ត្រីរដ្ឋបាលព្រៃឈើរូបនេះ បានជិះរថយន្តទំនើបមួយគ្រឿង ចុះជំរិតទារប្រាក់ពីពលរដ្ឋដែលដឹកជន្លង់ម្រេច តាមរថយន្តដឹកឈើចំនួន៣គ្រឿង ចាប់ពី១ម៉ឺន ដល់៤ម៉ឺនរៀល ក្នុងអំឡុងខែមេសា និងឧសភា កន្លងទៅ ក្នុងចំណុចផ្លូវលំភ្នំព្រិច ផ្លូវចូលថ្មម៉ាត ភូមិសាមគ្គី ឃុំស្វាយជ្រះ ស្រុកស្នួល។
កាលពីថ្ងៃទី១៥ សីហា ប្រធានមន្ទីរកសិកម្ម រុក្ខាប្រមាញ់ និងនេសាទ លោក គុយ ហួត បានសម្រេចផ្ទេរ និងសម្រួលភារកិច្ចលោក ឃួន ជីវិន ចេញពីមន្ត្រីផ្នែករដ្ឋបាលព្រៃឆ្លូង ទៅជាមន្ត្រីខណ្ឌរដ្ឋបាលព្រៃឈើក្រចេះ ដោយមិនបញ្ជក់ពីមូលហេតុ ឬមានវិធានការលើមន្ត្រីរូបនេះទេ ក្រោយបែកធ្លាយវីដេអូលោក ឃួន ជីវិន ទារប្រាក់ពលរដ្ឋ។
ទោះយ៉ាងណាក៏ដោយ ករណីមន្ត្រីដែលជំរិតទារប្រាក់ពីពលរដ្ឋនេះ ត្រូវបានមជ្ឈដ្ឋានអ្នកប្រើប្រាស់បណ្ដាញសង្គមហ្វេសប៊ុកបានបន្តចែកចាយដោយរិះគន់ ក៏ដូចជាស្នើឲ្យមានការចាត់វិធានការចំពោះមន្ត្រីរូបនេះ៕