មន្ត្រីត្រួតពិនិត្យចំណីអាហារខេត្តព្រះសីហនុ ស្នើឲ្យប្រជាពលរដ្ឋ ឬស្ត្រីមេផ្ទះ ឲ្យបន្តប្រុងប្រយ័ត្នចំពោះការទិញទំនិញ ឬទិញម្ហូបសមុទ្រស្រស់ និងបន្លែត្រីសាច់ ជាដើម ត្រូវពិនិត្យឲ្យបានត្រឹមត្រូវ ព្រោះមន្ត្រីជំនាញបានបន្តរកឃើញម្ហូបសមុទ្រស្រស់មានផ្ទុកសារធាតុគីមីម្យ៉ាងនាំឲ្យប៉ះពាល់ដល់សុខភាពអ្នកទទួលទាន។
អនុប្រធានសាខាកាំកុងត្រូលខេត្តព្រះសីហនុ លោក ជា ប៉ិច ឲ្យដឹងថា កន្លងទៅ មន្ត្រីជំនាញកាំកុងត្រូលខេត្តព្រះសីហនុ បានចុះពិនិត្យតាមផ្សារ តាមស្តង់អាជីវករលក់ម្ហូបសមុទ្រស្រស់ និងទំនិញច្រើនប្រភេទទៀតតាមទីផ្សារមួយចំនួននៅខេត្តព្រះសីហនុ ដូចជាផ្សារលើ ផ្សារអូរចំណារ និងផ្សារវាលរេញ ស្រុកព្រៃនប់ ជាដើម ដោយរកឃើញមានគេលួចដាក់សារធាតុគីមីហាមឃាត់នៅលើម្ហូបសមុទ្រមួយចំនួន ដើម្បីមើលទៅឃើញស្រស់ និងស្តុកទុកបានយូរថ្ងៃ។
លោក ជា ប៉ិច ព្រមានថានឹងចាត់វិធានការឲ្យធ្ងន់ធ្ងរតាមច្បាប់ បើអាជីវករទាំងឡាយណាដែលបានធ្វើកិច្ចសន្យាបញ្ឈប់លក់អាហារសមុទ្រមានផ្ទុកសារធាតុគីមី ប៉ុន្តែមិនស្តាប់តាមការណែនាំរបស់មន្ត្រីជំនាញនោះ៖ «ការប្រើសារធាតុគីមីនៅលើម្ហូបអាហារសមុទ្រស្រស់នេះ គឺមន្ត្រីជំនាញមិនអនុញ្ញាតឲ្យប្រើទេ ឧទាហរណ៍ដូចជាបូរ៉ាក់ និងហ្វ័រម៉ាលីន ហ្នឹង គឺមិនឲ្យប្រើនៅលើគ្រឿងសមុទ្រស្រស់ទេ។ ចំពោះគ្រឿងសមុទ្រស្រស់ដែលដាក់សារធាតុគីមីទាំងនេះ បានប៉ះពាល់ដល់សុខភាពមនុស្សធ្ងន់ធ្ងរ។ ហើយក្នុងករណីយើងប្រើលើសចំណុះ គឺវាអាចប៉ះពាល់ធ្ងន់ធ្ងរដល់ស្លាប់ក៏មានដែរ»។
កាលពីថ្ងៃទី១៥ ខែសីហា សាខាកាំកុងត្រូលខេត្តព្រះសីហនុ បានដឹកនាំមន្ត្រីជំនាញចុះត្រួតពិនិត្យផ្សព្វផ្សាយអំពីគុណភាព និងសុវត្ថិភាពម្ហូបអាហារទៅលើម្ហូបអាហារវេចខ្ចប់ស្រាប់ និងធ្វើតេស្ដលើគ្រឿងសមុទ្រស្រស់ មានបង្គា មឹក ប្រហិតចម្រុះ បន្លែ និងសរសៃគុយទាវ ជាដើម ដើម្បីរកសារធាតុគីមីហាមឃាត់នៅលើម្ហូបអាហារដាក់លក់នៅក្នុងផ្សារលើ និងទីផ្សារទំនើបនានា។
លោក ជា ប៉ិច ឲ្យដឹងថា មន្ត្រីជំនាញបានរកឃើញគ្រឿងសមុទ្របង្គាស្រស់ចំនួន ១៣គីឡូក្រាមមានដាក់លាយសារធាតុគីមីហ្វ័រម៉ាលីន (FORMALINE) ហាមឃាត់ ព្រោះនាំឲ្យប៉ះពាល់ដល់សុខភាពអ្នកទទួលទានធ្ងន់ធ្ងរ។
មន្ត្រីកាំកុងត្រូលខេត្តព្រះសីហនុ មិនបានចាត់វិធានការតាមផ្លូវច្បាប់ភ្លាមៗទៅលើក្រុមអាជីវករដែលលក់ម្ហូបសមុទ្រស្រស់ផ្ទុកសារធាតុគីមីហាមឃាត់នេះទេ ប៉ុន្តែបានធ្វើកិច្ចសន្យា បើទៅថ្ងៃខាងមុខ អាជីវករទាំងនោះមិនរាងចាល នឹងអនុវត្តតាមផ្លូវច្បាប់។
អាជីវករលក់ម្ហូបសមុទ្រមួយចំនួននៅផ្សារវាលរេញ ទទួលស្គាល់ថា កន្លងទៅផ្សារនេះពិតជាមានអាជីវករខិលខូចនៅតាមស្តង់ខ្លះបានដាក់លក់គ្រឿងសមុទ្រស្រស់ នាំចូលពីក្រៅប្រទេសមានផ្ទុកសារធាតុគីមីហាមឃាត់ និងថ្លឹងមិនគ្រប់គីឡូក្រាមបន្លំភ្នែកអ្នកទិញ ជាពិសេសបន្លំភ្ញៀវទេសចរ។ អាជីវកររូបនេះស្នើដល់អ្នកទិញម្ហូបសមុទ្រស្រស់នៅផ្សារវាលរេញ ត្រូវពិនិត្យម្ហូបសមុទ្រស្រស់នីមួយៗឲ្យបានត្រឹមត្រូវ មុននឹងទិញយកទៅចម្អិនទទួលទាន។ ករណីនេះ អាជីវករដែលរករបរទទួលទានស្មោះត្រង់ បានស្នើឲ្យមន្ត្រីជំនាញត្រួតពិនិត្យចំណីអាហារ ត្រូវបន្តចុះពិនិត្យការលក់ដូរម្ហូបសមុទ្រស្រស់នៅផ្សារវាលរេញ ឲ្យបានញឹកញាប់។
អ្នកឃ្លាំមើលការងារអភិវឌ្ឍន៍សង្គម និងស្ត្រីមេផ្ទះ បានគាំទ្រសកម្មភាពការងារចុះត្រួតពិនិត្យគុណភាពចំណីអាហារជាប្រចាំរបស់មន្ត្រីជំនាញកាំកុងត្រូលខេត្តព្រះសីហនុ តាមទីផ្សារនាមូលដ្ឋាននេះ។ ពួកគេស្នើឲ្យមន្ត្រីជំនាញត្រួតពិនិត្យម្ហូបអាហារ ឬទំនិញផ្សេងៗ ត្រូវកសាងសំណុំរឿងអ្នកជាប់ពាក់ព័ន្ធនឹងការដាក់លក់ទំនិញខូចគុណភាព និងផលិតគ្មានបច្ចេកទេស បញ្ជូនទៅកាន់តុលាការផ្ដន្ទាទោស ទើបរាងចាល៕