ខណៈការប្រឡងបាក់ឌុប នឹងមកដល់ក្នុងរយៈពេលមួយសប្ដាហ៍ទៀត យុវជនស្ម័គ្រចិត្តសង្កេតការណ៍ការប្រឡងចំនួនជាង ៣ពាន់នាក់ នៅថ្ងៃទី១៤ សីហា បានជួបជាមួយរដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង និងតំណាងសហភាពសហព័ន្ធយុវជនកម្ពុជា លោក សុះ មុះសិន ដើម្បីទទួលការណែនាំពីការងារសង្កេតការណ៍នេះ។ នេះបើតាមទំព័រហ្វេសប៊ុក (facebook) របស់ក្រសួងអប់រំ។
ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នឹងប្រព្រឹត្តទៅរយៈពេលពីរថ្ងៃ ចាប់ពីថ្ងៃទី២១ ដល់ថ្ងៃទី២២ ខែសីហា ឆ្នាំ២០១៧។ បេក្ខជនប្រឡងចំនួនជាង ១០ម៉ឺននាក់ទូទាំងប្រទេស ត្រូវរំពឹងថានឹងចូលរួមការប្រឡងបញ្ចប់ការសិក្សាចំណេះដឹងទូទៅកម្រិតវិទ្យាល័យ។
លទ្ធផលនៃការប្រឡង នឹងត្រូវប្រកាសនៅតាមមណ្ឌលប្រឡងនៅរាជធានីភ្នំពេញ និងខេត្តកណ្ដាល នៅរសៀលថ្ងៃទី១២ ខែកញ្ញា ឆ្នាំ២០១៧ ហើយសម្រាប់មណ្ឌលប្រឡងនៅខេត្តដទៃទៀត នឹងត្រូវប្រកាសនៅថ្ងៃទី១៣ ខែកញ្ញា ឆ្នាំ២០១៧៕