Clik here to view.
មន្ត្រីសមាគមការពារសិទ្ធិមនុស្សអាដហុក (ADHOC) រិះគន់មន្ត្រីរដ្ឋបាលសាលាខេត្តរតនគិរី ថាមានចេតនារឹតបន្តឹងសិទ្ធិសេរីភាពអង្គការសង្គមស៊ីវិល។ ការរិះគន់នេះដោយសារតែអាជ្ញាធរខេត្តនេះយឺតយ៉ាវក្នុងការឆ្លើយតបទៅនឹងលិខិតសុំពន្យារពេលបើកសិក្ខាសាលាស្ដីពីការអនុវត្តច្បាប់ និងសិទ្ធិដីធ្លីធនធានធម្មជាតិជនជាតិដើមភាគតិចនៅក្នុងខេត្តនេះ។
មន្ត្រីឃ្លាំមើលសិទ្ធិមនុស្សអង្គការអាដហុក អំពាវនាវឲ្យអាជ្ញាធរខេត្តរតនគិរី ឆ្លើយតបលិខិតសុំពន្យារពេលបើកសិក្ខាសាលារបស់អង្គការនេះដែលគ្រោងធ្វើនៅថ្ងៃទី២៥ ខែសីហា នៅសាលប្រជុំភោជនីយដ្ឋានរតនៈលីណា ក្រុងបានលុង។
ការអំពាវនាវនេះធ្វើឡើងបន្ទាប់ពីមន្ត្រីរដ្ឋបាលសាលាខេត្តរតនគិរី បានហៅមន្ត្រីសមាគមអាដហុក ទៅសាកសួរពីហេតុផលបើកសិក្ខាសាលា ហើយពោលពាក្យថា មិនអនុញ្ញាតឲ្យបើកសិក្ខាសាលានេះទេ ដោយសារតែឯកសារពាក់ព័ន្ធយកមកពិភាក្សាក្នុងសិក្ខាសាលាជារឿងរ៉ាវដីធ្លីចាស់ៗធ្វើឲ្យមន្ត្រីនោះសង្ស័យថា ការបើកសិក្ខាសាលានេះទំនងញុះញង់ពលរដ្ឋឲ្យសើរើរឿងជម្លោះដីធ្លីឡើងវិញ។
អ្នកសម្របសម្រួលសមាគមអាដហុក ខេត្តរតនគិរី លោក ឌិន ខុន្នី បញ្ជាក់ថា សិក្ខាសាលានេះធ្វើឡើងក្នុងគោលបំណងអញ្ជើញសហគមន៍មូលដ្ឋាន មន្ត្រីជំនាញពាក់ព័ន្ធជួបជុំគ្នាពិភាក្សាផ្លាស់ប្តូរយោបល់បង្កើនការយល់ដឹងជុំវិញការអនុវត្តច្បាប់សិទ្ធិដីធ្លី ធនធានធម្មជាតិ រួមទាំងស្វែងរកអនុសាសន៍បន្ថែមទៀត ដើម្បីចូលរួមដោះស្រាយបញ្ហាកើតមានចំពោះពលរដ្ឋនៅមូលដ្ឋានឲ្យកាន់តែប្រសើរ។
លោកបន្តថា មន្ត្រីរដ្ឋបាលសាលាខេត្តបានទទួលលិខិតជូនដំណឹងលើកថ្ងៃសិក្ខាសាលារយៈពេល ១០ថ្ងៃហើយ ប៉ុន្តែមិនទាន់ចេញលិខិតអនុញ្ញាត ឬបដិសេធនៅឡើយ បើទោះបីជាសមាគមបានជួបពិភាក្សា និងផ្ដល់ឯកសារជូនមន្ត្រីនោះរួចរាល់ក្តី៖ «សុំឲ្យសាលាពន្លឿនលិខិតរបស់យើងបើទោះគាត់អនុញ្ញាត ឬមិនអនុញ្ញាតក៏ដោយ ដើម្បីយើងយកលិខិតនោះជាផ្លូវការទៅពិភាក្សាជាមួយទីស្នាក់ការកណ្ដាល ហេតុអ្វីបានជាមិនអនុញ្ញាតឲ្យយើងធ្វើ»។
អភិបាលខេត្តស្ដីទី លោក ញ៉ែម សំអឿន កាលពីថ្ងៃទី១១ ខែកក្កដា បានធ្វើលិខិតឆ្លើយតបទៅនឹងលិខិតជូនដំណឹងបើកសិក្ខាសាលារបស់មន្ត្រីសមាគមអាដហុក ខេត្តរតនគិរី ចុះថ្ងៃទី៥ ខែកក្កដា ក៏ប៉ុន្តែសុំឲ្យមន្ត្រីសមាគមនេះផ្ដល់ឯកសារពាក់ព័ន្ធធ្វើបទបង្ហាញក្នុងសិក្ខាសាលាមកមន្ត្រីជំនាញពិនិត្យឲ្យបានមុនពេលបើកសិក្ខាសាលា ក៏ប៉ុន្តែការរៀបចំឯកសារធ្វើមិនទាន់ទើបសមាគមអាដហុក សុំពន្យារពេលទៅថ្ងៃទី២៥ ខែសីហា វិញ។
អ្នកនាំពាក្យសាលាខេត្តរតនគិរី លោក ញ៉ែម សំអឿន បញ្ជាក់ថា លោកជាប់ភារៈនៅបរទេស មិនបានដឹងរឿងនេះទេ។ ចំណែកមន្ត្រីសាលាខេត្តរតនគិរី ឈ្មោះ ឈុន ដែលគ្រប់គ្រងឯកសារសុំបើកសិក្ខាសាលាបញ្ជាក់ថា ប្រធានការិយាល័យមិនទាន់សម្រេចយ៉ាងណានៅឡើយទាក់ទិនលិខិតសុំពន្យារពេលសិក្ខាសាលានេះ៖ «យើងកំពុងពិភាក្សាគ្នា មិនដឹងម៉េចទេ ចាំមើលខ្ញុំសួរមេខ្ញុំសិន»។
មន្ត្រីកម្មវិធីបណ្ដាញសហគមន៍នៃសមាគមអាដហុក លោក ប៉ែន ប៊ុណ្ណារ៍ បញ្ជាក់ថា អាជ្ញាធរខេត្តរតនគិរី បានគាំទ្រសិក្ខាសាលាបែបនេះច្រើនឆ្នាំមកហើយ។ ដោយឡែកអាជ្ញាធរខេត្តក៏បានអនុញ្ញាតឲ្យធ្វើសិក្ខាសាលានេះរួចហើយដែរ។ លោករំពឹងថា អាជ្ញាធរខេត្តនឹងពិនិត្យដោះស្រាយករណីនេះបានល្អប្រសើរឡើងវិញ ដើម្បីរួមគ្នាអនុវត្តច្បាប់បានត្រឹមត្រូវ៖ «រឿងនេះត្រូវតែអនុញ្ញាត ពីព្រោះមិនមែនយើងបើកលើកទី១ទេក្នុងខេត្តហ្នឹង យើងបើកច្រើនដងហើយ យើងទទួលការគាំទ្រពីអាជ្ញាធរខេត្ត អ៊ីចឹងបើគាត់មិនព្រម គាត់ជាអ្នកទទួលខុសត្រូវ»។
សិក្ខាសាលាស្ដីពីការអនុវត្តច្បាប់និងសិទ្ធិដីធ្លីធនធានធម្មជាតិជនជាតិដើមភាគតិច គ្រោងធ្វើនៅថ្ងៃទី២៥ ខែសីហា នឹងមានសហគមន៍មកពីស្រុកក្រុងទាំង ៩ រួមទាំងមន្ត្រីមូលដ្ឋានឃុំ ស្រុក ខេត្ត និងមន្ត្រីជំនាញពាក់ព័ន្ធសរុប ៨០នាក់ ត្រូវបានអញ្ជើញចូលរួម៕
