ក្នុងឱកាសខួបទី៥០ នៃការបង្កើតសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន (ASEAN) សមាជិកសភាអាស៊ានផ្នែកសិទ្ធិមនុស្ស ទទូចឲ្យសមាគមអាស៊ានត្រូវពង្រឹងយន្តការតំបន់ ដើម្បីលើកកម្ពស់ និងការពារសិទ្ធិមនុស្ស ព្រមទាំងធានាថា សហគមន៍ទាំងអស់ក្នុងប្រជាជាតិអាស៊ាន ទទួលបានអត្ថប្រយោជន៍ពីភាពរីកចម្រើនរុងរឿងនៅក្នុងតំបន់។
សេចក្តីថ្លែងការណ៍ចុះថ្ងៃទី៨ សីហា បន្តថា បើមិនដូច្នេះទេ សមាគមប្រជាជាតិអាស៊ីអាគ្នេយ៍ដែលបង្កើតឡើងតាំងពី ៥០ឆ្នាំមុននោះ នឹងបរាជ័យដោយមិនសម្រេចបាននូវសុបិនរបស់ខ្លួនឡើយ។
សមាជិកនាយកគ្រប់គ្រងនៃសមាជិកសភាអាស៊ានផ្នែកសិទ្ធិមនុស្ស និងជាតំណាងរាស្ត្រខ្មែរ អ្នកស្រី មូរ សុខហួរ មានប្រសាសន៍នៅក្នុងសេចក្តីថ្លែងការណ៍ដដែលថា «ប្រសិនបើមនុស្សភាគច្រើនមិនអាចទទួលបានអត្ថប្រយោជន៍ពីសុខសន្តិភាព និងការរីកចម្រើនផ្នែកសេដ្ឋកិច្ចទេនោះ មានន័យថា បេសកកម្មរបស់យើងមិនទាន់ចប់នៅឡើយទេ។ ដើម្បីអាស៊ានទទួលបានសក្ដានុពលពេញលេញរបស់ខ្លួន យើងត្រូវតែធានាថា សិទ្ធិទាំងអស់របស់មនុស្ស រួមទាំងសិទ្ធិស្ត្រី សិទ្ធិរបស់ជនជាតិភាគតិច សិទ្ធិជំនឿសាសនា និងសិទ្ធិរបស់ក្រុមមនុស្សងាយទទួលរងគ្រោះផ្សេងទៀត ត្រូវតែទទួលបានការគោរព និងការពារ ជាពិសេសទៀតនោះ យន្តការអាស៊ានត្រូវតែពង្រឹង ដើម្បីធានាថា និទ្ទណ្ឌភាព ឬភាពរួចទោសទណ្ឌលែងមានទៀត»៕