ក្រុមអ្នកធ្វើកំណាយជាតិ និងអន្តរជាតិ បានកំណត់ថា ប្រាសាទទន្លេស្ងួត ឬអ្នកខ្លះហៅថាប្រាសាទតុប នៅភូមិនគរក្រៅ សង្កាត់គោកចក ក្រុងសៀមរាប គឺជាអតីតមន្ទីរពេទ្យបុរាណ ភាគខាងជើងរបស់សម័យអង្គរ។
ការកំណត់បែបនេះ បន្ទាប់ពីក្រុមអ្នកធ្វើកំណាយចម្រុះជាតិសាសន៍បានប្រទះឃើញរូបបដិមាធ្វើពីថ្មភក់ចំនួន ៥ ទៀត ដែលកប់នៅក្រោមដី ហើយក្នុងចំណោមបដិមាទាំងនោះ មានមួយអង្គគឺជារូបព្រះពុទ្ធស្ដេចថ្នាំ ដែលភាសាសំស្ក្រឹតហៅថា ភៃសជ្យគុរុ (ភៃសៈជៈយៈគុរុ)។
ក្រុមអ្នកធ្វើកំណាយចម្រុះជាតិសាសន៍ដែលសហការជាមួយអ្នកជំនាញអាជ្ញាធរអប្សរា បានរកឃើញបដិមាបុរាណធ្វើពីថ្មភក់ចំនួន ៥ ទៀតនៅក្នុងបរិវេណប្រាសាទទន្លេស្ងួត នៅភាគខាងជើងអង្គរធំកាលពីថ្ងៃទី៧ ខែសីហា។
មន្ត្រីមជ្ឈមណ្ឌលអន្តរជាតិ និងតម្កល់ឯកសារអង្គរ ដែលជាប្រធានការដ្ឋានកំណាយនោះ គឺលោក ខៀវ ចាន់។ លោកមានប្រសាសន៍នៅព្រឹកថ្ងៃអង្គារ ទី៨ ខែសីហា ថា ការរកឃើញរូបបដិមាបុរាណចំនួន ៥ ជាថ្មីទៀតនេះ នៅស្របពេលដែលក្រុមអ្នកជំនាញរបស់អាជ្ញាធរអប្សរាសហការជាមួយអ្នកជំនាញចម្រុះជាតិសាសន៍នៃសាកលវិទ្យាល័យសិង្ហបុរី ធ្វើកំណាយដើម្បីសិក្សាអំពីមន្ទីរពេទ្យបុរាណដែលឈ្មោះថា ប្រាសាទទន្លេស្ងួត នោះបានរយៈពេលជាង ១០ថ្ងៃមក។
លោក ខៀវ ចាន់ បញ្ជាក់ថា ការជីកដីរកឃើញបដិមាបុរាណចំនួន៥ នៅត្រង់ចំណុចផ្លូវដែលអ្នកភូមិតែងដើរចេញចូល គឺដោយសារតែអ្នកភូមិប្រាប់ថា ពេលមកដល់ត្រង់នោះ គឺហាក់ដូចជាមានអ្វីម្យ៉ាងចង់តែបង្កហេតុឲ្យគេមានគ្រោះថ្នាក់ ហើយថ្មីៗមានបុរសម្នាក់បានជិះម៉ូតូដួលនៅកន្លែងនោះ ដោយគ្រាន់តែជាន់ដុំថ្មតូចមួយផុសចេញមកពីក្នុងដី៖ «ពេលដែលឃើញថ្មបន្តិចផុសចេញហ្នឹង យើងមិនដឹងថាជាអ្វីទេ ប៉ុន្តែពេលដែលខ្ញុំកាយមើលទៅ ឃើញបំណែកថ្មមានឆ្លាក់ជាក្បាច់ស្រកានាគ ហើយយើងក៏ពិគ្រោះគ្នាជាមួយអ្នកជំនាញជីករណ្ដៅតូចមួយ ដើម្បីយករូបទាំងនោះចេញ»។
អនុប្រធាននាយកដ្ឋានមជ្ឈមណ្ឌលអន្តរជាតិ និងតម្កល់ឯកសារអង្គរ លោក អ៊ឹម សុខរិទ្ធី ឲ្យដឹងថា រូបទាំង៥ ដែលគេប្រទះឃើញនោះមានទម្រង់ផ្សេងៗពីគ្នា ដោយខ្លះទំនងជារូបទេពប្រណម្យ ប៉ុន្តែរូបមួយក្នុងចំណោមនោះ លោកអះអាងថាគឺជាព្រះពុទ្ធស្ដេចថ្នាំ ដែលភាសាសំស្ក្រឹតហៅថា ភៃសជ្យគុរុ៖ «ដែលយើងសម្គាល់ថានេះជាព្រះពុទ្ធស្ដេចថ្នាំ ដោយសារមានសមាធិ ដាក់ព្រះហស្ដឆ្វេងនៅលើព្រះហស្ដស្ដាំ ហើយបាតដៃនៃព្រះហស្ដស្ដាំមានរូបភាពផ្លែឈើ ដែលខ្មែរហៅថាផ្លែស្រម៉»។
រូបទាំង៥ ដែលគេទើបជីកដីរកឃើញនេះ បានបែកបាក់ជាច្រើនផ្នែកទៅហើយ។
អ្នកស្រាវជ្រាវបុរាណវិទ្យាមកពីប្រទេសសិង្ហបុរី លោក លឹម ចេនស៊ាន (Lim Chen Sian) បានសម្ដែងអារម្មណ៍រំភើប ដោយលោកបញ្ជាក់ថា នេះជាលើកទី៥ ហើយដែលលោកមកធ្វើកំណាយនៅកម្ពុជា មិនដែលបានជួបរូបបដិមាដូច្នេះទេ។
ចំណែកអ្នកបុរាណវិទ្យាអាមេរិកាំង លោក ដេវីដ ខាលយ៍ (David Kyle) មានប្រសាសន៍ថា នេះជាលើកដំបូងហើយដែលលោកបានឃើញរូបបដិមាបុរាណ បន្ទាប់ពីរូបលោកបានចូលរួមធ្វើកំណាយនៅកម្ពុជា ជាច្រើនលើកមកហើយ។
កាលពីថ្ងៃទី២៩ ខែកក្កដា ក្រុមអ្នកធ្វើកំណាយចម្រុះជាតិសាសន៍នេះ បានរកឃើញរូបបដិមាទ្វារបាលទម្ងន់ប្រហែល ៣០០គីឡូក្រាម នៅប្រាសាទទន្លេស្ងួត នោះម្ដងមកហើយ៕