អាជ្ញាធរខេត្តកំពង់ធំ នឹងចាត់វិធានការផ្លូវច្បាប់ករណីបែងចែកដីព្រៃសហគមន៍នៅឃុំត្រពាំងឫស្សី ស្រុកកំពង់ស្វាយ ក្រោយពេលប្រជាសហគមន៍នៅឃុំត្រពាំងឫស្សី បានដាក់លិខិតអន្តរាគមន៍ទៅអាជ្ញាធរខេត្តឱ្យជួយដោះស្រាយចំពោះករណីអាជ្ញាធរមូលដ្ឋានបែងចែកដីព្រៃសហគមន៍របស់ពួកគាត់ទៅឱ្យពលរដ្ឋតំបន់ផ្សេង។ សហគមន៍ថា ការធ្វើបែបនេះ នឹងបណ្ដាលឱ្យប៉ះពាល់ដល់ជីវភាពរស់នៅរបស់ពួកគាត់។
អាជ្ញាធរខេត្តកំពង់ធំ បញ្ជាក់ថា ក្រុមការងាររបស់ខ្លួន និងស្ថាប័នពាក់ព័ន្ធ នឹងចុះពិនិត្យស្ថានភាពដីព្រៃសហគមន៍ឃ្មុំស្រករថ្លុកឫស្សី ស្ថិតនៅឃុំត្រពាំងឫស្សី នៅសប្ដាហ៍ក្រោយ។ ការអះអាងបែបនេះ ក្រោយពេលអាជ្ញាធរខេត្តទទួលបានពាក្យបណ្ដឹងសុំអន្តរាគមន៍ពីប្រជាសហគមន៍ឃុំត្រពាំងឫស្សី តាមរយៈអង្គការលីកាដូ (LICADHO) ខេត្ត ដែលបានដាក់ជូនអភិបាលខេត្តកំពង់ធំ កាលពីថ្ងៃទី២៧ ខែកក្កដា។
អ្នកនាំពាក្យសាលាខេត្តកំពង់ធំ លោក គង់ វិមាន មានប្រសាសន៍ថា ប្រសិនបើការចុះស៊ើបអង្កេតលើករណីនេះ រកឃើញដូចអ្វីដែលប្រជាសហគមន៍លើកឡើង អាជ្ញាធរនឹងចាត់វិធានការតាមច្បាប់ ប៉ុន្តែលោកមិនទាន់អាចបញ្ជាក់ថា វិធានការតាមច្បាប់នោះបែបណាទេ ពីព្រោះអាជ្ញាធរនៅមិនទាន់មានរបាយការណ៍ស្រាវជ្រាវនៅឡើយ៖ «វិធានការផ្លូវច្បាប់ច្បាស់ជាមាន ព្រោះយើងដឹងហើយ ទីតាំងដីសហគមន៍ជាទីតាំងដីមួយដែលមានការហាមឃាត់ សម្រាប់ទុកជូនបងប្អូនប្រជាពលរដ្ឋ»។
ដីព្រៃសហគមន៍ឃ្មុំស្រករថ្លុកឫស្សី ស្ថិតនៅភូមិល្វៃ ឃុំត្រពាំងឫស្សី បង្កើតឡើងកាលពីឆ្នាំ១៩៩៩ ដែលមានទំហំជិត ៨០០ហិកតារ ហើយនៅឆ្នាំ២០០៨ សហគមន៍មួយនេះ ត្រូវបានអាជ្ញាធរ និងមន្ត្រីជំនាញទទួលស្គាល់តាមច្បាប់ និងមានទំហំផ្ទៃដីនៅសល់ជាង ៦០០ហិកតារ។ ប៉ុន្តែចាប់តាំងពីសហគមន៍មួយនេះទទួលស្គាល់ជាផ្លូវការ ផ្ទៃដីព្រៃសហគមន៍បាត់បង់បន្តិចម្តងៗ តាមរយៈការកាប់រុករាន និងឈូសឆាយជាបន្តបន្ទាប់ ពីសំណាក់ពលរដ្ឋនៅភូមិអូររំដេង មេភូមិ និងអនុភូមិមួយចំនួនដែលបានឃុបឃិតគ្នា បណ្ដាលឱ្យប៉ះពាល់ដីព្រៃសហគមន៍ជាង ៣០០ហិកតារ។ ជាងនេះទៀត កាលដើមខែកក្កដា អាជ្ញាធរឃុំសម្រេចបែងចែកដីសហគមន៍មួយនេះឱ្យពលរដ្ឋនៅភូមិផ្សេងចំនួន ៦០គ្រួសារ ធ្វើឱ្យប្រជាសហគមន៍មូលដ្ឋានយល់ថា ការបែងចែកនោះ គ្រាន់តែជាលេសបិទបាំងសកម្មភាពលក់ដីសហគមន៍កន្លងមក ម្យ៉ាងធ្វើឱ្យដីសហគមន៍ធ្លាក់លើដៃឈ្មួញ ឬអ្នកមានប្រាក់ដោយស្របច្បាប់ប៉ុណ្ណោះ។
អតីតប្រធានព្រៃសហគមន៍ និងបច្ចុប្បន្នជាសមាជិកព្រៃសហគមន៍ឃ្មុំស្រករថ្លុកឫស្សី លោក យឹម យឿន មានប្រសាសន៍កាលពីថ្ងៃទី៣ ខែសីហា ថា ពលរដ្ឋនៅភូមិល្វៃ ជាង ១០០គ្រួសារ ព្រមទាំងពលរដ្ឋនៅតំបន់ផ្សេងជាច្រើនទៀត ទទួលផលប្រយោជន៍ពីព្រៃសហគមន៍មួយនេះ ដូចជាលែងគោក្របី រកអនុផលព្រៃឈើ និងជាជម្រកសត្វព្រៃទៀតផង។ លោកទាមទារឱ្យអាជ្ញាធរចាត់វិធានការលើជនប្រព្រឹត្ត និងអ្នកសមគំនិត ព្រមទាំងរក្សាទុកដីព្រៃសហគមន៍ជាសម្បត្តិរួមដដែល៖ «បាទ! នៅពេលដីមានតម្លៃ បានដីហ្នឹងចែកទៅប្រជាជនគេផ្សេង។ គ្រាន់ថា ប្រជាជនពួកខ្ញុំហ្នឹង ការពារដីរដ្ឋ»។
មន្ត្រីសម្របសម្រួលស្ដីទីនៃអង្គការលីកាដូ ខេត្តកំពង់ធំ លោក ឈួម រុណ ដែលបានតាមដានករណីនេះ ស្វាគមន៍ចំពោះចំណាត់ការរបស់អាជ្ញាធរខេត្ត ដែលគ្រោងនឹងចុះស៊ើបអង្កេតចំពោះសំណុំរឿងបែងចែកដីព្រៃសហគមន៍។ យ៉ាងនេះក្តី លោកចង់ឱ្យអាជ្ញាធរ និងស្ថាប័នជំនាញធ្វើការងារនេះដោយពិតប្រាកដ និងយុត្តិធម៌ ដើម្បីរួមចំណែកការពារព្រៃសហគមន៍ឱ្យនៅគង់វង្ស។ លោកទទួលដំណឹងថា ប្រជាសហគមន៍រងការគំរាមកំហែងពីអាជ្ញាធរមូលដ្ឋានមួយចំនួន ដោយសារពួកគាត់បានបញ្ចេញព័ត៌មានអំពីការបែងចែកដីព្រៃសហគមន៍។ ករណីនេះ លោកសោកស្ដាយ ព្រោះអ្នកដែលចូលរួមការពារប្រយោជន៍រួម បែរជារងការគំរាមកំហែងទៅវិញ៖ «មានការអន្តរាគមន៍របស់អង្គការលីកាដូ ទៅខាងខេត្តហើយ ប្រសិនបើខាងខេត្តគាត់មានចេតនាចង់ការពារព្រៃសហគមន៍ ឱ្យគាត់ចុះទៅអង្កេតផ្ទាល់ទៅ»។
លោក ឈួម រុន អះអាងថា ដីព្រៃសហគមន៍ដែលទទួលស្គាល់ដោយច្បាប់គឺមិនអាចបែងចែកបានឡើយ ហើយករណីអាជ្ញាធរមូលដ្ឋានបែងចែកជូនពលរដ្ឋតំបន់ផ្សេងគឺជារឿងខុសច្បាប់៕