មន្ត្រីសង្គមស៊ីវិល ស្នើឲ្យមន្ត្រីប្រចាំការនៅច្រកទ្វារព្រំដែនអន្តរជាតិកម្ពុជា-ថៃ ច្រកចាំយាម ខេត្តកោះកុង ឲ្យជួយថែរក្សាអនាម័យបរិស្ថាននៅតាមមាត់ច្រកនេះឲ្យមានសោភ័ណភាព និងមានរបៀបរៀបរយ ព្រោះបច្ចុប្បន្ននេះ បើធ្វើការប្រៀបធៀបអនាម័យបរិស្ថាននៅមាត់ច្រកទ្វារព្រំដែនខាងទឹកដីថៃ វិញ គឺច្រកទ្វារខាងកម្ពុជា គ្មានសណ្ដាប់ធ្នាប់ និងគ្មានអនាម័យនោះទេ។
អ្នកឃ្លាំមើលការងារអភិវឌ្ឍន៍សង្គមមួយចំនួនរួមមាន សមាគមអាដហុក (ADHOC) និងអង្គការលីកាដូ (LICADHO) ប្រចាំខេត្តកោះកុង បានឲ្យដឹងថា បរិស្ថានអនាម័យ និងសណ្ដាប់ធ្នាប់នៅច្រកទ្វារកម្ពុជា-ថៃ ច្រកចាំយាម មានសភាពគគ្រិច និងតែងទទួលរងការរិះគន់ពីភ្ញៀវទេសចរជាតិ និងអន្តរជាតិជាបន្តបន្ទាប់។
អ្នកសម្របសម្រួលសមាគមអាដហុក (ADHOC) ប្រចាំខេត្តកោះកុង លោក ញៀប សំអឿន ដែលបានចុះទៅដល់ច្រកទ្វារព្រំដែនអន្តរជាតិកម្ពុជា-ថៃ ច្រកចាំយាម ខេត្តកោះកុង បានស្នើដល់មន្ត្រីថ្នាក់ដឹកនាំនៅច្រកទ្វារចាំយាម ត្រូវជួយសម្អាតបរិស្ថាននៅតាមច្រកមួយនេះឲ្យបានប្រសើរជាងរាល់ថ្ងៃនេះ ព្រោះច្រកនេះមានភ្ញៀវជាតិ និងអន្តរជាតិ ចេញចូលជាប់មិនដាច់ ប៉ុន្តែបែរជាបរិស្ថានខាងទឹកដីកម្ពុជា គ្មានអនាម័យទេ។
បន្ថែមលើនេះ លោក ញៀប សំអឿន ក៏ស្នើឲ្យសមត្ថកិច្ចទទួលខុសត្រូវនៅច្រកទ្វារនេះ ត្រូវរៀបចំសណ្ដាប់ធ្នាប់នៃការចតយានយន្តឲ្យមានរបៀបរៀបរយ ពិសេសរថយន្តដឹក ឬផ្ទេរទំនិញ ជាដើម៖ «យើងស្នើសុំឲ្យអាជ្ញាធរពាក់ព័ន្ធ លោកបន្តយកចិត្តទុកដាក់នូវទំនិញខូចគុណភាព ក៏ដូចជាការរៀបចំនូវច្រកចេញចូលរវាងព្រះរាជាណាចក្រកម្ពុជា និងព្រះរាជាណាចក្រថៃ នៅច្រកចាំយាម ខេត្តកោះកុង នេះ។ ស្នើឲ្យលោករៀបចំសណ្ដាប់ធ្នាប់នៅតាមដងផ្លូវ ធ្វើម៉េចឲ្យមើលទៅមានសោភ័ណភាពល្អ ព្រោះរាល់ថ្ងៃនេះ យើងមើលទៅឃើញមិនទាន់រៀបចំសណ្ដាប់ធ្នាប់ហ្នឹងមិនទាន់បានល្អទេ គឺនៅមានចតរថយន្ត ឬម៉ូតូពាសពេញផ្លូវអនាធិបតេយ្យ និងគ្មានសណ្ដាប់ធ្នាប់ទេ»។
ទាក់ទងរឿងនេះ អ្នកសម្របសម្រួលអង្គការលីកាដូ (LICADHO) ប្រចាំខេត្តកោះកុង លោក អ៊ិន គង់ជិត ក៏ស្នើឲ្យមន្ត្រីទទួលខុសត្រូវច្រកទ្វារចាំយាម ខេត្តកោះកុង ត្រូវពង្រឹងការងារសម្អាតអនាម័យបរិស្ថាននៅមាត់ច្រកនេះឲ្យបានល្អជាប្រចាំ ដើម្បីកុំឲ្យភ្ញៀវទេសចរជាតិ និងអន្តរជាតិរិះគន់ ដែលនាំឲ្យបាត់បង់កិត្តិយសប្រទេសកម្ពុជា។
មន្ត្រីសមាគមអាដហុក និងអង្គការលីកាដូ ប្រចាំខេត្តកោះកុង ក៏ស្នើដល់រដ្ឋមន្ត្រីក្រសួងស្ថាប័នពាក់ព័ន្ធថ្នាក់ជាតិ មានក្រសួងមហាផ្ទៃ ជាដើម ពិនិត្យមើល និងជំរុញទៅមន្ត្រីក្រោមឱវាទប្រចាំការនៅច្រកព្រំដែនអន្តរជាតិ ច្រកចាំយាម ខេត្តកោះកុង នេះ ឲ្យពង្រឹងការងារថែរក្សាសម្អាតបរិស្ថានឲ្យបានប្រសើរជាងពេលបច្ចុប្បន្ន ដើម្បីកុំឲ្យខ្មាសខាងភាគីថៃ និងអាប់ឱនដល់កិត្តិយសប្រទេសកម្ពុជា ថែមទៀតនាថ្ងៃអនាគត។
អាស៊ីសេរី មិនទាន់អាចទាក់ទងលោក ង៉ុយ ជៀង ប្រធានច្រកទ្វារអន្តរជាតិចាំយាម ខេត្តកោះកុង ដើម្បីបំភ្លឺជុំវិញការងារថែរក្សាសម្អាតបរិស្ថាននៅតាមច្រកទ្វារចាំយាមបានទេ នៅថ្ងៃអង្គារ ទី១ ខែសីហា។
ចំណែកភ្ញៀវទេសចរជាតិ និងអន្តរជាតិមួយចំនួនដែលបានធ្វើដំណើរឆ្លងកាត់តាមច្រកទ្វារចាំយាម នេះ ក៏បានរិះគន់បរិស្ថានខាងទឹកដីកម្ពុជា ថាគ្មានអនាម័យដែរ។ ភ្ញៀវទេសចរទាំងនោះ ក៏ស្នើឲ្យអ្នកទទួលខុសត្រូវច្រកទ្វារអន្តរជាតិចាំយាម ត្រូវដាក់ផែនការសម្អាតអនាម័យបរិស្ថាន ដើម្បីឲ្យមានសោភ័ណភាពជាងពេលបច្ចុប្បន្ន ព្រោះបើប្រៀបធៀបបរិស្ថានអនាម័យនៅខាងទឹកដីថៃ វិញ ខុសគ្នាស្រឡះ៕