មន្ត្រីនគរបាលនៃអគ្គស្នងការដ្ឋាននគរបាលជាតិ ប្រកាសថា រហូតមកដល់ពេលនេះ មិនមានករណីចាប់ក្មេងវះយកក្រលៀន ឬគ្រឿងក្នុងទេនៅក្នុងប្រទេសកម្ពុជា។ ការប្រកាសនេះ គឺបន្ទាប់ពីការស្រាវជ្រាវនៅតាមរាជធានី-ខេត្តចំនួន២៥ ដែលលេចឮព័ត៌មានទាំងនេះ។
អគ្គស្នងការរងនៃអគ្គស្នងការដ្ឋាននគរបាលជាតិ លោក គៀត ច័ន្ទថារិទ្ធិ មានប្រសាសន៍នៅព្រឹកថ្ងៃទី៣១ កក្កដា ថា ក្នុងចំណោមព័ត៌មានដែលទទួលបានចំនួន ១៥ករណីក្នុងរយៈពេលជាង ២០ថ្ងៃ ថាមានករណីចាប់កូនក្មេងវះយកក្រលៀន ភ្នែក ឬគ្រឿងក្នុងដទៃទៀតនោះ គឺមិនពិតទេ ហើយថាជាការបំពុលបរិយាកាសសន្តិសុខសង្គម៖ «គាត់បំផុសថា អាហ្នឹងមនុស្សចាប់ក្មេង ឥឡូវគេចាប់បានហើយ។ ប៉ុន្តែតាមពិត ដល់ពេលយើងសួរបញ្ហាទៅថា ហេតុអីបានពីរនាក់ហ្នឹងរត់? ពីរនាក់ហ្នឹង វាមានដីកាចាប់ខ្លួន វាធ្លាប់ប្រព្រឹត្តអំពើមិនល្អ វាមានដីកាចាប់ខ្លួន។ អ៊ីចឹងដល់ពេលនគរបាលទៅដល់ វាភ័យ ហើយរត់។ អានេះវារឿងផ្សេងទេតើ! ប៉ុន្តែ ណៃ ស៊ីណេង ហ្នឹង គាត់ទៅបំផុសថា អាហ្នឹងវាជាករណីចាប់ក្មេង។ អានេះចង់ចេតនាបំផុសព័ត៌មានមិនពិត ដែលធ្វើឲ្យសង្គមអសន្តិសុខច្របូកច្របល់»។
លោកបញ្ជាក់បន្ថែមថា ព័ត៌មានមិនពិតអំពីការចាប់កូនក្មេងវះយកក្រលៀន និងគ្រឿងក្នុងនេះ ទទួលបានពីខេត្ត-រាជធានីចំនួន១០ ហើយចុងក្រោយ គឺករណីនៅស្រុកបារាយ ខេត្តកំពង់ធំ កាលពីថ្ងៃទី២៩ កក្កដា ដែលជនសង្ស័យរឿងចោរកម្ម ២នាក់ត្រូវអ្នកស្រុកចាប់វាយធ្វើបាបធ្ងន់ធ្ងរ ព្រោះសង្ស័យថាជាអ្នកចាប់កូនក្មេង។ លោកថា ករណីនេះបានបង្កឲ្យមានអសន្តិសុខ ដោយសារអ្នកលេងហ្វេសប៊ុកម្នាក់ឈ្មោះ ណៃ ស៊ីណេង (Nay Sineng) បង្ហោះព័ត៌មានថា ជនទាំង ២នាក់ជាអ្នកចាប់កូនក្មេងវះយកក្រលៀន។
លោក ណៃ ស៊ីណេង ជាសកម្មជនគណបក្សសង្គ្រោះជាតិ ត្រូវបានអាជ្ញាធរខេត្តកំពង់ធំ ស្រាវជ្រាវឃាត់ខ្លួនតាមបញ្ជារបស់ព្រះរាជអាជ្ញាកាលពីថ្ងៃទី៣០ កក្កដា គឺមួយថ្ងៃក្រោយពេលដែលលោកបង្ហោះព័ត៌មាននោះតាមហ្វេសប៊ុកថា នៅភូមិអណ្ដូងពោធិ៍ ឃុំគ្រើល ស្រុកបារាយ មានករណីជនជាតិវៀតណាម ៣នាក់ចាប់កូនក្មេងវះយកក្រលៀន និងភ្នែក ហើយត្រូវប្រជាពលរដ្ឋចាប់បាន ២នាក់ រត់រួចម្នាក់។ ក្រោយពេលឃាត់ខ្លួន លោក ណៃ ស៊ីណេង សុំទោសជាសាធារណៈចំពោះការបង្ហោះព័ត៌មានថាចាប់ក្មេងនោះជាការយល់ប្រឡំ។
ទោះជាយ៉ាងនេះក្ដី ចៅក្រមស៊ើបសួរសាលាដំបូងខេត្តកំពង់ធំ បានសម្រេចចេញដីកាបង្គាប់ឲ្យឃុំខ្លួនលោក ណៃ ស៊ីណេង នៅពន្ធនាគារជាបណ្ដោះអាសន្ន ក្រោមការចោទប្រកាន់អំពីបទល្មើសព្រហ្មទណ្ឌ ដែលមានចែងក្នុងមាត្រា៤២៥ នៃក្រមព្រហ្មទណ្ឌស្ដីពីបទក្លែងព័ត៌មាន។
មាត្រា៤២៥ នៃក្រមព្រហ្មទណ្ឌចែងថា ត្រូវផ្ដន្ទាទោសដាក់ពន្ធនាគារពី ១ ទៅ ២ឆ្នាំ និងពិន័យជាប្រាក់ពី ២លានរៀលទៅ ៤លានរៀល អំពើផ្ដល់ ឬបើកកកាយព័ត៌មានក្លែង ដើម្បីធ្វើឲ្យជឿថានឹងកើតមានឡើងនូវការបំផ្លិចបំផ្លាញ ការធ្វើឲ្យទ្រុឌទ្រោម ឬការធ្វើឲ្យខូចខាតប្រកបដោយគ្រោះថ្នាក់ចំពោះមនុស្ស។
ដោយឡែកអគ្គស្នងការរងនៃអគ្គស្នងការដ្ឋាននគរបាលជាតិ លោក គៀត ច័ន្ទថារិទ្ធិ សន្និដ្ឋានថា ការផ្សព្វផ្សាយអំពីចាប់កូនក្មេងវះយកក្រលៀនកន្លងទៅនេះ អាចជាចេតនារបស់ក្រុមចាត់តាំងណាមួយដើម្បីចំណេញអ្វីមួយ៖ «យើងមិនដឹងទេ ប៉ុន្តែចំពោះមុខ បញ្ហាហ្នឹង គឺប៉ះពាល់ដល់នគរបាលហើយ។ ចង់ ឬមិនចង់ គឺវាយនគរបាលអសមត្ថភាពហើយ។ អ៊ីចឹងយើងខ្ញុំត្រូវតែចាត់ចែងហើយ ហើយកំពុងតែរកបន្តទៀត។ បើសិនជារកឃើញមេខ្លោង នឹងគិតគូរដោះស្រាយតាមច្បាប់។ យើងមានតម្រុយខ្លះ តែខ្ញុំសុំមិនបញ្ចេញទេ។ (សួរ៖ រឿងហ្នឹងចូលរឿងនយោបាយទេ?) ខ្ញុំមិនទាន់ហ៊ាននិយាយទេ ប៉ុន្តែដូចខ្ញុំនិយាយអ៊ីចឹងថា គេចង់ចំណេញស្អីមួយគេចង់ធ្វើអាហ្នឹង»។
នៅប្រទេសកម្ពុជា ក្នុងរយៈពេលប្រមាណ ១ខែកន្លងទៅនេះ តែងតែលេចឮព័ត៌មានចចាមអារ៉ាមអំពីការចាប់កូនក្មេង ឬសិស្សសាលា វះយកគ្រឿងក្នុងជាហូរហែ ប៉ុន្តែនៅពេលនេះ ជាការបញ្ជាក់សរុបរបស់នគរបាលជាតិ ដែលបង្ហាញថា ជាព័ត៌មានមិនពិត។ ដោយឡែកករណីកុមារីនៅខេត្តកំពង់ស្ពឺ លោក គៀត ច័ន្ទថារិទ្ធិ បញ្ជាក់ថា ករណីអ៊ំចាប់ជំរិតក្មួយយកប្រាក់ ៣ពាន់ដុល្លារ ហើយករណីកុមារីនៅភ្នំពេញ លោកកំពុងស៊ើបអង្កេតបន្ត។ លោកក៏ចាត់ទុកការវាយដំជនសង្ស័យ ជាអំពើខុសច្បាប់៕