Clik here to view.
លោក ញឹក ប៊ុនឆៃ នឹងធ្វើសមាជដើម្បីពង្រឹងគណបក្សខ្មែររួបរួមជាតិ នៅថ្ងៃទី១២ សីហា គឺក្រោយពីគណបក្សរាជានិយមមួយនេះបានរង្គោះរង្គើចាប់តាំងពីការបោះឆ្នោតក្រុមប្រឹក្សាឃុំ-សង្កាត់រួចមក។ ទីប្រឹក្សាអះអាងថា ជំហរលោក ញឹក ប៊ុនឆៃ គ្មានបំណងរំលាយបក្ស ឬចុះចូលជាមួយបក្សណាមួយនោះទេ។
សមាជរបស់គណបក្សខ្មែររួបរួមជាតិ នឹងដឹកនាំដោយប្រធានគណបក្ស គឺលោក ញឹក ប៊ុនឆៃ។ ទីប្រឹក្សាផ្ទាល់របស់លោក ញឹក ប៊ុនឆៃ លោក ម៉ៅ សុផាន់ណា បញ្ជាក់ថា ចាប់តាំងពីថ្ងៃគណបក្សប្រជាជនកម្ពុជា ប្រកាសផ្ដាច់សម្ពន្ធភាពជាមួយគណបក្សខ្មែររួបរួមជាតិ មក មានសមាជិកគណបក្សចំនួន ២៣នាក់ ចាប់ពីឋានៈអគ្គលេខាធិការបក្ស ដល់សមាជិក បានចាកចេញពីគណបក្សខ្មែររួបរួមជាតិ ទៅចូលរួមជាមួយគណបក្សប្រជាជនកម្ពុជា និងគណបក្សហ៊្វុនស៊ិនប៉ិច។
លោក ម៉ៅ សុផាន់ណា មិនបានដឹងថា មានសកម្មជនបានទៅចូលរួមជាមួយគណបក្សសង្គ្រោះជាតិ ឬអត់នោះទេ៖ «ឃើញហើយស្ថានការណ៍នយោបាយតាំងពីបោះឆ្នោតឃុំមក ឃើញថាគណបក្សខ្មែររួបរួមជាតិ មានការរង្គោះរង្គើខ្លះ មានអ្នកខ្លះដើរចេញពីគណបក្សខ្មែររួបរួមជាតិ ទៅគណបក្សដទៃ ទៅគណបក្សផ្សេងៗ ទៅគណបក្សតូច គណបក្សធំខ្លះ»។
ក្រោយពីលោកនាយករដ្ឋមន្ត្រីស្នើព្រះមហាក្សត្រដកតំណែងលោក ញឹក ប៊ុនឆៃ ដែលមានឋានៈស្មើឧបនាយករដ្ឋមន្ត្រីរួចមក អ្នកនាំពាក្យរបស់គណបក្សប្រជាជនកម្ពុជា បានចោទប្រកាន់លោក ញឹក ប៊ុនឆៃ ថាក្បត់សម្ពន្ធភាពជាមួយបក្សកាន់អំណាច ហេតុនេះមិនអាចបន្តឲ្យមានទំនាក់ទំនងអ្វីតទៅទៀតជាមួយគណបក្សកាន់អំណាចឡើយ។ កាលពីថ្ងៃទី២៣ កក្កដា លោក សុខ ឥសាន បានប្រកាសផ្ដាច់សម្ពន្ធភាពជាមួយគណបក្សខ្មែររួបរួមជាតិ។ ស្របពេលនោះ មន្ត្រីមួយចំនួនរបស់លោក ញឹក ប៊ុនឆៃ ដែលមានតំណែងក្នុងជួររដ្ឋាភិបាល ក៏ត្រូវបានបញ្ចប់មុខតំណែងពីតួនាទីជាទីប្រឹក្សារដ្ឋាភិបាលជាបន្តបន្ទាប់ដែរ។
បើទោះជាមានសមាជិកចាកចេញ និងផ្ដាច់សម្ពន្ធភាពជាមួយគណបក្សកាន់អំណាចក្ដី ទីប្រឹក្សារបស់លោក ញឹក ប៊ុនឆៃ នៅតែសង្ឃឹមថា គណបក្សខ្មែររួបរួមជាតិ នឹងរឹងមាំ ក្រោយធ្វើសមាជរួច។ លោក ម៉ៅ សុផាន់ណា បានបដិសេធព័ត៌មានដែលថា លោក ញឹក ប៊ុនឆៃ បានទៅចូលរួមជាមួយគណបក្សហ៊្វុនស៊ិនប៉ិច។
អ្នកនាំពាក្យគណបក្សហ៊្វុនស៊ិនប៉ិច លោក ញ៉េប ប៊ុនជិន ឲ្យដឹងថា មកដល់ពេលនេះមានសមាជិកគណៈកម្មការនាយករបស់គណបក្សខ្មែររួបរួមជាតិ ចំនួន ១៨នាក់ បានចូលរួមជាមួយគណបក្សហ៊្វុនស៊ិនប៉ិច និងមាននៅតាមមូលដ្ឋានមួយចំនួនទៀត។ ចំណែកករណីលោក ញឹក ប៊ុនឆៃ លោកមិនទាន់បានទទួលដំណឹងនៅឡើយទេ។ លោកបញ្ជាក់ថា គ្រប់សមាជិកគណបក្សខ្មែររួបរួមជាតិ សុទ្ធតែអាចចូលរួមជាមួយគណបក្សហ៊្វុនស៊ិនប៉ិច បាន លើកលែងលោក ញឹក ប៊ុនឆៃ ប្រសិនបើចង់ត្រឡប់មកវិញ ត្រូវរង់ចាំការសម្រេចពីសម្ដេចក្រុមព្រះ នរោត្តម រណឫទ្ធិ ជាមុនសិន៖ «អត់ទាន់មានព័ត៌មានអីទេ! យើង (គណបក្សហ៊្វុនស៊ិនប៉ិច បានសួរគ្នីសួរគ្នាដែរ តែអត់ទាន់មាន ទុកឲ្យសម្ដេចព្រះប្រធាន ពីព្រោះសម្ដេចព្រះប្រធានទ្រង់ព្រះរាជតម្រិះរបៀបម៉េច អីម៉េច? អាហ្នឹងបុព្វសិទ្ធិព្រះប្រធាន។ តែយើងខ្ញុំអត់ឃើញមាន...អត់ (ដែលបោះដៃរកគ្នាទេ) ដែលមានទេ អត់ទេ»។
អតីតមេទ័ព និងឧបនាយករដ្ឋមន្ត្រីកូតាមកពីគណបក្សរាជានិយមហ៊្វុនស៊ិនប៉ិច លោក ញឹក ប៊ុនឆៃ អះអាងថា ការដែលលោកនាយករដ្ឋមន្ត្រី ហ៊ុន សែន មិនទុកចិត្តលោក ដោយសារលោកបានច្រឡំលេខទូរស័ព្ទ ហើយបានហៅដោយចៃដន្យទៅលេខរបស់អនុប្រធានបក្សប្រឆាំង លោក អេង ឆៃអ៊ាង កាលពីអំឡុងបោះឆ្នោតក្រុមប្រឹក្សាឃុំ-សង្កាត់។
អ្នកសិក្សាស្រាវជ្រាវវិទ្យាសាស្ត្រនយោបាយ លោក ឯម សុវណ្ណារ៉ា យល់ថា ការធ្វើសមាជរបស់លោក ញឹក ប៊ុនឆៃ ជាជម្រើសល្អក្នុងការស្វែងរកប្រជាប្រិយភាពឡើងវិញ ឬក៏ការរកដៃគូគណបក្សផ្សេងទៀតដើម្បីសហការ៖ «ភារកិច្ចចំពោះមុខត្រូវធ្វើសមាជមួយ ពង្រឹងផ្ទៃក្នុង ឬក៏ជំនួសកន្លែងអ្នកចេញពីបក្ស ហើយប្រកាសអំពីគោលនយោបាយបក្សទៅដល់មហាជនដែលជាអ្នកគាំទ្រ។ នេះជាការស្វែងរកប្រជាប្រិយភាពពីមហាជន ឬក៏រកដៃគូគណបក្សដទៃទៀត ដើម្បីសហការ។ នេះជាយន្តការទូទៅក្នុងលទ្ធិប្រជាធិបតេយ្យ»។
លោក ឯម សុវណ្ណារ៉ា មើលឃើញថា ចាប់តាំងពីផ្ដាច់សម្ពន្ធភាព គណបក្សប្រជាជនកម្ពុជា និងគណបក្សខ្មែររួបរួមជាតិ សុទ្ធតែមិនទទួលបានផលចំណេញទាំងពីរ ដោយមួយបាត់សំឡេងគាំទ្រ និងបាត់បង់ការសហការ ឯបក្សមួយទៀត គឺសមាជិកបាត់ប្រាក់ខែ និងតួនាទីក្នុងរដ្ឋាភិបាល៕