អគ្គនាយករងទទួលបន្ទុកផ្នែកបុគ្គលិកនៃអគ្គនាយកដ្ឋានគយ និងរដ្ឋាករកម្ពុជា រងការចោទថា បានលួចកែអាយុដើម្បីពន្យារពេលចូលនិវត្តន៍ ខណៈមន្ត្រីជាន់ខ្ពស់គយមួយចំនួនទៀត បានដាក់សំណើសុំទៅលោកនាយករដ្ឋមន្ត្រី ហ៊ុន សែន ដើម្បីសុំពន្យារពេលចូលនិវត្តន៍រួចហើយ ថ្វីបើដល់អាយុត្រូវចូលនិវត្តន៍ហើយក្ដី។ ប៉ុន្តែមន្ត្រីជាន់ខ្ពស់គយ និងរដ្ឋាករកម្ពុជា បានបដិសេធចំពោះបញ្ហានេះ។
មន្ត្រីគយមួយចំនួនបានទម្លាយពីរឿងអាស្រូវនៃអំពើពុករលួយនៅក្នុងស្ថាប័នរកចំណូលមួយនេះថា មានមន្ត្រីគ្រាក់ៗខ្លះលួចកែអាយុដើម្បីពន្យារពេលចូលនិវត្តន៍ ខណៈមួយចំនួនទៀត បានដាក់សំណើដោយផ្ទាល់ទៅលោកនាយករដ្ឋមន្ត្រី ហ៊ុន សែន ក្រោមហេតុផលដើម្បីបំពេញកិច្ចការបន្តទៀត។
ឯកសារដែលវិទ្យុអាស៊ីសេរី ទទួលបាន ឲ្យដឹងថា មានមន្ត្រីថ្នាក់អគ្គនាយករងគយ និងរដ្ឋាករកម្ពុជា មួយចំនួន ដល់កំណត់អាយុចូលនិវត្តន៍ហើយ ប៉ុន្តែមន្ត្រីទាំងនោះ បានដាក់សំណើទៅនាយករដ្ឋមន្ត្រី ដើម្បីបាននៅក្នុងតំណែងបន្តទៀត។ នៅក្នុងឯកសារដដែលនេះ បានបញ្ជាក់ថា ក្នុងចំណោមអ្នកដែលស្នើសុំពន្យារពេលចូលនិវត្តន៍ក្នុងនោះមានលោក ហ៊ីវ គីមហេង ឋានៈជាអគ្គនាយករងនៃអគ្គនាយកដ្ឋានគយ និងរដ្ឋាករ ទទួលបន្ទុកផ្នែកបុគ្គលិក បានស្នើទៅក្រសួងមុខងារសាធារណៈ ដើម្បីកែឆ្នាំកំណើត ក្នុងបំណងអាចនៅបំពេញការងារបន្តទៀត។ ឯកសារបង្ហាញថា លោក ហ៊ីវ គីមហេង កើតឆ្នាំពិតប្រាកដ គឺឆ្នាំ១៩៥៦ ប៉ុន្តែឯកសារដែលទទួលបានគឺកែកើតនៅឆ្នាំ១៩៥៩ វិញ។
មន្ត្រីគយដែលកំពុងបម្រើការនៅក្នុងនាយកដ្ឋានគយ និងរដ្ឋាករកម្ពុជា ត្អូញត្អែរថា ប្រសិនបើមន្ត្រីគយដែលដល់អាយុត្រូវចូលនិវត្តន៍ បែរជានៅបន្តពន្យារពេលទៀត នោះនឹងធ្វើមន្ត្រីគយប្រមាណ ៤០០នាក់ផ្សេងទៀត ដែលដល់ពេលចូលនិវត្តន៍នឹងអនុវត្តតាមដែរ។
ឆ្លើយតបនឹងការចោទប្រកាន់នេះ អគ្គនាយករងទទួលបន្ទុកផ្នែកបុគ្គលិក លោក ហ៊ីវ គីមហេង បដិសេធថា វាពុំមែនជាការពិតឡើយ។ ជាងនេះទៀត លោកក៏ពុំដែលបានដឹងអំពីលួចកែអាយុ ឬពន្យារពេលដើម្បីចូលនិវត្តន៍នោះដែរ៖ «ទេ! ខ្ញុំអត់ដឹងទេ! ខ្ញុំកំពុងតែជាប់ប្រជុំការងារមូលដ្ឋាន»។
ដោយឡែក អ្នកនាំពាក្យក្រសួងមុខងារសាធារណៈ លោក យក់ ប៊ុនណា ច្រានចោលការចោទប្រកាន់ថា ក្រសួងមុខសាធារណៈ ជាអ្នកលួចធ្វើឯកសារដើម្បីកែអាយុមន្ត្រីរាជការស៊ីវិល ជាថ្នូរដើម្បីបានបំពេញការងារបន្ត។ មិនតែប៉ុណ្ណោះ លោកអះអាងថា មកដល់ពេលនេះ ពុំដែលបានដឹងពីរឿងនេះថែមទៀតផង៖ «ខ្ញុំដូចអត់បានព័ត៌មានហ្នឹងផង។ ខ្ញុំអត់បានព័ត៌មានហ្នឹងផង។ ជាធម្មតាការចូលនិវត្តន៍មានកំណត់អាយុរួចទៅហើយ ក្របខ័ណ្ឌណា អាយុប៉ុន្មាន មានក្របខ័ណ្ឌ ៥៨ មាន ៥៥ និងមាន ៦០»។
ច្បាប់ស្ដីពីសហលក្ខន្តិកៈមន្ត្រីរាជការស៊ីវិល មាត្រា ៥៤ ចែងថា មន្ត្រីរាជការទាំងពីរភេទត្រូវដាក់ឲ្យចូលនិវត្តន៍ជាកំហិតពេលដល់អាយុ ៥៥ឆ្នាំ។ ប៉ុន្តែអាយុកំហិតនេះអាចរំកិលដល់ ៦០ឆ្នាំបាន បើលក្ខន្តិកៈដោយឡែកបានកំណត់។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា យល់ឃើញថា រឿងនេះវានឹងមិនប៉ះពាល់អ្វីធំដុំទៅដល់ថវិកាជាតិទេ ប៉ុន្តែអ្វីដែលជារឿងមិនត្រូវអនុវត្តនោះ គឺវាជាការប្រព្រឹត្តល្មើសនឹងច្បាប់។ ជាងនេះទៀត ការពន្យារពេលចូលនិវត្តន៍តាមមធ្យោបាយផ្សេងៗនេះ បានជំរុញឲ្យយុវជនជាច្រើន ត្រូវប្រឈមនឹងវិបត្តិការងារនៅក្នុងសង្គម។
លោកបន្តថា រឹតតែជាបញ្ហាទៀតនោះ ការបន្តស្ថិតក្នុងមុខតំណែងនេះ ប្រាកដណាស់អាចជាថ្នូរទៅនឹងផលប្រយោជន៍ និងលាភសក្ការៈ៖ «រឿងពន្យារពេលដើម្បីបន្តការងារបន្តទៀត ខ្ញុំគិតថា វាគួរត្រូវបានបញ្ចប់ហើយ។ ការសុំពន្យារពេលវាអត់មានហេតុផលអីក្រៅពីគេហៅថា ផលប្រយោជន៍ទេ»។
អ្នកជំនាញផ្នែកអភិបាលកិច្ច សង្កេតឃើញថា នៅក្នុងសង្គមបច្ចុប្បន្ន មន្ត្រីរាជការស៊ីវិលដែលបម្រើការនៅតាមមន្ទីរ ឬក្រសួងដែលរកចំណូលមិនបាន ហើយសូមចូលនិវត្តន៍មុនអាយុដែលច្បាប់កំណត់ ប៉ុន្តែកម្រឃើញអនុញ្ញាតណាស់។ ផ្ទុយទៅវិញ ស្ថាប័នដែលរកចំណូលបាន ឬអ្នកដែលកាន់កន្លែងខ្លាញ់ ជាញឹកញាប់បើទោះជាដល់ពេលកំណត់ត្រូវចូលនិវត្តន៍ ក៏អាចនៅស្នើសុំបន្តភារកិច្ច ក្រោមហេតុផលជាតិ និងសង្គមដែរ៕