Clik here to view.
អង្គការសិទ្ធិមនុស្សស្វាគមន៍ចំណាត់ការរបស់សាលាដំបូងខេត្តព្រះសីហនុ ដែលបានបន្តនីតិវិធីទៅលើសំណុំរឿងរំលោភផ្លូវភេទអនីតិជន ដើម្បីផ្ដល់យុត្តិធម៌ជូនកុមារីរងគ្រោះ។ ប្រធានសាលាដំបូងខេត្តព្រះសីហនុ អះអាងថា តុលាការបានបន្តនីតិវិធីដើម្បីរឹបអូសទ្រព្យសម្បត្តិជនល្មើស ឈ្មោះ កង សុផាត ផ្ដល់សំណងទៅកុមារីរងគ្រោះឲ្យបានឆាប់ ដ្បិតសំណុំរឿងនេះបានអូសបន្លាយជិត ១០ឆ្នាំមកហើយ។
ក្រុមអង្គការសិទ្ធិមនុស្សមួយចំនួនប្រចាំខេត្តព្រះសីហនុ រួមមាន សមាគមអាដហុក (ADHOC) និងអង្គការលីកាដូ (LICADHO) ជាដើម គាំទ្រចំណាត់ការរបស់សាលាដំបូងខេត្តព្រះសីហនុ ដែលបានចុះអនុវត្តនីតិវិធីរឹបអូសទ្រព្យសម្បត្តិជនល្មើស ដើម្បីផ្ដល់សំណងរដ្ឋប្បវេណីជូនកុមារីរងគ្រោះ។
អ្នកសម្របសម្រួលសមាគមអាដហុក ប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា សំណុំរឿងរំលោភផ្លូវភេទអនីតិជនដែលមានជនល្មើសឈ្មោះ កង សុផាត ទោះបីសមត្ថកិច្ចមិនទាន់ចាប់ខ្លួនជនល្មើសមកដាក់ពន្ធនាគារបែបណាក្ដី ក៏ប៉ុន្តែតុលាការមានសិទ្ធិបន្តនីតិវិធីរឹបអូសយកទ្រព្យសម្បត្តិជនល្មើស លក់យកប្រាក់សងជំងឺចិត្តជូនកុមារីរងគ្រោះ ឲ្យស្របតាមសាលក្រមស្ថាពររបស់តុលាការកំពូល៖ «ខ្ញុំសង្ឃឹមថា សាលាដំបូងខេត្តព្រះសីហនុ ក៏ដូចជាតុលាការកំពូលដែរ នឹងសហការជាមួយតុលាការនៅតាមបណ្ដាលរាជធានីខេត្ត និងកម្លាំងសមត្ថកិច្ចនៅគ្រប់បណ្ដាលខេត្តទាំងអស់ ដើម្បីស្វះស្វែងរកជនប្រព្រឹត្តល្មើសឈ្មោះ កង សុផាត នេះយកមកផ្ដន្ទាទោសតាមផ្លូវច្បាប់ ហើយសង្ឃឹមថា ករណីនេះក៏ដូចជាករណីផ្សេងៗទៀតដែរ យើងសង្ឃឹមថា សាលាដំបូង ឬតុលាការគ្រប់ជាន់ថ្នាក់នឹងមានយន្តការយកចិត្តទុកដាក់ទៅលើសំណុំរឿងព្រហ្មទណ្ឌផ្សេងៗដូចគ្នាសំណុំរឿងព្រហ្មទណ្ឌរំលោភផ្លូវភេទអនីតិជននេះដែរ»។
ប្រធានសាលាដំបូងខេត្តព្រះសីហនុ លោក ម៉ុង មុន្នីចរិយា ប្រាប់អាស៊ីសេរីថា តុលាការបានបន្តនីតិវិធីលើសំណុំរឿងរំលោភផ្លូវភេទអនីតិជនមួយនេះ ដើម្បីរឹបអូសទ្រព្យសម្បត្តិជនល្មើស ឈ្មោះ កង សុផាត ឈានទៅផ្ដល់យុត្តិធម៌ជូនកុមារីរងគ្រោះឲ្យបានឆាប់។ លោកបន្តថា តុលាការមិនធ្វេសប្រហែសទេ និងបានពន្លឿនចុះអនុវត្តនីតិវិធី ដើម្បីជួយក្រុមគ្រួសារកុមារីរងគ្រោះដោយយកចិត្តទុកដាក់ជាបន្តបន្ទាប់មកនេះ។
ឪពុកកុមារីរងគ្រោះបានឲ្យដឹងថា កូនស្រីគាត់ត្រូវឈ្មោះ កង សុផាត ជាអតីតមន្ត្រីនគរបាលនៃស្នងការដ្ឋាននគរបាលខេត្តព្រះសីហនុ ចាប់រំលោភកាលពីថ្ងៃទី១៥ ខែសីហា ឆ្នាំ២០១០ ដែលកាលនោះនាងមានអាយុ ១១ឆ្នាំ។ លោកថា គិតមកដល់ថ្ងៃទី២៨ ខែកក្កដា ឆ្នាំ២០១៧ មានរយៈពេលជាង ៧ឆ្នាំមកហើយ មិនទាន់មានយុត្តិធម៌ ហើយជនល្មើសនៅមានសេរីភាពក្រៅសំណាញ់ច្បាប់ ទោះបីតុលាការកំពូលសម្រេចសាលដីកាកាលពីថ្ងៃទី១៧ ខែតុលា ឆ្នាំ២០១៦ ឲ្យឈ្មោះ កង សុផាត ជាប់គុក ៥ឆ្នាំ និងពិន័យប្រាក់ ៤០លានរៀលក្ដី។
អាណាព្យាបាលរូបនេះបានទទូចទៅមន្ត្រីតុលាការ ពិសេសលោកនាយករដ្ឋមន្ត្រី ហ៊ុន សែន និងភរិយា ឲ្យជួយរកយុត្តិធម៌ និងជួយអន្តរាគមន៍ចុះរឹបអូសយកទ្រព្យសម្បត្តិ មានផ្ទះ ឬដីធ្លីជាដើមរបស់ជនល្មើស ឈ្មោះ កង សុផាត ដើម្បីផ្ដល់សំណងជំងឺចិត្តចំនួន ៤០លានរៀល តាមសាលដីកាស្ថាពររបស់តុលាការកំពូលឲ្យបានឆាប់ ព្រោះគិតមកដល់ពេលនេះកូនស្រីគាត់មិនទាន់ទទួលប្រាក់សងជំងឺចិត្តមួយកាក់មួយសេនណាទេ៖ «ខ្ញុំសំណូមពរឲ្យតុលាការជួយចាត់វិធានការទៅជនល្មើសឲ្យសងសំណងរដ្ឋប្បវេណីចំនួន ៤០លានរៀល និងឲ្យផ្ដន្ទាទោសជនល្មើសឈ្មោះ កង សុផាត ឲ្យជាប់ពន្ធនាគារ ៥ឆ្នាំ ឲ្យស្របតាមសាលដីកាតុលាការកំពូល បានសម្រេចកន្លងមក»។
សំណុំរឿងនេះ កាលពីឆ្នាំ២០១៦ ក្រសួងមហាផ្ទៃ បានសម្រេចអនុវត្តវិន័យចំពោះអនុសេនីយ៍ទោ កង សុផាត មានតួនាទីនាយរងផ្នែកព័ត៌មានលើវិស័យសេដ្ឋកិច្ច វប្បធម៌អប់រំ និងសង្គម នៃការិយាល័យសន្តិសុខផ្ទៃក្នុង ចំណុះស្នងការដ្ឋាននគរបាលខេត្តព្រះសីហនុ ដោយដកហូតមុខតំណែង ឋានន្តរសក្ដិ និងបណ្ដេញផុតចេញពីក្របខ័ណ្ឌមន្ត្រីនគរបាលជាតិ។
ចំណែកតំណាងអយ្យការអមសាលាដំបូងខេត្តព្រះសីហនុ លោក ហួត វិចិត្រ កាលពីថ្ងៃទី២៣ ខែវិច្ឆិកា ឆ្នាំ២០១៦ ក៏បានចេញដីកាបង្គាប់ទៅមន្ត្រីនគរបាលយុត្តិធម៌ឲ្យចាប់ខ្លួនឈ្មោះ កង សុផាត យកមកឃុំខ្លួនក្នុងពន្ធនាគារខេត្តព្រះសីហនុ ដែលបានប្រព្រឹត្តកាលពីឆ្នាំ២០១០។
ទន្ទឹមគ្នានេះ ស្នងការនគរបាលខេត្តព្រះសីហនុ លោក ជួន ណារិន្ទ ធ្លាប់ប្រាប់អាស៊ីសេរីថា ជនល្មើសឈ្មោះ កង សុផាត ដែលអតីតជាមន្ត្រីនគរបាលខេត្តនេះ មិនមានវត្តមាននៅក្នុងមូលដ្ឋាននេះទេ។ លោកបន្តថា បទល្មើសនេះ សមត្ថកិច្ចជំនាញរបស់លោកបានបន្តឃ្លាំមើលមុខសញ្ញានេះដោយយកចិត្តទុកដាក់ ព្រោះមានដីកាឲ្យនាំខ្លួន ឃុំខ្លួនជនល្មើសឈ្មោះ កង សុផាត ពីតុលាការលើសំណុំរឿងព្រហ្មទណ្ឌមួយនេះរួចហើយ៕