Clik here to view.
មន្ត្រីការពារសិទ្ធិមនុស្សលីកាដូ (LICADHO) ខេត្តពោធិ៍សាត់ បារម្ភថា ជម្លោះកាច់កុងគ្នារវាងសកម្មជន ឬមន្ត្រីគណបក្សកាន់អំណាច និងសកម្មជនបក្សសង្គ្រោះជាតិ នៅឃុំរាំងទិល ស្រុកកណ្ដៀង អាចជាបញ្ហាធ្វើឲ្យធនធានមច្ឆាជាតិក្នុងបឹងទន្លេសាបកាន់តែហិនហោច។ ក្ដីបារម្ភនេះ ក្រោយពីគេទទួលដំណឹងថា បទល្មើសនេសាទដែលប្រព្រឹត្តដោយអ្នកគាំទ្រគណបក្សប្រជាជនកម្ពុជា មិនត្រូវបានបង្ក្រាប។
មន្ត្រីសម្របសម្រួលអង្គការការពារសិទ្ធិមនុស្សលីកាដូ ខេត្តពោធិ៍សាត់ លោក អេង ឈុនហាន ថ្លែងនៅថ្ងៃទី២៨ ខែកក្កដា ថា អ្នកភូមិនៃឃុំរាំងទិល ទាំងអស់រស់នៅលើទឹក ហើយពឹងផ្អែកទាំងស្រុងលើមុខរបរនេសាទ។ ដូច្នេះការអនុវត្តច្បាប់មិនស្មើគ្នា ឬប្រកាន់បក្សពួកដូចជាជំរុញឲ្យមានបទល្មើសកាន់តែច្រើនឡើង ព្រោះពលរដ្ឋនឹងងាកទៅគាំទ្របក្សកាន់អំណាចដើម្បីមានឱកាសប្រព្រឹត្តបទល្មើស។
លោក អេង ឈុនហាន បន្ថែមថា សកម្មជនបក្សប្រឆាំងបានប្រាប់លោកថា បទល្មើសកើតមានច្រើន ប៉ុន្តែសមត្ថកិច្ចមិនបានបង្ក្រាបឡើយ ក្រៅពីកម្ទេចបទល្មើសបុគ្គលណាដែលគាំទ្របក្សប្រឆាំង៖ «ខាងអ្នកមានអំណាចចេះតែប្រព្រឹត្តបទល្មើសបានទៅ អ្នកណាហ៊ានចូលអាបក្សផ្សេងដែលជាបក្សប្រឆាំងអី អាចថា មិនរកបានគេយកច្បាប់ទៅអនុវត្តដោយស្របច្បាប់ទៅណា។ អ៊ីចឹងធ្វើបាបគ្នាចុះឡើង តែខ្ញុំចង់និយាយថា ភាគីទាំងពីរកំពុងតែនាំគ្នាបំផ្លាញខ្លួនឯងដូចគ្នា។ គាត់ជាអ្នកនេសាទសុទ្ធសាធ ព្រោះនៅលើទឹកហ្នឹងអត់មានកន្លែងដែលអាចធ្វើស្រូវ ធ្វើបន្លែអីបានដូចពួកខ្ញុំនៅលើគោកទេ។ ពួកគាត់អាស្រ័យតែលើផលនេសាទចុះបើគាត់អត់ចូលរួមថែរក្សាត្រីហ្នឹងទេ ឆ្នាំងបាយគាត់នឹងត្រូវរលំហើយ»។
អាស៊ីសេរី មិនអាចសុំការអត្ថាធិប្បាយបន្ថែមពីសកម្មជនបក្សសង្គ្រោះជាតិ ប្រចាំឃុំរាំងទិល លោកស្រី ប៉ាន់ ឆៃឡេង និងមេឃុំរបស់គណបក្សប្រជាជន លោក គឹម សំអ៊ែល បានទេនៅថ្ងៃទី២៨ ខែកក្កដា។ ប៉ុន្តែកន្លងទៅលោកស្រី ប៉ាន់ ឆៃឡេង ប្រាប់ថា អាជ្ញាធរ និងរដ្ឋបាលជលផលបង្ក្រាបយ៉ាងចាស់ដៃលើគ្រួសារលោកស្រី និងពលរដ្ឋជិត ១០គ្រួសារផ្សេងទៀតដែលគេដឹងថា គាំទ្របក្សសង្គ្រោះជាតិ។
ចំណែកមន្ត្រីរដ្ឋបាលជលផល និងមេឃុំរាំងទិល ធ្លាប់ទទួលស្គាល់ថា បទល្មើសពិតជាកើតមានខ្លះមែននៅក្នុងឃុំរាំងទិល ប៉ុន្តែសមត្ថកិច្ចបានចុះបង្ក្រាបមិនរើសមុខ ឬប្រកាន់បក្សនយោបាយឡើយ។
មន្ត្រីគម្រោងរបស់អង្គការសម្ព័ន្ធភាពដើម្បីអភិរក្សធនធានជលផល (FACT) លោក ឯក ចំរើន យល់ថា គ្រប់គណបក្សមិនគួរកាច់កុងគ្នា ហើយបាត់ប្រយោជន៍សាធារណៈ ឬធនធានមច្ឆាជាតិនោះទេ។ អ្នកនយោបាយទាំងពីរគណបក្ស ត្រូវចូលរួមទប់ស្កាត់បទល្មើស និងគោរពច្បាប់ទាំងអស់គ្នា ហើយអ្នកអនុវត្តច្បាប់ត្រូវបង្ក្រាបដោយមិនប្រកាន់និន្នាការនយោបាយ ទើបបទល្មើសមិនកើនឡើង៖ «យើងឃើញថា ការបង្ក្រាបមិនអាចធ្វើសកម្មភាពអ៊ីចឹងកើតទេ បើតាមដូចអ្វីដែលបានលើកឡើង បទល្មើសមិនអាចថយទេ គឺវាកាន់តែកើនឡើងថែមទៀត។ ជាយន្តការយើងត្រូវរួបរួមគ្នាប្អូន មិនអាចយករឿងគណបក្សមកធ្វើជារឿងឲ្យមានការបាត់បង់ធនធាន ឬប្រយោជន៍រួមទេ»។
មន្ត្រីដដែលសង្កេតឃើញថា បញ្ហាបង្ក្រាបបទល្មើសមិនស្មើភាពគ្នាចំពោះមុខច្បាប់នេះ មិនមែនកើតមានតែនៅឃុំរាំងទិល ស្រុកកណ្ដៀង នោះទេ គឺកើតមានជាច្រើនករណីនៅជុំវិញបឹងទន្លេសាប៕
