សាច់ញាតិព្រួយបារម្ភពីសុខភាពចៅសង្កាត់ប៉ោយប៉ែត មកពីគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារខេត្តបន្ទាយមានជ័យ ខ្លាចជំងឺរបស់ស្វាមីកាន់តែធ្ងន់ធ្ងរព្យាបាលមិនទាន់ ហើយបណ្ដាលឲ្យគ្រោះថ្នាក់ដល់អាយុជីវិត។ ក្ដីបារម្ភនេះ បន្ទាប់ពីលោក ចៅ វាសនា បានដាក់ពាក្យសុំប្រធានពន្ធនាគារ ដើម្បីទៅព្យាបាលជំងឺនៅខាងក្រៅចំនួនពីរលើកហើយ តែពុំមានការឆ្លើយតប។ប្រធានពន្ធនាគារអះអាងថា មូលហេតុដែលមិនអនុញ្ញាតឲ្យជនជាប់ឃុំរូបនេះទៅព្យាបាលនៅខាងក្រៅ ដោយមើលឃើញថាមានសុខភាពល្អ ដែលពុំមានអ្វីគួរឲ្យព្រួយបារម្ភឡើយ។
សាច់ញាតិចៅសង្កាត់ប៉ោយប៉ែត មកពីគណបក្សសង្គ្រោះជាតិ លើកឡើងថា ស្ថានភាពជំងឺរបស់លោក ចៅ វាសនា នៅពេលនេះហាក់មិនល្អឡើយ ដែលត្រូវការទៅឲ្យគ្រូពេទ្យព្យាបាលនៅខាងក្រៅទើបបាន។
ប្រពន្ធរបស់ចៅសង្កាត់ប៉ោយប៉ែត ដែលកំពុងជាប់ឃុំក្នុងពន្ធនាគារ លោកស្រី វង្ស គឹមហុង ឲ្យដឹងនៅថ្ងៃទី២៦ កក្កដា ថា លោកស្រីតែងតែទៅជួបលោក ចៅ វាសនា រៀងរាល់មួយសប្ដាហ៍ម្ដង ហើយនាពេលថ្មីៗនេះ ប្ដីរបស់លោកស្រីប្រាប់ថា លោកដេកមិនសូវលក់ ហើយគ្មានកម្លាំង និងត្រូវការទៅព្យាបាលនៅខាងក្រៅពន្ធនាគារ។ លោកស្រីអះអាងថា ស្វាមីរបស់លោកស្រីអស់កម្លាំងដោយសារមានជំងឺថ្លើម ដែលត្រូវចេញទៅព្យាបាលនៅខាងក្រៅ ព្រោះនៅក្នុងពន្ធនាគារគ្មានថ្នាំព្យាបាលនោះទេ៖ «បើគាត់សុខភាពធម្មតា គាត់មិនស្នើសុំព្យាបាលខាងក្រៅទេ។ ដល់ពេលគាត់មិនស្រួល បានគាត់ចង់ទៅព្យាបាលដើម្បីព្យាបាលទាន់ពេល កុំឲ្យជំងឺរាលដាលទៅមុខទៀត»។
ឆ្លើយតបនឹងបញ្ហានេះ ប្រធានពន្ធនាគារខេត្តបន្ទាយមានជ័យ លោក អ៊ុំ ស៊ីផាន មានប្រសាសន៍ថា សុខភាពរបស់លោក ចៅ វាសនា រឹងមាំល្អ ហើយលេងកីឡាបានជារៀងរាល់ថ្ងៃ គឺពុំមានជំងឺអ្វីធ្ងន់ធ្ងរដែលត្រូវទៅព្យាបាលនៅខាងក្រៅនោះទេ៖ «អត់មានអី សុខភាពគាត់ធម្មតាទេ ក្រោយពីគាត់វះកាត់ជំងឺពោះវៀនដុះខ្នែងមកនោះ។ ក្រោយពីខ្ញុំយកគាត់ចេញពីមន្ទីរពេទ្យមក ខ្ញុំឲ្យគាត់សម្រាកនៅមណ្ឌលសុខភាពរបស់ពន្ធនាគាររហូត ហើយគាត់រស់នៅបានស្រួលជាងគេទៀតផង»។
មន្ត្រីសម្របសម្រួលផ្នែកពេទ្យប្រចាំអង្គការលីកាដូ (LICADHO) លោកវេជ្ជបណ្ឌិត ខាត់ អាន លើកឡើងថា ជំងឺថ្លើមប្រឈមនឹងគ្រោះថ្នាក់ដល់អាយុជីវិតបាន ប្រសិនបើអ្នកជំងឺពុំបានទៅឲ្យគ្រូពេទ្យពិនិត្យ និងព្យាបាលឲ្យបានទាន់ពេលនោះ៖ «យើងអត់អាចដឹងថារយៈពេលយូរប៉ុន្មានគ្រោះថ្នាក់ទេ ប៉ុន្តែវិធីដែលល្អសម្រាប់អ្នកជំងឺដែលមានមេរោគថ្លើម សំខាន់គឺគាត់ត្រូវតាមដានជាមួយគ្រូពេទ្យទៀងទាត់ ហើយពិនិត្យមុខងារថ្លើមគាត់ខូចខាត ឬមិនទាន់ខូចខាតទេ។ ហើយរបបអាហារនៃការរស់នៅក៏សំខាន់សម្រាប់អ្នកជំងឺនេះដែរ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ប្រសិនបើលោក ចៅ វាសនា មានគ្រោះថ្នាក់ដល់អាយុជីវិត គឺប្រធានពន្ធនាគារខេត្តបន្ទាយមានជ័យ និងមន្ត្រីតុលាការ ជាអ្នកទទួលខុសត្រូវលើករណីនេះ ព្រោះមិនឲ្យជនសង្ស័យនៅក្រៅឃុំដើម្បីបានព្យាបាលជំងឺ។
ចៅសង្កាត់ប៉ោយប៉ែត ដែលទើបជាប់ឆ្នោតថ្មី ដើមកំណើតខ្មែរក្រោមរូបនេះ ចាប់ពីជាប់ឆ្នោតមក ស្ថិតនៅក្នុងពន្ធនាគាររហូត ដោយពុំមានឱកាសបានទៅបំពេញតួនាទីជូនម្ចាស់ឆ្នោតនៅឡើយទេ។
ចៅក្រមស៊ើបសួរនៃសាលាដំបូងខេត្តបន្ទាយមានជ័យ សម្រេចឃុំខ្លួនលោក ចៅ វាសនា នៅពន្ធនាគារខេត្តបន្ទាយមានជ័យ កាលពីថ្ងៃទី១៦ ខែកុម្ភៈ គឺនៅមុនការបោះឆ្នោតឃុំ-សង្កាត់កាលពីថ្ងៃទី៤ ខែមិថុនា ឆ្នាំ២០១៧ ដោយចោទប្រកាន់ពីបទញុះញង់ឲ្យប្រើអំពើហិង្សាមានស្ថានទម្ងន់ទោស ដែលប្រព្រឹត្តទៅនៅមុខទីស្នាក់ការគយ និងរដ្ឋាករក្រុងប៉ោយប៉ែត កាលពីខែឧសភា ឆ្នាំ២០១៥។ កាលពីថ្ងៃទី២៥ ខែឧសភា ឆ្នាំ២០១៥ ក្រុមកម្មករអូសរទេះប្រមាណ ១៥០នាក់ធ្វើបាតុកម្មទាមទារឲ្យមន្ត្រីគយប្រចាំច្រកទ្វារព្រំដែនអន្តរជាតិប៉ោយប៉ែត បញ្ឈប់យកពន្ធខ្ពស់ហួសហេតុលើការដឹកទំនិញចេញចូលតាមរទេះរុញបន្តទៀត។ ការតវ៉ានេះ បង្កឲ្យមានការប៉ះទង្គិចគ្នាដោយហិង្សារវាងក្រុមកម្មករអូសរទេះ និងកម្លាំងសមត្ថកិច្ច បណ្ដាលឲ្យខូចរថយន្តរបស់គយ និងរដ្ឋាករក្រុងប៉ោយប៉ែត ចំនួន ៧គ្រឿង ព្រមទាំងកញ្ចក់ របង ទ្វារ បង្អួចនៃទីស្នាក់ការគយ ខូចខាតមួយចំនួនទៀត។ ការតវ៉ាបង្កហិង្សាដាក់គ្នានេះ ដោយសារពួកគេឃើញសមត្ថកិច្ចចាប់តំណាងក្រុមអ្នកតវ៉ាម្នាក់វាយធ្វើទារុណកម្ម ហើយពួកគាត់ខឹង ក៏ផ្ទុះហិង្សាដាក់គ្នាតែម្ដង។
អង្គការសង្គមស៊ីវិលខេត្តបន្ទាយមានជ័យ លើកឡើងថា ការចោទប្រកាន់ និងចាប់លោក ចៅ វាសនា ដាក់ពន្ធនាគារនេះ ដោយសារតែលោកជាមនុស្សមានប្រជាប្រិយភាព ហើយការចាប់ចងនេះអាចជាចេតនានយោបាយច្រើនជាង៕