យុវជនមួយក្រុមប្រមាណ១០នាក់ គ្រោងដាក់លិខិតនៅខុទ្ទកាល័យលោកនាយករដ្ឋមន្ត្រី ហ៊ុន សែន នៅរសៀលថ្ងៃទី២៦ កក្កដា ដើម្បីស្នើដាក់រូបសំណាកបណ្ឌិត កែម ឡី នៅការ៉ាសសាំងកាល់តិច (Caltex) ក្បែរស្ដុបបូកគោ ទីដែលបណ្ឌិត កែម ឡី ត្រូវឃាតកបាញ់សម្លាប់។
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក មួង សូនី ឲ្យអាស៊ីសេរីដឹងថា សំណើនេះក្រោយពីក្រុមការងាររបស់លោកយល់ឃើញថា លោក ហ៊ុន សែន មួយរយៈពេលចុងក្រោយនេះ បានសម្ដែងទឹកចិត្តឈឺឆ្អាលជួយប្រាក់ដល់គ្រួសារបណ្ឌិត កែម ឡី ក្នុងការសាងសង់ចេតិយជាដើម។ លោក មួង សូនី បញ្ជាក់ថា ពួកគេនឹងជួបជុំដាក់សំណើនេះ នៅម៉ោង៣រសៀល នៅមុខវត្តបទុមវតី រាជធានីភ្នំពេញ។
លោកបន្តថា តាមពិតសំណើដាក់រូបសំណាករបស់បណ្ឌិត កែម ឡី នៅការ៉ាសសាំងកាល់តិច ឬទីតាំងផ្សេងក្នុងរាជធានីភ្នំពេញ ក្រុមលោកធ្លាប់បានដាក់លិខិតទៅក្រសួងមហាផ្ទៃម្ដងរួចហើយ ប៉ុន្តែក្រសួងថា មិនពាក់ព័ន្ធ ហើយឲ្យស្នើទៅសាលារាជធានីភ្នំពេញ។ លោកអះអាងថា លុះដាក់លិខិតស្នើទៅសាលារាជធានីភ្នំពេញ ក៏ត្រូវបដិសេធទៀត និងមិនបង្ហាញពីមូលហេតុទៀតផង។
បណ្ឌិត កែម ឡី ត្រូវបានឃាតកបាញ់សម្លាប់នៅក្នុងហាងស្ដារម៉ាត (StarMart) ការ៉ាសសាំងកាល់តិច កណ្ដាលរាជធានីភ្នំពេញ កាលពីថ្ងៃទី១០ កក្កដា ឆ្នាំ២០១៦។ រហូតមកដល់ពេលនេះ មានជនសង្ស័យតែម្នាក់គត់ត្រូវបានតុលាការផ្ដន្ទាទោស។
សូមរង់ចាំអាន និងស្ដាប់ព័ត៌មានពិស្ដារ...