ក្រុមប្រឹក្សាធម្មនុញ្ញសម្រេចទទួលស្គាល់សំណើវិសោធនកម្មច្បាប់គណបក្សនយោបាយថ្មី ដោយឥតកែប្រែចំណុចណាមួយឡើយ បន្ទាប់ពីតំណាងរាស្ត្រគណបក្សកាន់អំណាច ស្នើកែប្រែជាលើកទី២ តាមការចង់របស់លោកនាយករដ្ឋមន្ត្រី ហ៊ុន សែន។
សេចក្ដីសម្រេចរបស់ក្រុមប្រឹក្សាធម្មនុញ្ញនៅថ្ងៃទី២៥ កក្កដា ទទួលស្គាល់សំណើវិសោធនកម្មច្បាប់ស្ដីពីគណបក្សនយោបាយ និងបិទផ្លូវតវ៉ា ហើយមានអនុភាពអនុវត្តទៅលើអំណាចទាំងអស់ ដែលមានចែងក្នុងរដ្ឋធម្មនុញ្ញ បន្ទាប់ពីសមាជិករដ្ឋសភាពីគណបក្សប្រជាជនកម្ពុជា អនុម័តសំណើកែប្រែច្បាប់នេះកាលពីថ្ងៃទី១០ ខែកក្កដា ឆ្នាំ២០១៧ និងទទួលបានឯកភាពទាំងស្រុងពីសមាជិកព្រឹទ្ធសភាបក្សនេះ កាលពីថ្ងៃទី១៨ កក្កដា ឆ្នាំ២០១៧។
សំណើកែប្រែច្បាប់ស្ដីពីគណបក្សនយោបាយនេះ នឹងត្រូវថ្វាយព្រះមហាក្សត្រ ឡាយព្រះហស្តលេខា ដើម្បីដាក់ឲ្យប្រើប្រាស់ជាផ្លូវការ បន្ទាប់ពីមានការសម្រេចរបស់ក្រុមប្រឹក្សាធម្មនុញ្ញ។ ប៉ុន្តែយ៉ាងណាក៏ដោយ កាលពីថ្ងៃទី២៣ កក្កដា ព្រះមហាក្សត្រ ព្រះបាទសម្ដេចព្រះបរមនាថ នរោត្តម សីហមុនី និងសម្ដេចម៉ែ នរោត្តម មុនីនាថ សីហនុ បានយាងទៅពិនិត្យព្រះរាជសុខភាពនៅទីក្រុងប៉េកាំង នៃសាធារណរដ្ឋប្រជាមានិតចិនហើយ។
ប៉ុន្តែអ្នកនាំពាក្យគណបក្សប្រជាជនកម្ពុជា លោក សុខ ឥសាន ធ្លាប់បានបញ្ជាក់ថា ទោះបីជាមិនមានវត្តមានរបស់ព្រះមហាក្សត្រក៏ដោយ ក៏ច្បាប់នេះនឹងត្រូវចូលជាធរមាននៅរវាងប៉ុន្មានថ្ងៃខាងមុខនេះដែរ បន្ទាប់ពីប្រមុខរដ្ឋស្តីទី គឺលោក សាយ ឈុំ ចុះហត្ថលេខាលើព្រះរាជក្រមប្រកាសឲ្យប្រើប្រាស់ច្បាប់នេះ៕