យុវជនម្នាក់មានឈ្មោះថា រ៉ុម ចំរើន ត្រូវបានមន្ត្រីជំនាញប្រឆាំងបច្ចេកវិទ្យានៃក្រសួងមហាផ្ទៃ ចាប់ខ្លួន និងបញ្ជូនទៅឱ្យតុលាការក្រុងភ្នំពេញ សាកសួរបន្ថែម នៅថ្ងៃទី២០ កក្កដា ឆ្នាំ២០១៧។
មន្ត្រីនាំពាក្យតុលាការក្រុងភ្នំពេញ លោក លី សុផាណា បានបញ្ជាក់តាមប្រព័ន្ធតេឡេក្រាម (Telegram) នៅថ្ងៃទី២០ កក្កដា ថា តុលាការបានបើកការសាកសួរទៅលើឈ្មោះ រ៉ុម ចំរើន ពីបទគំរាមថា នឹងសម្លាប់ តាមមាត្រា ២៣៣ នៃក្រមព្រហ្មទណ្ឌ ហើយបញ្ជូនទៅចៅក្រមស៊ើបសួរដើម្បីចាត់ការបន្តតាមនីតិវិធី។
នៅក្នុងគណនីហ្វេសប៊ុក (Facebook) ឈ្មោះ សឿន ខេត្តកណ្ដាល ក្រៅពីមានសារគំរាមកំហែងសម្លាប់លោក ហ៊ុន សែន ម្ចាស់គណនីនេះក៏បានអួតអាងថា ខ្លួនមានខ្នងធំដែរ គឺឧកញ៉ា ខ្លា នៅខេត្តក្រចេះ និងមានអ្នកសារព័ត៌មានដល់ល្បីគឺបង ឫទ្ធី នៅហង្សមាសព័ត៌មាន។
ទោះជាយ៉ាងណា នៅថ្ងៃអាទិត្យ ទី១៦ ខែកក្កដា ម្ចាស់គណនីហ្វេសប៊ុក ឈ្មោះ សឿន ខេត្តកណ្ដាល បានចេញមុខសុំទោស និងសុំភាពស្អាតស្អំពីលោកនាយករដ្ឋមន្ត្រី ហ៊ុន សែន ព្រមទាំងបកស្រាយថា ខ្លួនមិនមែនជាអ្នកបង្ហោះសារគំរាមសម្លាប់ឡើយ ផ្ទុយទៅវិញ គឺមានអ្នកផ្សេងដែលជាអ្នកលួចហ្វេសប៊ុក របស់ខ្លួនទៅបង្ហោះប៉ុណ្ណោះ។
រីឯសារព័ត៌មានក្នុងស្រុក ក៏បានផ្សាយដោយស្រង់សម្ដីរបស់មន្ត្រីនគរបាលថា ក្មួយរបស់បុរសមានគណនីហ្វេសប៊ុក ឈ្មោះ សឿន ខេត្តកណ្ដាល គឺឈ្មោះ រ៉ុម ចំរើន គឺជាជនប្រព្រឹត្ត៕