ក្រសួងចំនួនពីរ បានចុះហត្ថលេខាលើគោលការណ៍ណែនាំមួយសម្រាប់ប្រព័ន្ធផ្សព្វផ្សាយ ស្ដីពីការរាយការណ៍ព័ត៌មានហិង្សាលើស្ត្រី បន្ទាប់ពីការស្រាវជ្រាវបានរកឃើញថា ការផ្សាយព័ត៌មានហិង្សាលើស្ត្រីមួយចំនួន ជំរុញឲ្យមានការប្រើហិង្សា។
រដ្ឋមន្ត្រីក្រសួងកិច្ចការនារី និងរដ្ឋមន្ត្រីក្រសួងព័ត៌មាន ចុះហត្ថលេខាលើប្រកាសរួមស្ដីពីក្រមប្រតិបត្តិប្រព័ន្ធផ្សព្វផ្សាយ សម្រាប់ការរាយការណ៍ព័ត៌មានអំពើហិង្សាលើស្ត្រីនៅថ្ងៃទី២០ ខែកក្កដា ឆ្នាំ២០១៧ នៅរាជធានីភ្នំពេញ។
ក្រមប្រតិបត្តិដែលទើបត្រូវបានចុះហត្ថលេខានេះ មាន ១៥ក្រម ដែលខ្លឹមសារសំខាន់ៗដូចជា កុំផ្សាយព័ត៌មានហិង្សាលើស្ត្រីធ្វើជារឿងកំប្លែង កុំផ្សាយឲ្យជនរងគ្រោះអស់សង្ឃឹម លាក់អត្តសញ្ញាណជនរងគ្រោះ ជាដើម។
រដ្ឋមន្ត្រីក្រសួងកិច្ចការនារី អ្នកស្រី អ៊ឹង កន្ថាផាវី យល់ថា ស្ត្រីដែលរងអំពើហិង្សា គួរទទួលបានភាពសម្ងាត់ដោយការបិទបាំងមុខពេលផ្សាយ៖ «»។
ការសិក្សាស្រាវជ្រាវឆ្នាំ២០១៦ របស់អង្គការមូលនិធិអាស៊ី និងជំនួយអូស្ត្រាលី (Australian Aid) បានបង្ហាញថា ការប្រកួតប្រជែងរវាងប៉ុស្តិ៍ទូរទស្សន៍ដោយមិនមានការត្រួតពិនិត្យ អាចជំរុញឲ្យមានការកើនឡើងនូវកម្មវិធីដែលផ្ទុកខ្លឹមសារហិង្សាលើស្ត្រីច្រើន ហើយការផ្សាយពីហិង្សាលើស្ត្រីខ្លះ បង្ហាញអត្តសញ្ញាណជនរងគ្រោះ និងជនមុខសញ្ញាស្ទើរតែគ្រប់ពេល ហើយមានទាំងការស្ដីបន្ទោសជនរងគ្រោះថែមទៀត។
អគ្គលេខាធិការនៃក្លឹបអ្នកកាសែតកម្ពុជា លោក ពុយ គា ថ្លែងក្នុងពិធីចុះហត្ថលេខានេះថា ក្រមប្រតិបត្តិនេះមានសារសំខាន់សម្រាប់អ្នកសារព័ត៌មាន ហើយចាំបាច់ត្រូវពិនិត្យឡើងវិញបន្ថែមពីលើក្រមសីលធម៌ដែលមានស្រាប់។
ចំណែករដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ឲ្យយោបល់ថា ដើម្បីឲ្យការអនុវត្តក្រមប្រតិបត្តិថ្មីមានប្រសិទ្ធភាព វាទាមទារឲ្យមានការផ្សព្វផ្សាយដូចជា ធ្វើសិក្ខាសាលាពន្យល់បន្ថែមដល់អ្នកអនុវត្តន៍ក្នុងវិស័យប្រព័ន្ធផ្សព្វផ្សាយ។
ការស្រាវជ្រាវរបស់អង្គការមូលនិធិអាស៊ីដដែល បានផ្តល់អនុសាសន៍ថា ក្រសួងព័ត៌មាន គួរចាត់វិធានការលើស្ថានីយទូរទស្សន៍ណាដែលនៅបន្តផ្សាយពាណិជ្ជកម្មគ្រឿងស្រវឹងនៅក្នុងម៉ោងមាស ឬម៉ោងមានអ្នកតាមដានច្រើនបំផុត ដើម្បីកាត់បន្ថយហិង្សាលើស្ត្រី ហើយសាធារណជនគួរប្រើប្រាស់បណ្ដាសង្គម ដើម្បីជជែកឲ្យបានផុសផុលពីផលប៉ះពាល់នៃការផ្សាយពាណិជ្ជកម្មគ្រឿងស្រវឹង និងខ្លឹមសារហិង្សាលើស្ត្រី៕