ចៅក្រមសាលាដំបូងរាជធានីភ្នំពេញ លោក ប៊ុន ធី សម្រេចលើកពេលសវនាការឆ្លើយដោះសា របស់តំណាងសហគមន៍បឹងកក់ អ្នកស្រី ទេព វន្នី ដែលជាចុងចោទក្នុងសំណុំរឿងជាមួយអតីតអ្នកបឹងកក់លោកស្រី លី មុំ កាលពីឆ្នាំ២០១២។
ការសម្រេចលើកពេលសវនាការនៅព្រឹកថ្ងៃទី១៤ កក្កដា នេះ ដោយសារអវត្តមានសាក្សីក្នុងសវនាការ ខណៈដើមបណ្ដឹងអ្នកស្រី លី មុំ បានដកពាក្យបណ្ដឹងនេះវិញហើយ។ ចំណែកនៅក្រៅបន្ទប់សវនាការមានសកម្មជនដីធ្លីពីបឹងកក់ និងបុរីកីឡា ប្រមាណ២០នាក់ លើកបដាតវ៉ា ទាមទារឲ្យដោះលែងអ្នកស្រី ទេព វន្នី។
កាលពីថ្ងៃ១៦ មីនា ឆ្នាំ២០១៧ តុលាការក្រុងភ្នំពេញចោទប្រកាន់អ្នកស្រី ទេព វន្នី លោកស្រី ហេង មុំ លោកស្រី ង៉ែត ឃុន លោកស្រី ឆេង លាភ លោកស្រី គង់ ចាន់ថា និងលោកស្រី តុល ស្រីពៅ ពីបទជេរប្រមាថជាសាធារណៈ និងគំរាមថានឹងសម្លាប់ ដែលប្រព្រឹត្តនៅចំណុចផ្ទះលេខ១៣៤ ផ្លូវលេខ៨០ ភូមិ២៤ ក្រុម៣០០៤ សង្កាត់ស្រះចក ខណ្ឌដូនពេញ រាជធានីភ្នំពេញ កាលពីថ្ងៃទី២០ មីនា ២០១២ តាមមាត្រា ៣០៧ និង២៣៣ នៃក្រមព្រហ្មទណ្ឌ។
បច្ចុប្បន្នអ្នកស្រី ទេព វន្នី កំពុងជាប់ឃុំនៅពន្ធនាគារព្រៃស លើបណ្ដឹងរបស់សន្តិសុខ ខណ្ឌដូនពេញ កាលពីឆ្នាំ២០១៣ ក្រោយពីអ្នកស្រីត្រូវបានចាប់ខ្លួនកាលពីថ្ងៃទី១៥ ខែសីហា ឆ្នាំ២០១៦ ក្នុងពេលធ្វើយុទ្ធនាការ «ថ្ងៃច័ន្ទពណ៌ខ្មៅ» ដែលធ្វើឡើងនៅក្នុងសហគមន៍បឹងកក់ដើម្បីទាមទារឲ្យដោះ លែងមន្ត្រីការពារសិទ្ធិមនុស្សនិងមន្រ្តី គ.ជ.ប ដែលជាប់ឃុំ និងទាមទាររកយុត្តិធម៌សម្រាប់បណ្ឌិត កែម ឡី។
សូមរង់ចាំអាន និងស្ដាប់ព័ត៌មានពិស្ដារ...