កសិករនៅឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង បារម្ភសន្ទូងខូច និងបាត់ផលច្រើនពេលប្រមូលផល ដោយសារសត្វខ្យងស៊ីបំផ្លាញ។ មន្ត្រីជំនាញកសិកម្មកំពុងចុះអន្តរាគមន៍ករណីនេះ។
ផ្ទៃដីកសិកម្មប្រមាណ ១០ហិកតារនៅក្បែរភូមិស្រែតាជៃ នៃឃុំអភិវឌ្ឍន៍ ដែលស្រែខ្លះទើបស្ទូង និងខ្លះកំពុងលាស់ខ្ចី ប្រឈមនឹងខ្យងមាស ឬខ្យងថៃ ស៊ីបំផ្លាញ។ សត្វខ្យងកំពុងស៊ីបំផ្លាញសន្ទូងក្បែរនោះស្ទើររាបដល់ទឹកជាច្រើនកន្លែង ហើយម្ចាស់ស្រែថាបានបាចថ្នាំគីមីដើម្បីសម្លាប់វា ជួលគេរើស និងដើររើសខ្លួនឯងគ្រវាត់ចោលក៏មិនអស់ និងនៅបន្តស៊ីបំផ្លាញលើផ្ទៃដីប្រហែល ៤អាទៀត។
កសិករម្នាក់ លោក ម៉ៅ ឌីណា មានប្រសាសន៍នៅថ្ងៃទី១៣ ខែកក្កដា ថា ខ្យងបានបង្កើតកូនចៅកាន់តែច្រើនឡើង ហើយបានហូរតាមទឹកទៅស្រែក្បែរៗនោះ ប៉ុន្តែលោកនៅបន្តរើសចោលស្ទើររាល់ថ្ងៃ៖ «មានរាល់ឆ្នាំដែរ ខូចអស់ប្រហែល ៤០ភាគរយ ស៊ីរយៈពេលជិត ១ខែហើយ ពេលចុងក្រោយឮគេថាដាក់ថ្នាំក្ដាមលាយជាមួយបាយ ដាក់ថ្មស្អុយអត់បាត់ទៀត ខ្ញុំឈប់ដាក់ទៅ។ ខ្ញុំរើសដដែល»។
ទោះជាយ៉ាងណា មន្ត្រីការិយាល័យក្សេត្រសាស្ត្រ និងផលិតភាពកសិកម្ម នៃមន្ទីរកសិកម្មខេត្តកំពង់ឆ្នាំង ថាសន្ទូងរបស់កសិករដែលសត្វខ្យងស៊ីបំផ្លាញនេះ មិនស្ថិតនៅក្នុងស្ថានភាពធ្ងន់ធ្ងរនោះទេ។
អនុប្រធានការិយាល័យក្សេត្រសាស្ត្រ និងផលិតភាពកសិកម្ម លោក លាង ដេត ណែនាំឲ្យកសិករប្រើវិធីសាស្ត្រសាមញ្ញៗចំនួនបីក្នុងការកម្ចាត់ខ្យងចង្រៃ ដោយមិនចាំបាច់ប្រើថ្នាំពុលនាំឲ្យប៉ះពាល់បរិស្ថាន ឬសុខភាពមនុស្ស។
វិធីទាំងបីនោះរួមមាន៖
-
វិធីទី១ កសិករត្រូវសម្អាតស្មៅតាមចិញ្ចើមភ្លឺស្រែកុំខ្យងពងដាក់ រួចត្រូវដើរបេះពងខ្យងពីដើមស្រូវទៅកម្ទេចចោល
-
វិធីទី២ កសិករត្រូវកាយចង្អូរកាត់កណ្ដាលស្រែ ឬអែបភ្លឺស្រែវែងៗ ដើម្បីបង្ហូរទឹកចេញពីស្រែឲ្យសល់តិច ទើបខ្យងវារតាមទឹកចូលចង្អូរនោះ រួចប្រមូលទៅកម្ទេចចោល
-
វិធីទី៣ កសិករអាចលែងទាឲ្យចុះស៊ីខ្យងតូចដែលទើបញាស់។
លោកបន្ថែមថា៖ «ចាប់ពីពងទៅរយៈពី ៧ ទៅ ១២ថ្ងៃ វាចាប់ផ្ដើមញាស់ ពេលញាស់បានរយៈ ១៥ ទៅ ២៥ថ្ងៃ កើតជាកូនខ្យងល្មមស៊ីស្រូវហើយ ហើយរហូតដល់ ៤៥ ដល់ ៤៩ថ្ងៃក្លាយជាខ្យងពេញវ័យតែម្ដង។ ចំពោះការរាលដាល គឺយើងព្រួយបារម្ភណាស់! ព្រោះខ្យងនេះវាអាចកាត់ស៊ីលឿនជាងក្ដាមទៅទៀត។ ការរាលដាលរបស់វា វាហូរទៅតាមទឹក កាលណាមានទឹកជន់ ឬទឹកហៀរពីស្រែដែលមានខ្យងច្រើនហ្នឹង វាអាចបង្កទៅស្រែផ្សេងទៀត ហើយកាត់នៅស្រែផ្សេងទៀត»។
លោក លាង ដេត រំលឹកថា វត្តមានខ្យងថៃ ឬខ្យងមាសនៅក្នុងស្រែរបស់កសិករកម្ពុជា មានចាប់តាំងពីឆ្នាំ១៩៩៧។ ចំពោះនៅខេត្តកំពង់ឆ្នាំង ជាពិសេសនៅតាមតំបន់មាត់ទន្លេមានច្រើនចាប់ពីឆ្នាំ២០១៥។
មេភូមិស្រែតាជៃ ឃុំអភិវឌ្ឍន៍ លោក ឡាំ ស្រ៊ិន ឲ្យដឹងថា អ្នកភូមិស្រែតាជៃ សរុប ៥០០គ្រួសារ មានអ្នកធ្វើស្រែជាង ៣០០គ្រួសារ ប៉ុន្តែស្រែកសិករដែលរងផលប៉ះពាល់ពីសត្វខ្យងស៊ីបំផ្លាញនេះមានតែ ៤ ឬ ៥គ្រួសារប៉ុណ្ណោះ។ លោកថា បើកសិករកម្ចាត់ខ្យងចង្រៃតាមការណែនាំរបស់មន្ត្រីជំនាញ ហើយនៅតែមិនបាត់ លោកនឹងរាយការណ៍ទៅមន្ត្រីកសិកម្មស្រុក ឬខេត្ត ដើម្បីឲ្យចុះអន្តរាគមន៍ជាថ្មីទៀត៕