Clik here to view.
អាជ្ញាធរជាតិប្រយុទ្ធប្រឆាំងគ្រឿងញៀន បង្ហាញរបាយការណ៍បឋមពីយុទ្ធនាការប្រឆាំងគ្រឿងញៀនលើកទី១ របស់រដ្ឋាភិបាលសម្រាប់ពេល ៦ខែ ដែលទើបតែបញ្ចប់នៅចុងខែមិថុនា កន្លងទៅថា ទទួលបានលទ្ធផលល្អ និងមានការគាំទ្រពីសាធារណជន សង្គមស៊ីវិល វិស័យសាសនា និងអង្គការដៃគូ។
របាយការណ៍បឋមពីយុទ្ធនាការប្រឆាំងគ្រឿងញៀនរយៈពេល ៦ខែ របស់រដ្ឋាភិបាលបង្ហាញថា អាជ្ញាធរជំនាញបង្ក្រាបបានចំនួន ៤.២០០ករណី និងបានឃាត់ខ្លួនជនសង្ស័យជិត ១ម៉ឺននាក់ ក្នុងបទល្មើសពាក់ព័ន្ធនឹងការជួញដូរ ដឹកជញ្ជូន រក្សាទុក និងប្រើប្រាស់គ្រឿងញៀន។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វិរិទ្ធ មានប្រសាសន៍ថា តាមផែនការស្ដីពីយុទ្ធនាការប្រឆាំងគ្រឿងញៀនដែលបានចាប់ផ្ដើមពីថ្ងៃទី១ ខែមករា ហើយបានបិទបញ្ចប់កាលពីថ្ងៃទី៣០ ខែមិថុនា ប្រធានដឹកនាំយុទ្ធនាការ លោក ស ខេង រដ្ឋមន្ត្រីក្រសួងមហាផ្ទៃ នឹងបើកកិច្ចប្រជុំបូកសរុបលទ្ធផលផ្សព្វផ្សាយផ្លូវការនៅថ្ងៃទី១៣ ខែកក្កដា។
លោកបន្តថា ដោយយុទ្ធនាការនេះទទួលបានជោគជ័យអំណោយផលល្អសម្រាប់សង្គមជាតិទាំងមូល មានការចូលរួមគាំទ្រពីពលរដ្ឋ សង្គមស៊ីវិល វិស័យសាសនា និងមជ្ឈដ្ឋានអន្តរជាតិ ហើយលោកបានធ្វើរបាយការណ៍ដាក់ជូនទៅរដ្ឋាភិបាលស្នើសុំបន្តយុទ្ធនាការនេះបន្ថែមទៀត៖ «លទ្ធផលជាក់ស្ដែងមើលបទល្មើសជាទូទៅមានការថយចុះ បរិយាកាសសង្គមមានភាពល្អប្រសើរប្រជាជនអាចដើរហើរ សប្បាយចិត្តមិនភ័យខ្លាចអំពីការគំរាមកំហែង។ សមត្ថកិច្ចនៅតែបន្តធ្វើទៀត យើងធ្វើរយៈពេល ៦ខែវាមិនអស់ទេ»។
អ្នកការពារសិទ្ធិមនុស្ស និងអ្នកច្បាប់ព្រួយបារម្ភថា ស្ថានភាពកាន់តែចង្អៀតណែនក្នុងពន្ធនាគារដោយសារកើនឡើងអ្នកជាប់ឃុំពាក់ព័ន្ធនឹងបទល្មើសគ្រឿងញៀន ជាការបណ្ដោយឲ្យមានសភាពចង្អៀតណែននេះ នឹងអាចធ្វើឲ្យពន្ធនាគារគ្មានខ្យល់អាកាសចេញចូលគ្រប់គ្រាន់ មានការរាលដាលជំងឺឆ្លងកាន់តែធ្ងន់ធ្ងរ គឺមិនមែនជាកន្លែងសម្រាប់កែប្រែអ្នកទោសឡើយ តែគឺជាការធ្វើទារុណកម្មមនុស្សទៅវិញ។
ប្រធានគ្រប់គ្រងផ្នែកស៊ើបអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត ធ្លាប់លើកឡើងថា ក្រៅពីបញ្ហាសុខភាពរបស់អ្នកជាប់ឃុំ រីឯអគាររបស់ពន្ធនាគារខ្លះទៀតដែលមានសភាពចាស់ទ្រុឌទ្រោម និងត្រូវផ្ទុកមនុស្សច្រើនលើសចំនួនបែបនេះ ក៏ជាបញ្ហាប្រឈមនាំឲ្យមានក្ដីព្រួយបារម្ភមួយទៀតដែរ។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វិរិទ្ធ បញ្ជាក់ដែរថា ជាគោលការណ៍លោកស្នើអគ្គនាយកដ្ឋានពន្ធនាគារឲ្យមានការឃុំដាច់ដោយឡែក ចែកបន្ទប់ឃុំឃាំងមិនឲ្យឡូកឡំជាមួយទណ្ឌិត ឬអ្នកទោសដទៃនោះទេ ដើម្បីកុំឲ្យមានការជ្រៀតជ្រែកអំពីការជួញដូរគ្រឿងញៀននៅក្នុងពន្ធនាគារ កុំឲ្យមានការបញ្ជាទិញ និងលក់ដូរចេញពីពន្ធនាគារ។
ជុំវិញរឿងនេះ អគ្គនាយករងនៃអគ្គនាយកដ្ឋានពន្ធនាគារក្រសួងមហាផ្ទៃ លោក នុត សាវនា បានថ្លែងប្រាប់អាស៊ីសេរីថា ស្ថានភាពចង្អៀតណែនក្នុងពន្ធនាគារបច្ចុប្បន្ននេះ នឹងអាចដោះស្រាយចេញនៅពេលដែលអគារធំរបស់មណ្ឌលអប់រំកែប្រែទី៤ ស្ថិតនៅភ្នំក្រវាញ ខេត្តពោធិ៍សាត់ ត្រូវបានសាងសង់រួចរាល់នាពេលខាងមុខ៕
