Clik here to view.
ក្រុមអាជីវករលក់ដូរប្រមាណ ១០០នាក់នៅក្រុងប៉ោយប៉ែត ខេត្តបន្ទាយមានជ័យ នៅព្រឹកថ្ងៃទី១០ កក្កដា តវ៉ានៅខាងមុខផ្សាររ៉ាថ្មី ក្រុងប៉ោយប៉ែត ឲ្យអាជ្ញាធរដោះស្រាយករណីថៅកែផ្សារនេះដំឡើងថ្លៃតូប ធ្វើឲ្យលក់ដូរមិនបានប្រាក់ចំណេញ។ ទាក់ទងនឹងបញ្ហានេះ ថៅកែផ្សាររ៉ាថ្មី អះអាងថា ខ្លួនមិនបានដំឡើងថ្លៃតូបទេ តែដោយសារក្រុមអ្នកតវ៉ាចង់រុះរើតូបដោយពុំបានបង់ប្រាក់គ្រប់ចំនួន។
ក្រុមអាជីវករផ្សាររ៉ាថ្មី ក្រុងប៉ោយប៉ែត លើកឡើងថា ថៅកែផ្សារមួយនេះដំឡើងថ្លៃជួលតូបលក់ដូរតាមអំពើចិត្ត ដើម្បីបានប្រាក់ចំណេញផ្ទាល់ខ្លួន ដោយមិនគិតពីអ្នកលក់ដូរឡើយ។
តំណាងក្រុមអ្នកតវ៉ា លោក ម៉ែន សារឿន ឲ្យដឹងនៅថ្ងៃទី១០ កក្កដា ថា មូលហេតុដែលពួកគាត់តវ៉ា ដោយសារថៅកែផ្សារដំឡើងថ្លៃជួលតូបមួយពីតម្លៃជាង ៥០០ដុល្លារអាមេរិកទៅ ១.២០០ដុល្លារអាមេរិក និងបង់ ១០ម៉ឺនរៀលក្នុងមួយខែរយៈពេល ៥ឆ្នាំ។ លោកអះអាងថា តម្លៃតូបថ្មីនេះ ពួកគាត់លក់មិនបានប្រាក់ចំណេញឡើយ ព្រោះពុំសូវមានអតិថិជនចូលទិញ៖ «ព្រោះអីគាត់ធ្វើមិនត្រឹមត្រូវ ព្រោះទ្វារបើកបិទក្នុងតូប ពួកខ្ញុំចេញប្រាក់ធ្វើដោយខ្លួនឯង ហើយពេលផុតអាណត្តិ ៥ឆ្នាំ ពួកខ្ញុំមានសិទ្ធិរុះរើទ្វារចេញវិញ តែថៅកែផ្សារមិនឲ្យពួកខ្ញុំរុះរើទេ»។
ឆ្លើយតបនឹងបញ្ហានេះ ថៅកែផ្សាររ៉ាថ្មី លោក ទឹត្យ លេក មានប្រសាសន៍ថា ករណីនេះដោយសារក្រុមអ្នកតវ៉ាពុំបានបង់ប្រាក់ថ្លៃតូបលក់ដូរពីអាណត្តិមុនឲ្យគ្រប់ចំនួន។ លោកបន្ថែមថា លោកពុំបានដំឡើងថ្លៃជួលតូបលក់ដូររបស់ក្រុមអាជីវករនោះទេ៖ «តូបដែលខ្ញុំជួលក្នុងមួយអាណត្តិ ៥ឆ្នាំ តម្លៃ ២.៥០០ដុល្លារ តែអាជីវករមួយចំនួនដែលមានលទ្ធភាពបង់ ២.៥០០ដុល្លារហើយ គឺខ្ញុំមិនបានយកឈ្នួល ១០ម៉ឺនរៀលក្នុងមួយខែ ឬក៏ថ្លៃទ្វារបង្អួចនោះទេ។ ចំពោះអាជីវករដែលពុំមានលទ្ធភាពបង់ ២.៥០០ដុល្លារ ខ្ញុំឲ្យពួកគាត់បង់រំលស់ដោយឲ្យយកទ្វារពីខ្ញុំ និងការក្រាលការ៉ូក្រាលអី គឺខ្ញុំត្រូវកាត់ប្រាក់ពីគាត់វិញ»។
អាស៊ីសេរី ពុំអាចទាក់ទងអភិបាលក្រុងប៉ោយប៉ែត លោក ង៉ោ ម៉េងជ្រួន ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី១០ កក្កដា ដោយលោកពុំទទួលទូរស័ព្ទ។
ក្រុមអាជីវករអះអាងថា អាជ្ញាធរក្រុងបានហៅពួកគាត់ទៅជួបនៅសាលាក្រុង ដោយប្រាប់ថាអាជ្ញាធរនឹងចុះទៅពិនិត្យផ្ទាល់ ដើម្បីដោះស្រាយនៅចុងសប្ដាហ៍នេះ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា ស្នើឲ្យអាជ្ញាធរក្រុងត្រូវស៊ើបអង្កេតដោះស្រាយបញ្ហានេះដោយអព្យាក្រឹត្យ និងមិនលម្អៀងទៅខាងភាគីណាមួយនោះឡើយ៖ «ទីមួយ គាត់ត្រូវពិនិត្យតើថាមានការបង់តូបបង់អីមែនឬអត់? ទី២ បើពលរដ្ឋរស់នៅមានការធ្វើអាជីវកម្មដើម្បីរស់រានមានជីវិតនៅកន្លែងនោះ គួរតែជួយសម្រួលពួកគាត់ឲ្យបានលក់នៅកន្លែងដើម។ ហើយកុំអាងថាខ្លួនជាថៅកែ ហើយចង់ធ្វើអីក៏បានតាមអំពើចិត្ត មិនត្រូវទេ ព្រោះគេជួលទៅតាមតម្លៃ ដូច្នេះបើបាត់បង់ត្រង់ចំណុចណាមួយ អ្នកថៅកែក៏ត្រូវទទួលខុសត្រូវដែរ»។
ផ្សាររ៉ាថ្មី មានទីតាំងជាប់ផ្លូវរថភ្លើងនៅសង្កាត់ប៉ោយប៉ែត និងមានតូបលក់អីវ៉ាន់ចម្រុះសរុបជាង ៣០០តូប។ ក្រុមអាជីវករសង្កត់ធ្ងន់ថា ប្រសិនបើអាជ្ញាធរមិនអាចដោះស្រាយតម្លៃតូបឲ្យនៅដូចតម្លៃចាស់ដដែលបានទេ ពួកគាត់នឹងតវ៉ាសាជាថ្មីទៀតក្នុងពេលឆាប់ៗ៕
