សព្វថ្ងៃនេះ មន្ត្រីសំខាន់ៗរបស់រដ្ឋាភិបាលខ្មែរខ្លះតែងចេញទៅពិនិត្យ និងព្យាបាលជំងឺនៅបរទេស ដូចជាប្រទេសសិង្ហបុរី ឬក៏ប្រទេសបារាំង ជាដើម។ ចំណែកប្រជាពលរដ្ឋខ្មែរវិញកាលពី ៦-៧ឆ្នាំមុន បាននាំគ្នាទៅពិនិត្យ និងព្យាបាលជំងឺនៅឯប្រទេសវៀតណាម ក៏ប៉ុន្តែបច្ចុប្បន្នបានងាកមករកសេវាពិនិត្យ និងព្យាបាលជំងឺនៅឯប្រទេសថៃ វិញ។
តើមូលហេតុអ្វីបានជាប្រទេសកម្ពុជា មានគ្រូពេទ្យ និងមន្ទីរពេទ្យដែរ បែរជាពលរដ្ឋខ្លួនឯងសុខចិត្តចំណាយធនធានទៅព្យាបាលនៅឯប្រទេសជិតខាងទៅវិញ?
មន្ត្រីច្រកទ្វារព្រំដែនអន្តរជាតិអូរស្មាច់ ខេត្តឧត្តរមានជ័យ ឲ្យដឹងថា បច្ចុប្បន្ននេះ ពលរដ្ឋខ្មែរកាន់តែច្រើនឡើងៗបាននាំគ្នាឆ្លងដែនទៅពិនិត្យសុខភាព និងព្យាបាលជំងឺនៅឯខេត្តសុរិន្ទ របស់ប្រទេសថៃ។
គេប៉ាន់ប្រមាណថា ក្នុងមួយថ្ងៃៗយ៉ាងហោចណាស់ក៏មានពលរដ្ឋចំនួនពី ១០០នាក់ទៅ ១៥០នាក់ ទាំងរស់នៅខេត្តឧត្តរមានជ័យ និងមកពីខេត្តផ្សេងៗ បានឆ្លងដែនទៅពិនិត្យ និងព្យាបាលជំងឺនៅឯខេត្តសុរិន្ទ។
ស្ត្រីម្នាក់ក្នុងចំណោមពលរដ្ឋខ្មែរជាច្រើនទៀតដែលមកពីខេត្តកំពង់ធំ ហើយឆ្លងដែនទៅព្យាបាលជំងឺនៅខេត្តសុរិន្ទ គឺលោកស្រី ឌី សុផល។ លោកស្រីមានប្រសាសន៍ថា គាត់មានជំងឺអាស៊ីដក្នុងក្រពះ ឬរលាកក្រពះរយៈពេល ៤ឆ្នាំមកហើយ ប៉ុន្តែនៅស្រុកខ្មែរគាត់មិនព្យាបាលទេ គឺគ្រាន់តែទិញថ្នាំមកលេបបន្តិចបន្តួចប៉ុណ្ណោះ។ លោកស្រី សុផល បញ្ជាក់ថា ការដែលលោកស្រីទៅព្យាបាលជំងឺនៅប្រទេសថៃ ពីព្រោះតែលោកស្រីមានទំនុកចិត្តទៅលើសមត្ថភាពគ្រូពេទ្យរបស់គេ៖ «ដូចថាយើងព្យាបាលអ៊ីចឹងទៅ គ្រូពេទ្យថៃ គេឲ្យក្រដាសមួយសន្លឹក ដើម្បីថែទាំសុខភាពរបស់យើងក្នុងរយៈពេលដែលព្យាបាល។ ខ្ញុំមានបញ្ហាអាស៊ីដក្នុងក្រពះតាំងពីឆ្នាំ២០១៣ មក»។
បុរសម្នាក់ទៀតមកពីខេត្តកំពង់ធំ ដែរ លោក ព្រំ ផាន់នី មានប្រសាសន៍ថា លោកធ្លាប់ទៅព្យាបាលជំងឺនៅខេត្តសុរិន្ទ ប្រទេសថៃ ចំនួនពីរដងហើយ។ ការដែលលោកចូលចិត្តទៅព្យាបាលជំងឺនៅប្រទេសថៃ ពីព្រោះតែវាហាក់ដូចជាគ្រូពេទ្យបរទេសមើលថែជំងឺសមប្រកប និងមានវិជ្ជាជីវៈជាងពេទ្យស្រុកខ្មែរ៖ «ខ្ញុំយល់ថាទៅព្យាបាលជំងឺនៅស្រុកថៃ គឺវាមានប្រសិទ្ធភាពជាង។ នេះគ្រាន់តែជាការជឿជាក់របស់ខ្ញុំទេ។ អ្នកខ្លះទៀតចូលចិត្តទៅមើលជំងឺនៅស្រុកថៃ គឺបានដើរលេងនៅស្រុកគេផង»។
ប្រធានទីស្នាក់ការច្រកទ្វារព្រំដែនអូរស្មាច់ លោក គឹម កន ឲ្យដឹងថា ក្នុងមួយថ្ងៃយ៉ាងហោចណាស់ក៏មានពលរដ្ឋខ្មែរចំនួនពី ១០០នាក់ទៅ ១៥០នាក់ ដែលនាំគ្នាឆ្លងដែនទៅពិនិត្យ និងព្យាបាលជំងឺនៅខេត្តសុរិន្ទ ប្រទេសថៃ។ ថ្វីត្បិតតែគ្មានតួលេខនៅក្នុងដៃ ប៉ុន្តែប្រធានទីស្នាក់ការច្រកទ្វារព្រំដែនអះអាងថា ចំនួនពលរដ្ឋខ្មែរដែលចេញទៅពិនិត្យ និងព្យាបាលជំងឺនៅប្រទេសថៃ គឺមានការកើនឡើង៖ «ខ្ញុំគិតថាឆ្នាំនេះអាចច្រើនជាងឆ្នាំមុនៗ ដូចថាគាត់ទៅព្យាបាលជំងឺកាក់កប ហើយតម្លៃព្យាបាលសមរម្យ ជាដើម»។
បច្ចុប្បន្ន កុំថាឡើយតែពលរដ្ឋ សូម្បីតែមន្ត្រីរដ្ឋាភិបាលសំខាន់ៗខ្លះ ដូចជាលោកនាយករដ្ឋមន្ត្រី ហ៊ុន សែន ក៏ចេញទៅព្យាបាលជំងឺនៅក្រៅប្រទេស ដូចជាទៅសិង្ហបុរី និងប្រទេសបារាំង ជាដើម។ មូលហេតុដែលពលរដ្ឋខ្មែរនាំគ្នាចេញទៅព្យាបាលជំងឺនៅក្រៅប្រទេសនេះ អាចបណ្ដាលមកពីមូលហេតុគ្មានការជឿទុកចិត្តទៅលើសមត្ថភាពគ្រូពេទ្យខ្មែរ។
ទោះជាយ៉ាងណា អាស៊ីសេរី មិនអាចទាក់ទងអ្នកនាំពាក្យក្រសួងសុខាភិបាល ដើម្បីសុំការពន្យល់ជុំវិញរឿងពលរដ្ឋខ្មែរចេញទៅព្យាបាលនៅក្រៅប្រទេសនេះបានថាយ៉ាងណានៅឡើយ នៅថ្ងៃទី១០ ខែកក្កដា។
កាលពី ៦-៧ឆ្នាំមុន ពលរដ្ឋខ្មែរជាច្រើនធ្លាប់នាំគ្នាបាក់ទៅព្យាបាលជំងឺនៅឯប្រទេសវៀតណាម ប៉ុន្តែរយៈពេលជាង ២ឆ្នាំចុងក្រោយនេះ ពលរដ្ឋខ្មែរភាគច្រើនបាននាំគ្នាងាកមករកការព្យាបាលជំងឺពីគ្រូពេទ្យថៃ វិញ៕