Clik here to view.
ក្រសួងមហាផ្ទៃ បដិសេធថា រដ្ឋមន្ត្រីក្រសួងមហាផ្ទៃ លោក ស ខេង នឹងមិនជួបអតីតប្រធានគណបក្សសង្គ្រោះជាតិ លោក សម រង្ស៊ី នៅក្រៅប្រទេសនោះទេ។ ការបដិសេធរបស់ក្រសួងមហាផ្ទៃ នេះ ក្រោយពីក្រសួងឃើញមានព័ត៌មានខ្លះផ្សព្វផ្សាយថា លោក ស ខេង អាចជួបលោក សម រង្ស៊ី ក្នុងដំណើរទៅកាន់ប្រទេសអេស្ប៉ាញ (Spain) តាមការលើកឡើងរបស់អ្នកវិភាគ។
លិខិតរបស់ក្រសួងមហាផ្ទៃ ផ្សព្វផ្សាយនៅថ្ងៃទី៦ កក្កដា បដិសេធចំពោះព័ត៌មាននេះ ព្រមទាំងចាត់ទុកថា នេះជាការមួលបង្កាច់ការពិតក្នុងន័យបំភ័ន្តសាធារណមតិ ញុះញង់បំបែកបំបាក់សាមគ្គីជាតិ មានចេតនាទុច្ចរិតដើម្បីបម្រើមហិច្ឆតានយោបាយរបស់ក្រុម និងបក្សពួក។
លោក ស ខេង បានដឹកនាំគណៈប្រតិភូចាកចេញពីកម្ពុជា ទៅកាន់ប្រទេសអេស្ប៉ាញ កាលពីយប់ថ្ងៃទី៥ កក្កដា។ ខុទ្ទកាល័យលោក ស ខេង បញ្ជាក់ថា លោក ស ខេង នឹងចូលរួមក្នុងសម័យប្រជុំប្រចាំឆ្នាំលើកទី២៨ របស់វេទិកា ក្រេន ម៉ុងតាណា (CRANS MONTANA) នៅទីក្រុងបាសេឡូណា (Barcelona) ប្រទេសអេស្ប៉ាញ ចាប់ពីថ្ងៃទី៥ ដល់ថ្ងៃទី៨ កក្កដា៕
