ក្រុមគ្រួសាររបស់ជនសង្ស័យពីរនាក់ដែលជំនាញរដ្ឋបាលព្រៃឈើ និងប៉េអិមខេត្តកំពង់ធំ ប្រើហិង្សា និងចាប់ដាក់គុក ដោយចោទថារារាំងមន្ត្រីរាជការសាធារណៈក្នុងការចុះអនុវត្តការងាររុះរើខ្ទមសង់លើដីរដ្ឋនោះ កំពុងស្វែងរកអន្តរាគមន៍ពីក្រសួងយុត្តិធម៌ ព្រះមហាក្សត្រ និងឧត្ដមក្រុមប្រឹក្សានៃអង្គចៅក្រម ដើម្បីបាននៅក្រៅឃុំបណ្ដោះអាសន្ន ខណៈអ្នកទាំងពីរជាប់ឃុំនៅពន្ធនាគារខេត្តកំពង់ធំ។
ពលរដ្ឋម្នាក់ឈ្មោះ ស៊ិន ចាន់នឿន និងអតីតក្រុមប្រឹក្សាឃុំក្រយា ស្រុកសន្ទុក លោក នេត សៅ ត្រូវបានសមត្ថកិច្ចចោទតាមក្រមព្រហ្មទណ្ឌផង និងច្បាប់ព្រៃឈើផង។
មន្ត្រីអង្គការការពារសិទ្ធិមនុស្ស និងគ្រួសារជនសង្ស័យ រិះគន់ខ្លាំងៗចំពោះមន្ត្រីរដ្ឋបាលព្រៃឈើ និងប៉េអិម ថាបានវាយពលរដ្ឋឲ្យបែកក្បាល និងធ្លាក់ពីលើម៉ូតូនៅតាមផ្លូវសាធារណៈហើយ បែរជាចោទពលរដ្ឋចាប់ដាក់គុកទៀត។
ភរិយារបស់អតីតក្រុមប្រឹក្សាឃុំក្រយា លោកស្រី ណុច ស៊ាម មានប្រសាសន៍ថា ប្ដីគាត់ និងពលរដ្ឋម្នាក់ទៀត ត្រូវសមត្ថកិច្ចចោទតាមមាត្រា២១៧ នៃក្រមព្រហ្មទណ្ឌ និងមាត្រា១០០ នៃច្បាប់ព្រៃឈើ។ ប្ដីលោកស្រីដែលកំពុងឌុបគាត់ និងកូននៅលើម៉ូតូតាមផ្លូវក្បែរកន្លែងរុះរើនោះ មិនបានចូលទៅធ្វើសកម្មភាពរារាំង ឬប្រើហិង្សាឡើយ ស្រាប់តែមន្ត្រីប៉េអិមស្ទុះមកវាយធ្លាក់ពីលើម៉ូតូតែម្ដង៖ «ខ្ញុំមានម្ដាយចាស់ ហើយកូនតូចទៀត ប្រឈមមុខនឹងជំពាក់បំណុលគេទៀត ហើយប្ដីនៅក្នុងពន្ធនាគារមានជំងឺ ហើយអត់ទៀត រកតែលុយទៅអើត (សួរសុខទុក្ខ) គាត់ក៏អត់មានដែរ»។
ក្រៅពីដាក់លិខិតសុំអន្តរាគមន៍ពីស្ថាប័នជាតិធំៗ លោកស្រី ណុច ស៊ាម ក៏ដាក់បណ្ដឹងទៅសាលាឧទ្ធរណ៍ដើម្បីសុំឲ្យប្ដីរបស់គាត់ដែលកំពុងមានជំងឺ និងជីវភាពខ្វះខាតខ្លាំងផងនោះ បាននៅក្រៅឃុំ។
លោកស្រីរំឭកថា កាលពីថ្ងៃទី៧ ខែមេសា ឆ្នាំ២០១៧ មានសមត្ថកិច្ចមួយក្រុមចុះរុះរើផ្ទះតូចល្មម ១ខ្នងរបស់អ្នកភូមិថ្មសំលៀង ឈ្មោះ ម៉ៅ វ៉ង ហើយពលរដ្ឋម្នាក់ទៀតឈ្មោះ ស៊ិន ចាន់នឿន ចូលទៅមើលការរុះរើនោះ ត្រូវសមត្ថកិច្ចវាយបែកក្បាល។ ភ្លាមនោះ ប្ដីរបស់គាត់ដែលជាអតីតក្រុមប្រឹក្សាឃុំ និងធ្លាប់ស្គាល់អ្នកដែលត្រូវគេវាយឲ្យបែកក្បាល និងអ្នកដែលត្រូវគេរុះរើផ្ទះនោះ ក៏ឈប់ម៉ូតូនៅលើផ្លូវសាធារណៈ ស្រែកសួរនាំសមត្ថកិច្ចអំពីរឿងរ៉ាវហិង្សានេះ ស្រាប់តែមានមន្ត្រីប៉េអិមម្នាក់ឈ្មោះ ជុន ហាក់ បានហក់មកវាយប្ដីគាត់ធ្លាក់ពីលើម៉ូតូ ហើយក៏ចាប់ប្ដីគាត់ និងពលរដ្ឋម្នាក់ទៀតទៅបាត់។
ឆ្លើយតបបញ្ហានេះ នាយខណ្ឌរដ្ឋបាលព្រៃឈើខេត្តកំពង់ធំ លោក តឹប ញាតា ថាពេលចុះអនុវត្តការងាររុះរើខ្ទមពលរដ្ឋចេញពីដីព្រៃរបស់រដ្ឋ ឋិតនៅភូមិថ្មសំលៀង នៃឃុំក្រយា នោះ រូបលោកមិនបានចូលរួមទេ ប៉ុន្តែមាននាយរងខណ្ឌម្នាក់ កម្លាំងចម្រុះរបស់ខេត្ត និងកម្លាំងគណៈបញ្ជាការឯកភាពស្រុកចុះធ្វើ។ ចំពោះបទចោទ និងការបកស្រាយជុំវិញរឿងនេះ លោកជំរុញឲ្យទៅសួរតុលាការ៖ «គេបានធ្វើការតាមវិធីរបស់គេ ប៉ុន្តែដោយមានការរារាំងអ៊ីចឹង យើងបានឃាត់គាត់ពីបទរារាំងសមត្ថកិច្ចក្នុងការអនុវត្តបំពេញភារកិច្ច»។
អាស៊ីសេរី មិនអាចសុំការអត្ថាធិប្បាយបន្ថែមជុំវិញរឿងនេះពីអ្នកនាំពាក្យតំណាងអយ្យការអមសាលាដំបូងខេត្តកំពង់ធំ លោក សាយ ណូរ៉ា បានទេនៅថ្ងៃទី៥ ខែកក្កដា ដោយទូរស័ព្ទមិនចូល។
នាយិកាអង្គការសិទ្ធិមនុស្សដើម្បីតម្លាភាព និងសន្តិភាព អ្នកស្រី ម៉ម ស៊ីថា ដែលបានជ្រាបច្បាស់អំពីរឿងនេះយល់ថា ជារឿងអយុត្តិធម៌បំផុតសម្រាប់ពលរដ្ឋ ហើយអ្នកស្រីស្នើឲ្យសាលាឧទ្ធរណ៍ពិនិត្យអង្គហេតុ និងពិចារណាឲ្យជនសង្ស័យទាំងពីរនាក់បាននៅក្រៅឃុំបណ្ដោះអាសន្ន៖ «ការប្រព្រឹត្តនៅក្រៅអង្គហេតុ វាយមនុស្សខុសច្បាប់ ចាប់មនុស្សដាក់គុក។ អ៊ីចឹងបានថាអត់ត្រឹមត្រូវទេ គឺខ្ញុំសូមឲ្យសាលាឧទ្ធរណ៍ពិចារណាឲ្យពួកគាត់បាននៅក្រៅឃុំឡើងវិញ ព្រោះរឿងនេះអយុត្តិធម៌សម្រាប់គាត់ គឺជារឿងមួយដែលយើងលំបាកថាការពារប្រយោជន៍ផ្លូវច្បាប់ ការពារលើសិទ្ធិប្រជាពលរដ្ឋ»។
មាត្រា២១៧ នៃក្រមព្រហ្មទណ្ឌ បានចែងពីបទហិង្សាដោយចេតនាថា អំពើហិង្សាប្រព្រឹត្តដោយចេតនាលើអ្នកដទៃ ត្រូវផ្ដន្ទាទោសដាក់ពន្ធនាគារពីមួយឆ្នាំ ដល់បីឆ្នាំ និងពិន័យជាប្រាក់ពីពីរលានរៀលដល់ប្រាំមួយលានរៀល។ ចំណែកច្បាប់ស្ដីពីព្រៃឈើ ត្រង់មាត្រា១០០ ចែងថា សកម្មភាពទាំងឡាយណាដែលធ្វើឡើងដោយអាជ្ញាធរដែនដី មន្ត្រីនគរបាល យោធា និងអាជ្ញាធរផ្សេងទៀត ដើម្បីធ្វើអន្តរាគមន៍ផ្ដល់ការអនុញ្ញាតដោយផ្ទាល់ ឬដោយប្រយោលដល់អាជីវកម្មព្រៃឈើ គំរាមកំហែងដល់មន្ត្រីរដ្ឋបាលព្រៃឈើ រាំងស្ទះដល់ការបំពេញភារកិច្ច និងកិច្ចប្រតិបត្តិការរបស់មន្ត្រីរដ្ឋបាលព្រៃឈើ ត្រូវចាត់ទុកជាបទល្មើសដែលត្រូវផ្ដន្ទាទោសដាក់ពន្ធនាគារពីមួយឆ្នាំ ដល់ប្រាំឆ្នាំ និងពិន័យជាប្រាក់ពីដប់លានរៀល ដល់មួយរយលានរៀល។
ទាក់ទងនឹងបទចោទនេះ ភរិយាអតីតក្រុមប្រឹក្សាឃុំក្រយា លោកស្រី ណុច ស៊ាម បញ្ជាក់ថា ប្ដីរបស់គាត់អស់តួនាទីជាក្រុមប្រឹក្សាតាំងពីខែកុម្ភៈ ហើយហេតុការណ៍ទើបកើតនៅខែមេសា ឆ្នាំ២០១៧៕