Clik here to view.
ប្រជាពលរដ្ឋ ៣០នាក់តំណាងឲ្យ ១៦គ្រួសារមកពីស្រុកបវេល ខេត្តបាត់ដំបង ដែលមានជម្លោះដីធ្លីជាមួយអ្នកមានទ្រព្យ នៅរសៀលថ្ងៃទី៥ កក្កដា ធ្វើដំណើរដោយគោយន្តចំនួន ៦គ្រឿងឆ្ពោះទៅសាលាខេត្តបាត់ដំបង ដើម្បីដាក់សម្ពាធឲ្យអាជ្ញាធរខេត្តដោះស្រាយទំនាស់ដីជូនពួកគាត់ឲ្យបានឆាប់។
ក្រុមអ្នកតវ៉ាទំនាស់ដីធ្លីមកពីស្រុកបវេល នោះមានដាក់ឧបករណ៍កន្ទេល ខ្នើយ ចង្ក្រាន ឆ្នាំងភ្ជាប់ទៅជាមួយពួកគាត់ ធ្វើដំណើរចេញពីឃុំខ្នាចរមាស ស្រុកបវេល តាំងពីព្រឹកព្រលឹម ហើយជួបភ្លៀងផ្គរតាមផ្លូវមិនបានទៅដល់សាលាខេត្តបាត់ដំបង ទេ។
តំណាងអ្នកតវ៉ា លោក ចាន់ យឿត ផ្ដល់បទសម្ភាសន៍ខណៈមកដល់ឃុំអូរតាគី ស្រុកថ្មគោល នៅរសៀលថ្ងៃទី៥ កក្កដា ថា ពួកគាត់នឹងមិនត្រឡប់ទៅផ្ទះវិញឡើយ ប្រសិនបើអាជ្ញាធរខេត្ត និងមន្ត្រីពាក់ព័ន្ធ មិនជួយដោះស្រាយទំនាស់ដីជូនពួកគាត់ ដើម្បីយកដីទៅបង្កបង្កើនផលបាននោះ៖ «គោលបំណងរបស់ពួកខ្ញុំ ចង់ឲ្យអាជ្ញាធរបង្កើតគណៈកម្មការមួយយកប័ណ្ណពីភាគីទំនាស់ពិនិត្យមើលឡើងវិញឲ្យមានតម្លាភាព ព្រោះលោក អៀង អឿន ឈូសឆាយដីមិនឲ្យពួកខ្ញុំធ្វើស្រែទេ»។
ពលរដ្ឋមានទំនាស់ដីម្នាក់ទៀត លោកស្រី សូ ទី ថ្លែងថា មូលហេតុដែលពួកគាត់ធ្វើដំណើរទាំងភ្លៀងរលឹមឲ្យអាជ្ញាធរជួយដោះស្រាយ ដោយសារអ្នកមានលុយម្នាក់ឈ្មោះ អៀង អឿន រស់នៅខេត្តបាត់ដំបង បានយកគ្រឿងចក្រទៅឈូសឆាយលើដីទំនាស់ ហើយពួកគាត់បានប្ដឹងទៅអាជ្ញាធរស្រុក និងខេត្តម្ដងរួចមកហើយ តែពុំមានដំណោះស្រាយទេ។ លោកស្រីបន្ថែមថា ពួកគាត់ក្រីក្រ ហើយគ្មានដីផ្សេងក្រៅអំពីដីទំនាស់ដើម្បីធ្វើស្រែដោះស្រាយជីវភាពគ្រួសារទេ៖ «ទំនាស់ជាង ១០ឆ្នាំហើយ អាជ្ញាធរដោះស្រាយមិនបានសម្រេចទេ ដូច្នេះហើយបានជាពួកខ្ញុំតវ៉ាដើម្បីបានដីយកទៅបង្កបង្កើនផល»។
អាស៊ីសេរី មិនអាចទាក់ទងភាគីទំនាស់ លោក អៀង អឿន ដើម្បីឆ្លើយតបជុំវិញបញ្ហានេះបានទេនៅថ្ងៃទី៥ កក្កដា ដោយទូរស័ព្ទរបស់លោកហៅមិនចូល។
ចំណែកអភិបាលរងខេត្តបាត់ដំបង ទទួលបន្ទុកដោះស្រាយវិវាទដីធ្លី លោក ប៊ុន គឹមស៊ាន ក៏អាស៊ីសេរីមិនអាចទាក់ទងបានដែរ ដោយទូរស័ព្ទរបស់លោកពុំមានអ្នកទទួល។
ទោះបីជាយ៉ាងនេះក្ដី មន្ត្រីសម្របសម្រួលអង្គការលីកាដូ (LICADHO) ខេត្តបាត់ដំបង លោក ហេង សាយហុង មានប្រសាសន៍ថា ករណីទំនាស់ដីរបស់ក្រុមអ្នកតវ៉ាជារឿងស្មុគស្មាញ មានទំនាស់តាំងពីឆ្នាំ២០០២ មក។ លោកថា កន្លងទៅ អាជ្ញាធរដោះស្រាយបានត្រឹមសម្របសម្រួលដោយឲ្យពលរដ្ឋធ្វើស្រែនៅលើដីទំនាស់បណ្ដោះអាសន្ន។ លោកអះអាងថា ករណីភាគីទំនាស់យកគ្រឿងចក្រទៅឈូសឆាយលើដីដែលមិនទាន់ដោះស្រាយចប់សព្វគ្រប់ គឺជារឿងមិនត្រឹមត្រូវឡើយ៖ «រឿងនេះយើងមើលឃើញថាការតវ៉ារបស់ពលរដ្ឋ គឺជារឿងត្រឹមត្រូវ ព្រោះពួកគាត់មករកកិច្ចអន្តរាគមន៍ពីអាជ្ញាធរខេត្ត ដើម្បីជួយចាត់វិធានការកុំឲ្យមានការឈូសឆាយទៅលើដីរបស់ពួកគាត់»។
ពលរដ្ឋអះអាងថា ដីទំនាស់ទំហំ ១១០ហិកតារស្ថិតនៅភូមិសូភី ឃុំអន្លង់រុន ស្រុកថ្មគោល ខេត្តបាត់ដំបង មានទំនាស់ខ្លាំងនៅឆ្នាំ២០០២ ជាមួយលោក អៀង អឿន និងពលរដ្ឋចំនួន ១៦គ្រួសារនៅស្រុកបវេល។ ក្រុមអ្នកតវ៉ាបានស្នាក់នៅបណ្ដោះអាសន្នតាមផ្លូវនៅឃុំជ្រៃ ស្រុកថ្មគោល ហើយពួកគាត់នឹងបន្តដំណើរនៅថ្ងៃទី៦ កក្កដា ទៅសាលាខេត្តបាត់ដំបង និងបន្តដំណើរទៅរាជធានីភ្នំពេញទៀត ប្រសិនបើអាជ្ញាធរគ្មានដំណោះស្រាយ៕
