Clik here to view.
ប្រជាសហគមន៍នៅស្រុកមេមត់ ខេត្តត្បូងឃ្មុំ ត្រេកអរក្រោយពេលតុលាការក្រុងភ្នំពេញ សម្រេចដោះលែងមន្ត្រីការពារសិទ្ធិមនុស្ស និងមន្ត្រី គ.ជ.ប ឱ្យមានសេរីភាពឡើងវិញ។ ពលរដ្ឋថែមទាំងស្នើឱ្យតុលាការទម្លាក់ចោលបទចោទប្រកាន់ទៅលើមន្ត្រីសិទ្ធិមនុស្ស និងមន្ត្រី គ.ជ.ប ដែលគ្មានកំហុសទាំងនោះ ព្រោះការងាររបស់ពួកគាត់គឺជារឿងមនុស្សធម៌។ ការលើកឡើងនេះ ក្រោយពេលចៅក្រមស៊ើបសួរនៃសាលាដំបូងក្រុងភ្នំពេញ សម្រេចដោះលែងមន្ត្រីទាំងនោះឱ្យនៅក្រៅឃុំបណ្ដោះអាសន្នកាលពីយប់ថ្ងៃទី២៩ ខែមិថុនា។
គ្រាន់តែដឹងដំណឹងថា មន្ត្រីសិទ្ធិមនុស្ស ៤នាក់ និងមន្ត្រី គ.ជ.ប ម្នាក់ ត្រូវបានតុលាការសម្រេចដោះលែងប្រជាសហគមន៍នៅខេត្តត្បូងឃ្មុំ បានប្រាប់គ្នីគ្នាអំពីព័ត៌មាននេះនឹងត្រៀមខ្លួនមករាជធានីភ្នំពេញ ទៀតផង។ ពួកគាត់នឹងនាំគ្នាឡើងមកទទួលស្វាគមន៍មន្ត្រី និងអតីតមន្ត្រីសិទ្ធិមនុស្សទាំង ៥នាក់នៅថ្ងៃទី១ កក្កដា ដើម្បីបង្ហាញពីទឹកចិត្តស្រលាញ់ និងដឹងគុណបំណាច់ដែលពួកគាត់បានចូលរួមចំណែកជួយសង្គមមួយនេះ ពិសេសបានបង្ហាត់បង្រៀនពលរដ្ឋឱ្យស្គាល់ពីតម្លៃសិទ្ធិមនុស្ស និងរបៀបតស៊ូមតិដោយអហិង្សា។ ក្រៅពីនេះ ដើម្បីលើកទឹកចិត្តដល់ពួកគេឱ្យបន្តការងារជួយសង្គម និងពលរដ្ឋទន់ខ្សោយបន្ថែមទៀត។
តំណាងប្រជាសហគមន៍នៅឃុំជាំក្រវៀន លោក ផុន សុផល មានប្រសាសន៍ថា ពួកគាត់ត្រេកអរស្ទើររកអ្វីប្រៀបផ្ទឹមពុំបាន ពីព្រោះរឿងនេះ កើតឡើងដោយគ្មាននរណាអាចនឹកស្មានដល់។ លោកបន្តថា ការដោះលែងមន្ត្រី និងអតីតមន្ត្រីសិទ្ធិមនុស្សអាដហុក (ADHOC) គឺបង្ហាញថា ការគោរពសិទ្ធិមនុស្សនៅកម្ពុជា នឹងប្រសើរឡើងវិញ ហើយវារឹតតែប្រសើរឡើងទាំងស្រុងនោះ នៅពេលតុលាការទម្លាក់បទចោទប្រកាន់តែម្ដង៖ «យើងសង្ឃឹមថា នឹងមានការគោរពសិទ្ធិមនុស្សឡើងវិញ ព្រោះនៅរយៈពេលជាងមួយឆ្នាំនេះ នៅពេលមានការចាប់មន្ត្រីសិទ្ធិមនុស្សទាំងនោះ ធ្វើឱ្យការគោរពសិទ្ធិមនុស្សធ្លាក់ចុះ»។
មន្ត្រីសិទ្ធិមនុស្ស និងមន្ត្រី គ.ជ.ប ទាំង ៥រូប រួមមានលោក ណៃ វ៉ង់ដា លោក នី សុខា លោក យី សុខ សាន្ត អ្នកស្រី លឹម មុន្នី និងលោក នី ចរិយា ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ លោក ធាម ច័ន្ទពិសិដ្ឋ ចេញដីកានៅថ្ងៃទី២៩ ខែមិថុនា សម្រេចដោះលែងឱ្យនៅក្រៅឃុំបណ្តោះអាសន្ន ប៉ុន្តែត្រូវស្ថិតនៅក្រោមការត្រួតពិនិត្យរបស់តុលាការ។
Image may be NSFW.
Clik here to view.
មន្ត្រីអាដហុក និងមន្ត្រី គ.ជ.ប ទាំង ៥នាក់ ត្រូវបានសាលាដំបូងរាជធានីភ្នំពេញ ចោទប្រកាន់ពីបទសូកប៉ាន់សាក្សី និងសមគំនិតសូកប៉ាន់សាក្សី ដែលប្រព្រឹត្តឡើងកាលពីខែមីនា និងខែមេសា ឆ្នាំ២០១៦ ពាក់ព័ន្ធសំណុំរឿង នាង ខុម ចាន់តារាទី ហៅស្រីមុំ។
ប្រជាសហគមន៍ដដែលបញ្ជាក់ថា ការដោះលែងមន្ត្រីទាំង ៥នាក់ គឺមានប្រយោជន៍ច្រើនដល់សង្គមជាតិ ពិសេសពលរដ្ឋ ដូចជាទទួលបានការបង្រៀនផ្នែកច្បាប់ និងរបៀបតស៊ូមតិដោយអហិង្សា ព្រមទាំងការគោរពសិទ្ធិមនុស្សជាដើម។ លោកថា តាមគម្រោងឡើងមក រាជធានីភ្នំពេញ ដើម្បីមកទទួលស្វាគមន៍មន្ត្រីសិទ្ធិមនុស្សដែលត្រូវបានតុលាការដោះលែង អាចមាននឹងប្រជាសហគមន៍ចូលរួមប្រមាណ ៣០០នាក់។
មិនខុសគ្នានេះ ប្រជាសហគមន៍នៅឃុំត្រមូង អ្នកស្រី ឈឺន រតនា រីករាយចំពោះការដោះលែងមន្ត្រីសិទ្ធិមនុស្សទាំងនោះ ប៉ុន្តែអ្នកស្រីស្នើឱ្យរាជរដ្ឋាភិបាល ពិសេសតុលាការទម្លាក់បទចោទប្រកាន់ទាំងឡាយ ព្រោះពួកគេមិនមានកំហុសដូចការចោទប្រកាន់ទេ៖ «តែចង់ឱ្យលើកលែងទោសដែលកើតឡើងដោយការចោទប្រកាន់ហ្នឹង»។
នៅពេលមន្ត្រីទាំង ៥រូប ជាប់ពន្ធនាគារប្រជាសហគមន៍នៅខេត្តត្បូងឃ្មុំ បានចូលរួមធ្វើសកម្មភាពបែបតស៊ូមតិជាច្រើន ដើម្បីស្នើឱ្យតុលាការដោះលែងពួកគេដូចជាលើកបដា ដែលមានរូបមន្ត្រី ទាំង ៥នាក់ និងរូបអ្នកស្រី ទេព វន្នី ផង ថតបង្ហោះតាមបណ្ដាញប្រព័ន្ធហ្វេសប៊ុក (Facebook)។ ក្រៅពីនេះ ក៏មានសកម្មភាពថ្ងៃច័ន្ទពណ៌ខ្មៅ និងការអំពាវនាវតាមប្រព័ន្ធផ្សព្វផ្សាយ។ ក្រៅពីនេះ ពួកគេធ្វើពិធីបន់ស្រន់តាមបែបជំនឿអរូបិយ និងព្រះពុទ្ធសាសនា ដែលមានសែនចេក មាន់ស្ងោរ ក្បាលជ្រូកស្ងោរដាក់តាមខ្ទមអ្នកតា ដើម្បីឱ្យជួយបន្ទន់ចិត្តប្រមុខដឹកនាំ និងតុលាការឱ្យដោះលែងអ្នកជាប់ឃុំទាំងអស់។
មន្ត្រីសម្របសម្រួលសមាគមអាដហុក (ADHOC) ខេត្តត្បូងឃ្មុំ លោក នាង សុវ៉ាត កត់សម្គាល់ថា មូលហេតុពលរដ្ឋត្រេកអរចំពោះការដោះលែងមន្ត្រីការពារសិទ្ធិមនុស្សពេលនេះ ពីព្រោះការងាររបស់ពួកគេជារឿងមនុស្សធម៌សុទ្ធសាធ និងតែងជួយដល់ពលរដ្ឋទន់ខ្សោយ ឬពលរដ្ឋរងគ្រោះដោយអំពើអយុត្តិធម៌ផ្សេងៗនៅក្នុងសង្គម។ លោកអះអាងថា ការងាររបស់មន្ត្រីសិទ្ធិមនុស្ស គឺជាផ្នែកមួយជួយដល់រាជរដ្ឋាភិបាលទៀតផង៖ «វាជារឿងមួយល្អ ប្រសិនបើរាជរដ្ឋាភិបាលពួកមន្ត្រីសិទ្ធិមនុស្សគឺធ្វើឱ្យប្រជាពលរដ្ឋគាំទ្រទៀតដល់រាជរដ្ឋាភិបាល គឺគ្មានចំណេញអីដល់អង្គការសិទ្ធិមនុស្សទេ»។
លោក នាង សុវ៉ាត មើលឃើញថា ការដោះលែងមន្ត្រីសិទ្ធិមនុស្ស និងមន្ត្រី គ.ជ.ប គឺមិនត្រឹមតែផ្ដល់ប្រយោជន៍ដល់ពលរដ្ឋមួយផ្នែកប៉ុណ្ណោះទេ ប៉ុន្តែមុខមាត់ និងកិត្តិយសរបស់រាជរដ្ឋាភិបាលនឹងកាន់តែប្រសើរឡើងទាំងថ្នាក់ជាតិ និងអន្តរជាតិ៕